في ظِلال نعمٍ سابغات

10

اتمنى اليوم تسافرون وياية بخيالكم لـ ليلة العاشر من محرم الفات
🕯🕯🕯🕯🕯🕯🕯🕯

انتچيت بإيدي على الحايط و گمت مشيت للدرج لاگيت جواد و هو ينزل
چان جاي يعدل ياخة قميصه

انصدم من شافني موجودة و حاول يحچي وياية

حسيت روحي ما جاي اتنفس عدل كأنما الهواء الي آخذه ما يكفيني
و بنفس الوقت ما ردت احچي وياه فـفتحت باب برانيهم و دخلت

سمعت اخته ام فاطمة تگله ـ ليش ولك انكسر گلب البنية

گعدت يم امي و تدنيت كلش عليها بودي احضنها و ابچي

العلوية ام جواد دخلت سلمت على النسوان و گعدت گبالي چانت عينها علية و اخته ام فاطمة اشرتلي اجي يمها دنگت و ما تحركت

دخلت دكتورة امل و گعدت يمي لزمت ايدي و همستلي ـ الليلة و باچر ذني ليالي خاصة بالامام الحسين خل نأجل مشاكل نفسنا لو نخليها يمهم مو احلى و أحسن

بلعت ريگي و هزيت راسي بالرضى ، مريم جتي گعدت يم دكتورة امل ادنت كلش علينا و گالت ـ حوراء سيد جواد من يصير عصبي حتى اني يرزلني و بعدها يعتذر خطية حباب ما يقصد

باوعت عليها و عيوني يغرغرن بالدموع فسكتت

دكتورة امل خلت ايدها على ظهري من فوگ العباية و گلتلي ـ حچايته صعبه و حقچ بس لازم تتفاهمون العرك و المشاكل تأذي حتى لو ينتهي، لازم بتفاهم

ما رديت عليها على شنو اتفاهم گالها بلسانه رايد وحدة ثانية

اخته تأشرلي اجي يمها ما گمت ، ما اريد اسمع اي تبرير من واحد غيره مو هي نفسها اخته الگالت عنه غرگان

زين مو گتلة اني اذا متزوجني علمود إيڤا ما اريد من البداية گتلة و تصرفاته وياية شقاه و كلامه رسائلنا كلها چذب، زين من هاي لح حتى يعرف شنو الي اريد اتخلص منه ب40 يوم معقولة راد حجة يتحجج بيها على اهله و يخلص مني

اغلب نسوان المنطقة اجو انملة البراني بالنسوان و حتى الصالة فتحوها صارو يوزعون التوزيعات ام فاطمة اخته خلت بيدي توزيعة و دنگت علية شاورتني ـ و الله منايم عدل و عصبي
دنگت راسي و ما رديت عليها "اني اريد اسمع جوابه هو مو كلامكم"

د. امل ادنت علية و گلتلي ـ باعي هاي النسوان الي گدامچ
رفعت راسي حجية لابسة جبة سودة و لافة شيلة و يمها ثنين شابات جاي تبوسهن العلوية ام فاطمة التفتت باوعت بوجه د. امل گوة چانت لازمة دموعها گلتلي بصوت ناصي و مخنوگة بعبرتها ـ هذولي سنة و الله جيراننا امي تروح يمهم و يجونا دوم

ابنهم يوصلهم لبيت السادة كل سنة و يحضر العزاء مال ليلة العاشر حالة حال باقي المعزين و اني كل مناسبة اوديلهم ثواب يدعون و يشكرون بينما أسمع الماينسمع من امي و خالتي