ظليت عند اهلي شهر تقريبا محد اجه من بيت علي وسال عليه وع البطني انه جنت مرتاحه لان مااريد ارجع بعد عكب الي شفته بس امي جانت حاركه روحها من التفكير وكل شويه وتكلي انه ارجعج
خواني جانو واكفين وياي كلولي ماترجعين لذاك البيت ابد
بس امي جانت تخاف عليهم لان ظلت قصه يبلغون عليهم بالها
وراها باسبوع اجه علي بحده انه ضجت لان ما اريد ارجع اجت عليه امي وقنعتني اكعد وياها واشوفه شيريد
اخواني جانو ماموجودين بالبيت بس انه وامي لان لوموجودين جان ماسكتوله
علي .. زينب انه جاي ارجعج وعفا الله عما سلف...
انه.. لعد والي صار شتسميه من طرتوني بالشارع بالهدوم الي عليه شتسميه
علي.. زينب كتلج عفا الله عما سلف انتي الجبتيها لروحج وتجاوزتي ع امي وخواتي
انه ما غلطت ولا تجاوزت الله شاهد علي ومستعده اتواجه ويه امك انه طالعه من بيت وبت ناس بس انه حجيت كلمة الحق من جنت صاحيه جنت افر البيت فر بدون ما اشكي بس انه حملي والوضع الي جنت بيه وانته تدري بيه هو الي خلاني احجي
علي.. هسه ترجعين لو لا
امي جانت ساكته وبس تخزر بيه انه
امي.. اي عمه ترجع بس بشرط
علي.. اي عمه كولي شنو شرطكم
امي.. تعزللها تبنليها مشتمل زغير بيت اهلك عن المشاكل وترجع وتعذر من امك وخواتك
علي.. لا ماكو هيج حجي تعزل هاي شلج بهل الحجي لو ترجع ويه اهلي لو ماكو
انه.. هذا اخر كلام عندك علي
علي.. اي اخر كلام
لعد ما ارجع
علي ... انتي تعرفين انه منو وشنو الف وحده تتمناني والله بعدين تتندمين وتجين تبوسين بايدي اذا طلعت من بيتكم هسه بعد ما ارجع ولا ارجعج واروح ازوج
انه.. هاي هو براحتك وهذا شرطي وياك
علي .. لعد ظلي عند اهلج وكل حق ما الج وحته ابنج اخذه منج
وطلع بطلعته اجواخواني مصطفى ومرتضى كلوله ها خير ظل يهز بيده وطلع وكلنالهم ع الي صار كالو خلي يولي
ظليت بيت اهلي لحد ما جبت وصار عندي ولد وامي اتصلت عليهم كلتلهم تعالو شوفو ابنكم انه ما قبلت يجون بس امي كالت مايصير حرام علينه هذا ابنهم
اجه علي هو وامه حته بالجذب حظينه ما جايبين للولد ووجوهم ثكيله
اخذ شهاده الولاده حته يسوي جنسيه اله وسميناه حسن
بس ماجابو سيره يرجعوني وترجع الماي لمجاريها ابد اقل من نص ساعة وطلعو
ثاني يوم اجت عمتي كريمه تباركلي وكالت علي خطبوله وحده موضفه وياه وبس يطلكون زينب يزوجها سامعه من الجوارين
انه ماهتميت بالبدايه
بس بعدين ظليت افكر بلسهوله اتخله عني وراح خطب معناها هو هم ما حبني لان لو يحبني جان اتمسك بيه بس هو جان عادي
ورا الاربعينية حسوني اجت عمتي كريمه هي وزوجها وكالت ترا اجو بيت علي وكالو يردون الولد همه يربون ويردون يطلكون زينب بدون غايب وحاضر كلشي مالها لان هي العافت ماله اي حق
مصطفى .. شنو عمي تايهين احنه اكو محاكم ونشتكي
رد زوج عمتي .. عمو انته واخوك بالذات لا تدخلون
مرتضى .. ليش عمي احنه مو اخوانها
عمتي كريمه.. ولك عمه كالو بس يشتكون بالمحكمه نبلغ عن اخوانها همه الهم اتصال بخوالهم
انه وامي بس نجي
كتلهم كلشي ما اريد بس حسوني يخلونه يمي
عمتي كالت والله كلنالهم عن كلشي تتنازل بس الولد خلو يمها ما قبلو كالو احنه نربي ما نخلي خلفتنا عند الغرب
خطيه هي هم جانت تبجي ويانه وتحس بتانيب الضمير لان هي الي ورطتني بس جانت تريد مصلحتي مو مضرتي
كالت باي وقت يجون ياخذون ابنهم وانتي انطوه الهم ولا تعرضون حفاظا ع خوانج والله يعوضج بالاحسن
خواني عصبو ما سكتو كالو شيردون يسون يسون حرام عليهم شنو احنه بتلينه خوالنا بالمعارضه
امس سكتتهم وعيونها ورارمه من البجي يمه هاي هو ابنهم وخلي ياخذوه ومانريد كلشي منهم بس خلي يفكونه من شرهم ساعة السوده الي ورطنه بيهم
