بسرعه خليت الورقه بجيب الجاكت الي جنت لابسته وام سيف ما نتبهت
بس انه بذيج اللحضات قطره دم ما بجسمي من الخوف والتوتر
خلو الاكل ع الميز جان قوزي ، ما اذكر يمته اخر سنه اكلنا قوزي اكيد قبل الحصار جنا اللحم ناكله بس بمحرم ايام عاشوراء
بس مع ذلك ما اشتهيت اكل من الخوف والموقف الي صار لا وكاعده وياه بنفس الميز موقف كلش صعب عليه شويه وكمت غسلت كلتلي ام سيف شبسع حبيبتي ماكلتي شي كلتلها ما اشتهي انه راح انتضرج بالصاله
توترت كلش وردت بس اعرف شنو بلورقه مكتوب بس اخاف اطلها لا تشوفني ام سيف
طلعتها وجاي افتحها ورجعتها بجيبي
شويه واجت ام سيف كالت يله نصعد نكمل وصعدنا
ها ام سيف شنو هسه اصبغلج
ام سيف .. بلي عمري صبغيلي
جابت مواد الصبخ وكلتلها خلي نكعد يم الحمام لا تتلف الغرفه
خليت الاماده ع شعرها وكلتلها نص ساعه اغسل شعرج
ام سيف .. ورا الصبغ اريدج تسشوريلي شعري وتحطيلي مكياج..
صار تددلين
ام سيف.. اريدج تطلعيني فد شي تعرفين رايحه لعيالي واريد احرك قلوبهم ..
ههه ليش
ام سيف .. مو اني راح اشيل وارجع لبغداد وهمه ماموافقين وبالاخص عمتي عارضت بشده بس اني انتصرت عليها
وزوجات اخوان رائد كلهم يغارون مني ومن جمالي وشلون رائد يحبني ومدللني وشو الي اريده يسوي اليه وشلون اني كدرت اسحب رائد من اهله واكدر اعيش ووحدي .. امه لرائد جانت فارضه سيطرتها ع البيت هي الكل بالكل وكلهم جناينها يخافون منها ومحد يكدر يعارضها اله اني جنت بهواي امور اعارضها منو هي وتفرض عليه هذي حياتي خاصه بيه مو من حق احد يتحكم بيها كوى خلصت من اهلي انوبه هي تطلعلي...
يعني انتو باجر راح تشيلون لبغداد وما تجون للبصره بعد
ام سيف .. اي دادا الله ليرجعنا للبصره بعد وحته رائد نقل دوامه هناك...
اتفاجأت من كلامها معقوله يروحون هناك لعد والي جاي يسوي وياي شنو..
ام سيف .. اي خلي اكملج من اجيت كعدت بالبصره
اي كولي
ام سيف .. اجيت لبيت رائد اني شايفه بيتهم قبل لان جايتهم كم مره جبير وحلو واثاثه حلو بس ما يوصل لبيت اهلي
جانو مسويلي مشتمل صغير غرفه وصاله صغيره وحمام بالطابق الثاني وجانو عدهم جاين اثنين بالبيت وهمالتين كل وحده الها نفس الترتيب غرفه وصاله وحمام
محبيتهم لعيالي لان انجبرت اعيش وياهم ولا تاقلمت وياهم اني بيه طبع محلو الشي الي انجبر عليه محبه
المهم مظليت سنه وياهم اله وشلت منهم واجينه كعدنا بهذا بيتنا
وقليل ما اروح لعيالي بس بالمناسبات والاعياد
انه.. يله خلصت النص ساعه خلي اغسل شعرج
غسلت شعرها وكالت خلي اسبح فرد نوب
سبحت وكملت وكعدت اشسور بيه وطلع اللون كلش حلو
زين ام سيف شعجب راح ترجون لبغداد انتي هنا بيت لوحدج مامرتاحة
ام سيف .. محبيت البصره البصره كايبه مبيها روح وجوها حار وملحه ال يكول صحراء صح ناسها فقره وطيبين بس محبيتها بغداد حلوى بيها حياة حدايقها نمشي بالشوارع كلها ورود واشجار وكل بيت بيه اشجار للفواكه شمتشتهين العنب والخوخ والرمان والبرتقال كلش بيها واسواقها تخبل بالاضافه لاهلي وصديقاتي كلشي بيها حلو
اهنايه محد اليه وما نسجنت ولا اختلطت ضليت اضوج لوحدي بالبيت اغلب وقتي ويه الجهال ومكابله التيفي مليت لحد مقنعت رائد نرجع لبغداد وكوه اقتنع لان اهله مقبلو يرجع هناك..
الله كريم تروحن وتوصلون بالسلامه حبيبتي
الله يسلمج عمري
كملتها وخلتيلها مكياج وطلعت حلوى ولو هي بالاصل حلوى
وكفت كبال المرايه وجنت واكفه وراها انه جنت اطول منها بهواي فكلتلي نيالج ع هطول انه ضحكت
انطت فلوس شغلي وجان مبلغ زين
ام سيف .. حبيبتي اشكرج وعاشت ايدج ع هذا الشعل الحلو وفرصه سيعده تعرفت بيها عليج لو بوقت متاخر بس يله واتمنالج التوفيق والقسمه الزينه حبيبتي بس نصيحه كملي دراستج
اي هو ان شاالله السنه الجايه اقدم خارجي واكمل
ونزلت انه وياها جوى وانطتني ماعون بيه اكل الي و كلتلي هذا غداج شلنا الج لان ادري بيج استحيتي ومكليتي شي
كلتلها لا يمعوده صدك جذب كلتلي الله عليج اله تاخذيه
رجعت للبيت لكيت امي واكفتلي بالباب خطيه تنتظرين دخلنا للمطبخ جاي احجي لامي بس دخلو اخواني بالمطبخ
ها زينب هاي شنو بايدج كلتلهم غده
حطو وكلو وكعدت وياهم اكل
خلصنا اكل كلتلها مصار شي
رحت للغرفه جاي ابدل واذكرت الورقه كلت خلي اصعد فوك اقراها بحدي اول وبعدين اكول لامي
صعدت فوك اخواني جوى يدرسون وامي بالمطبخ
فتحت الرساله ......
زينب انه كلشي اعرف عنج وعن اهلج وعن خوالج فديري بالج تسوين اي شي مو بصالحج وانه عندي سلطه كلشي اسوي
راح اسافر باجر ويومين ارجع للبصره اريدج تخابريلي ع هذا الرقم .... الساعه ٤ العصر انتظر اتصال واذا ما تصلتي اجي لبيت اهلج واخذج بالقوى منهم
انه رايدج بالحلال
قريتها وانه بحالة صدمه بس كلمة رايدج بالحلال شوي اطمنت
صعدت امي كلتلي جاي تقرين انطيتها الرساله تقراها كعدت بالكاع
يبووي وين اروح وين اودي وجهي الهي ما عنده غيرك ربي
هي تبجي وانه ابجي واكلها لايسمعون ...
