رفع اديه و گلي ـ hold on hold on انتظري رجاءً بس اريد احچي وياچ
انضربت بخشبة المصطبة باوعت حوالية اذا اكو أمن
سمعته يگول ـ لا تخافين بس اريد احچي وياچ
رديت عليه و اني اتصنع القوة ـ شتريد؟
نفخ و گلي ـ سؤال واحد ليش تنازلتي عن الشكوى؟ بسبب المخدرات؟
گلبت خلقتي و هزيت راسي و اني ارد ـ اي مو اني مثلك اشرب و اضرب الناس براحتي
بسرعة سأل ـ المن المخدرات الي لگتها الشرطة؟
باوعتله من فوگ لجوة يلا رديت ـ إذا جاي تغسل ضميرك يمي فأتأكد المخدرات ما چانت الي ، الدعوى تنازلت عنها لسبب خاص بية
سأل ـ و السبب شنو؟
قدمت ادية و گتله ـ وخر منا أريد ارجع لشغلي
رد ـ قصدچ تهربين مني
رجعتلي القوة خزرته و تقربت منه گتله ـ اخوك واحد راح للعراق بأيام الاحتلال حتى يكتل و يسرق الناس و انت جيت ضربتني بكل حقارة علمود اني من الي كتلهم و سرقهم، إذا اكو احد لازم يهرب فهو انت
رجعت گعدت على المصطبة رفع موبايله بيده لمحت الشاشة چان جاي يسجل كلامنا
خليت عيني بعينه و ابتسمت بسخرية و اني اردد ـ بالعراق عدنا مثل نگولة «فوگ شينة گوة عينه»
اخذت نفس و كملت ـ فوگ ما هو مسوي الخطأ يباوعلك بوقاحة ؛ هذا المثل ينطبق عليك فوگ ما شارب و انت تسوق و هذا خطأ و فوگ ما ضاربني و متصرف بعنصرية وياية جيت تريد تزل لساني حتى تدينني گدام الشرطة
اشرتله براسي على موبايله ـ انت واحد خطية روح ابحث بعقل على انتهاكات بريطانيا و التحالف بالعراق و تعال دافعلي عن اخوك
بالبصرة اكو معسكر اسمه معسكر ستيفن ابحث زين و شوف شچانو يسوون الجنود البريطانيين بذاك المعسكر ؟ اكو فيديو لضرب اطفال موجود باليوتيوب روح شوفه بلكي عقلك ينفتح
هز راسه و گال ـ اممم هسة بدينا نحچي بالجد على أساس انتو ما جاي تكلفون دولتنا بوجودكم
قاطعته ـ اولاً احنا مو لاجئين اني عندي جنسية بريطانية و جاي نشتغل و ندفع ضرائب ، ثانياً كل شبر بهالارض هو ملك لله مو للبشر و لو ملك للبشر چان بقوا خالدين ما ماتو و اجو غيرهم
ثالثاً احنا دافعين اقامتنا لگدام بالذهب و الآثار العراقية الي انباگت على مدار السنين باحتلالات بريطانيا للعراق، شهالنظرة الدونية و التمجيد لأنفسكم منو انتو اني من يسألني احد عن نفسي اگله من بلد صارله 7000 سنة
بي مدفون اول انسان خلق هو نبينا آدم
منه تعلمت هالبشرية الكتابة و التدوين و العمارة و ما راح اسكت منا لباچر و حقي بس هالعقدة و النظرة النا بتعالي شنو سببها
أنت تقرأ
في ظِلال نعمٍ سابغات
General Fictionاني لگيت روحي يا حوراء بظِلال نعم سابغات الي يكون بالظل متنعم يحب يرجع تحت الشمس التحرگ حرگ؟ المستقرين في مرضاة الله تراضيهم تراضي ربك مو بس هم عايشين بطمأنينة لا يفيضون على عاشقهم بهاي الطمأنينة شلون افارگهم
