المرأة الضابط سألتني ـ متأكدة؟
رد عليها المحامي ابو فاطمة ـ اكيد لا هي مريضة و خايفة لان جمعتوها بي ، الغلط منكم
صح المرأة ما عجبها و ضاجت بس ما ردت عليه
حاچيته اني ـ عمو و الله ما اريد خلص
سألني ـ انتِ خفتي منه ؟ إذا خايفة هسة اخليهم يطلعونه من المركز كله
هزيت راسي بلا و جاوبته ـ بس اريد اتنازل
رد ـ سامعة بمتلازمة ستوكهولم؟ إذا أثر بيچ كلام الضابط عن حالته…
قاطعته ـ محد اثر بية مو جاهلة لهالدرجة، بس ما أريد اشتكي
مديت ايدي للمرة ـ شنو لازم اسوي حتى اتنازل
المحامي گل للمرة ـ دقيقة
گام طلع جاب حسن فوگ راسي حچو لمن ايسو و ذاك المحامي مالت الرجال هم اجة وگف وياهم افتهم شنو الموضوع و رجع يم الي ضربني بلغه بقراري
الضابط جابتلي اوراق سحب الدعوة سحبتها
اخذت الضابط مني و بلغت للمحامي مالتنا انو الدعوة الوحيدة البقت على مارتن هي السياقة تحت تأثير الكحول و الدولة راح تقاضي عليها
رجعنا بسيارة المحامي ابو فاطمة حسن التفت علية ـ اي اذا خايفة ليش تتنازلين؟ گليلهم اريد وكت ما اريد اشوف هال...
رديت ـ ما خايفة
صاح حسن بية ـ چا ليش تنازلتي؟
رديت ـ ما اريد ارفع شكوى و بس
هز راسه بتوعد و گال ـ بسيطة ، ابقي سوي هالسوايات بعد ما دخلني بيچ و الله حتى لو ابوية بطلچ من الدوام ما دخلني
من وصلنا گعد حسن و سولف كل شي ابوية و عمي و جدي
كلها تجمعت ترزل و اني ساكته
عمي ابو محمود گلي ـ عمي اذا خايفة ، عادي يشتكون بدون ما تشوفين وجهه
ضغطت على ايد امي و رديت ـ ما اريد افتهموا ما اريـــــــــد
صاح بية ابوية ـ شنو ما تردين؟
اجه علية و امي صارت گدامه گال ـ ولچ الناس و الشرطة كلها راح تگول ذيچ المخدرات مالتچ، ذولة الرايحة ترفعين يمهم دعوى باچر يدورون وراچ خاف صدگ مشترية المخدرات انتِ
امي ردت عليه ـ و هو منو النشر بين الجيران بنيتي رايحة تاخذ مخدرات ؟
مرأت ابوية گالت ـ اي انتِ كمشي بهاي حتى تبرين بتچ
امي ما اهتمتلها و كملت كلامها ـ و الشرطة ماعدها شغل و عمل تجي تدور ورة حوراء، و خل يدورون شنو بتي صدگ تاخذ مخدرات اصلاً كل هذا من ورة راسك
خلة ابوية ايده على صدره و سألها ـ من وراي؟
صارت امي اتعددله ـ اي و الله عركتهم هي و مؤمن من وراك ، و رجعتها للبيت وحدها من وراك ، خوفها و تنازلها عن الشكوى من وراك ؛ شعندك انت شغلة عملة ما گلت لحسن يبقى هنا و رحت وياها
لو شايفة عدها ابو يحس بيها و لازم ايدها ما خافت و تنازلت
أنت تقرأ
في ظِلال نعمٍ سابغات
General Fictionاني لگيت روحي يا حوراء بظِلال نعم سابغات الي يكون بالظل متنعم يحب يرجع تحت الشمس التحرگ حرگ؟ المستقرين في مرضاة الله تراضيهم تراضي ربك مو بس هم عايشين بطمأنينة لا يفيضون على عاشقهم بهاي الطمأنينة شلون افارگهم
