في ظِلال نعمٍ سابغات

8

وية ضربات خفيفة على خدي صوت خشن شوية شوية ميزته و بلشت استوعب الكلام الي يگولة ـ بابا حوراء حوراء تسمعيني
غمضت عيوني و رجعت فتحتهم

صرت احس بإللي حوالية و افهم كلامهم اني بحضن ابوية و امي لازمة ايدي تحرك براحت چفي حتى يمشي الدم بيها

حاولت اعدل گعدتي جنان جابت كلنس مسحت الدم عن وجهي

ابوية حاچاني ـ ها حوراء بابا ردي علينا

بلعت ريگي و جاوبته ـ ها بوية

مسح على راسي ـ اخذچ للمستشفى بس گليلي شتحسين

ـ بس راسي يوجعني ما بية شي خل اگوم

گومني مستندة عليه و امي لازمة ايدي اليسرى گعدت على چربايتنا

امي شالت المخدة و رگعت جنان بيها ـ ادب سزز من گلتلچ عطشانة ليش ما انطيتيها مي

خلت جنان ايدها على صدرها و ردت ـ يااا يمة چا اني شعلية

ابوية رفع حنچي و گال ـ وگف الدم اذا تحسين نفسچ متخربطة بابا هسة اخذچ للمستشفى

جاوبته ـ هو ورة ما نزف خشمي شوية راسي وجعني و مثل ايام الارتجاج اصواتكم صرت ما افهمها بس هسة زينة معندي شي
باوع للساعة و گال ـ عبرت 12 هسة عادي نخابر على خطيبها مؤمن و حسن وين؟
ليا ردت عليه بسرعه ـ بابا يباتون بالحسينية حتى ابراهيم راح وياهم هناك

فتح عيونة على وسعهن ـ يا حسينية شيسوون هناك؟
يربي شلون وية ام فلتة

امها گلتلة ـ حجي گالو يباتون هناك وما يوازون النسوان
صاح ـ يا محمد دخيلك يوازون منو بيبيتهم و عمتهم بس حسابهم عندي و خاصة هذا مؤمن
تمددت التفت علية تحسر و سألني ـ راح تنامين؟

ـ اي معندي شي
گعد يم راسي و گلي بصوت ناصي ـ بوية تتذكرين گبل چانو يگولون النوم مو زين عليچ
جريت الغطوة على جسمي ـ ما بية شي و الله احسن هسة
خلة ايدة على راسي و گل لإمي ـ كل شوية شوفيها اي شي يصير صيحيني

طلع و خطية امي كل ما افز الگاها مخلية ايدها على گصتي خاف عندي حرارة و من احاچيها تسألني شسمي طگ خشمي دم ما فقدت الذاكرة شسالفة

من گعدت الصبح ما خليت وحدة من البنات ما سحگت على رجلها و اني اطلع ملابسي و ابدل كلها خليتها تنأنئ ردت اعوف الضوة مفتوح عناد بيهن هن نايمات و اني اداوم

بس امي خطية وگفت بعيني ، ادري فاتحين فندق غرفة حسن بيها بس بيبي و غرفة جنان و ليا بقت خالية ما وليتن نمتن بيهن

نزلت سويت حليب لنفسي فات ابوية للمطبخ
ـ صباح الخير
رديت عليه ـ صباح النور اسوي چاي
گلي ـ لا ما اريد شي اكليلچ لگمة لا تطلعين هيچ

سويت لفة جبن غصباً علية لان بقة واگف فوگ راسي
دگ جواد علية طلع ابوية للباب و صاح ـ چا شبي ما يجي للبيت