صديقاتي بسمه وهبه ظلو يباوعولي انه سويت روحي عادي
وصلت للبيت ورحت ع غرفتي ونمت وتذكرت ايام الظابط رائد الي هو اول حب واول دكه قلب بحياتي
جنت بصف رابع اعدادي انه وصديقاتي جنه بحله المدارس نرجع سوى انه جنت احلى وحده بيهم طويله وجسمي حلو وعيوني كبار عسلي فاتح وبشرتي سمره بس سماري ع حنطي وشعري طويل دائما اسويه ضفيره دائما العين عليه
صح جنه نشاقه ونضحك بس باداب واحترام لان الشارع يختلف عن المدرسه ونخاف من اهلنه وسمعة اهلنه نحسبلها حساب
جنه برجعنا من الدوام نتعدا ع بيت محد ساكن بيه اهله مسافرين خارج العراق
فد يوم برجعتنا وكل العاده تعدينا ع البيت شفنا عمال بيه واكو شاب واكف بالباب عمره بنهاية العشرينات ظلينه صافين اربعتنا عليه ع جماله ونزاكته وطوله وهيبته بحيث انتبه علينه احنه صافنين عليه اجت عينه بعيني احساس وشعور غريب اول مره احس بيه يمكن لان بهذا العمر تبدي مرحله المراهقه وان البنيه تحس نفسها لازم تحب وتنحب مثل المسلسلات المدبلجه الي جانت تطلع بوكتها كوادلوبي وسلستي وغيرها
ثاني يوم الصبح كلمن تروح بحدها لان بيوتنا متفرقه اجتمعنا بالمدرسه اول سالفه حجينا بيها هو ذاك الشاب وشلون حلو ومرتب ومن هلحجي وكلمن تكول الي انه حبيته وطبعا بالضحك
من رجعنا من الدوام هم تعدينا ع البيت وشفنا نفس المكان وهم ظلينه نباوع عليه وجان لابس هلمره نظارات شمسيه يعني صاير لايقاوم واحنه نتحسر بداخلنه
ثاني يوم الصبح رايحه للدوام شفته واكف بالباب والعمال يشتغلون بالبيت بس حسيت ماشال عينه من عليه وراد يجي يمي انه راسا مشيت حيل لان خفت وكلبي يظل يدك قوي من الخوف واكو احد صاح عليه ورجع وظليت الوم بروحي ليش هيج اتصرفنا هسه اذا امي سمعت او جوارينا شافوني شيكولون
رحت للمدرسه وحجيت لصديقاتي وكلتلهم انه بعد ما امشي بهذا الفرع لان احنه زودناها وعيب احنه بنات هسه شيكول علينه ومحاضره شطولها
بسمه ... يابه شدعوه انتي يتهيالج اصلا هو عينه عليه
هبه .. ههههه لا حبيبتي عينه علي انه
نور ساكته ما تحجي كلتلهم بكيفكم بعد انه هذاك الفرع بعد ماارجع منه
حسيت بيه ان هو لا انعجب بيه ولا سي بس انه بهليومين بالغت ورحت لعالم ثاني من الخيال
بحلتنا من المدرسه نور كالت انه اجي وياج لايشوفوني خواني وشفكني غير يبطلوني من المدرسه
هبه وبسمه راحن وحدهن
جنت الليل كله افكر بيه ومقهوه بداخلي واتمنى يطلع يحبني الي ويزوجني بس ابد ولا جنت امشي بالفرع الي بيه بيتهم
ورا كم يوم كاعدين بالفرصه نسولف حجت بسمه
بسمة.. ولج زينب الشاب الحلو طلع مزوج وعنده جهال وطلع ضابط اسمه رائد ولج ميته قهر وانه بانيه امال عيه طلع مزوج
انه بوكتها واحد وطكني بوري ع راسي بس سويت نفسي عادي مامهتمه
وظلينه نسولف ونحجي بالموضوع ونضحك
بالحله بعد اتفقنا نرجع سوى مادام طلع مزوج ليش نروح ع غير طريق يصر بعيد علينه
باوعت ع الباب ماكو ردت اشوفه بس والبنات هم ظلو يباوعن وضحكنا ع ارواحنا
