جريت نفس و حاچيت رئيس الاطباء
ـ ما ارفع عليها اي شكوى اصلاً ايدي مابيها شي
الممرضة زينب نقبي گالت ـ شنو مابيها شي؟ ترا انتفخت رغم خلينالها مرهم
رديت عليها ـ خلص زينب رجاءً ما أريد
رئيس الاطباء أخذ باقي الدكاترة و طلع حتى السيد طلع وياهم و هو ضايج مني
الدهن الي خليته بالبداية حرگني بعدين سكن الألم ، بس كلما يحتك ارداني بيدي توجعني
اذن الآذان فرحت للحمامات كشفت عن ايدي و لگيت الچوية منفوخة و صاير بيها فقاعة غسلتها على كيف بالصابون و توضيت و رحت اصلي
كلما اسجد تحتك ايدي بالسجادة و توجعني بس تحملت الألم و صليت فرض
تذكرت الفيديو الگلتلي عليه دكتورة امل فتحته چان الشيخ حبيب الكاظمي
هامت روحي بي و أكدر اگول چانت صلاة العصر احلى صلاة صليتها من بديت هالجدول بسبب هذا الفيديو
نزَّل دموعي و ذكرني بنعمة رب العالمين الچبيرة علينا "علي"
يذكر الشيخ حبيب الكاظمي رواية من احلى الروايات
ابن عباس داخل على النبي الأكرم صل الله عليه و على اله و گايله : يا رسول الله راويني الحق بعيوني
فراد النبي صلى الله عليه وآله عليه : ادخل البيت
داخل ابن عباس لبيت النبي و لاگي امير المؤمنين علي عليه السلام يصلي
فكان الحق هو الامام علي عليه السلام
وچان الامام بركوعه و سجوده يردد "الهي بحق محمد عبدك اغفر للخاطئين من شيعتي"
رجعت لمكاني اشتغل ، شفت نفس المرأة الي تعاركت وياية
مرت گبالنا شايلة طفلتها ؛ الطفلة مكسورة ايدها
انتبهتلي فاجت للميز وگفت يم راسي و گالت ـ خجلانة منچ اعتذر لو اشكرچ لان ما رفعتي دعوى جداً آسفة
ابتسمتلها و جاوبتها ـ عادي ما صار شي الما يقدر ظروف الناس ما لازم يطلب من الرب يباوعله لمن يوگع بظرف صعب ، انتِ أُم مقدرة ظرفچ
من خلص الدوام گعدت برا بالحديقة
باوعت لچويتي و رجعت غطيتها
بالي راح يم حچي دكتورة أمل و صديقاتها بالگروب امس بالليل ؛ غريب كلش المهدي هو الامام المنتظر المخلص ليش تگول نكون من انصاره هذا اعظم بشر شنو احنا و نكون من أنصاره !
مو لازم انصار الي مثله ناس امورهم مضبوطة و ما يغلطون ؟ هي امورها ماشية اني شلون ! الباقيين شلون !
سمعت السيد گال ـ يلا نرجع
فزيت من شفته و الله نسيته ؛ اني هنا منتظرة مؤمن كلش راح عن بالي
يلا بالله الي تنسى رجلها مال تنصر صاحب الزمان
ركبت وياه شغل سيارته و التفت علية سألني ـ ايدچ شلونها ؟ شو خل اشوفها
لزم ايدي و اني كشفت عنها ، نئنئ و حرك السيارة اخذله شوية يلا گال ـ هاي تغسليها بمغذي ، عدكم مغذي بالبيت؟
أنت تقرأ
في ظِلال نعمٍ سابغات
General Fictionاني لگيت روحي يا حوراء بظِلال نعم سابغات الي يكون بالظل متنعم يحب يرجع تحت الشمس التحرگ حرگ؟ المستقرين في مرضاة الله تراضيهم تراضي ربك مو بس هم عايشين بطمأنينة لا يفيضون على عاشقهم بهاي الطمأنينة شلون افارگهم
