بهذيج اللحظه جانت بدايه حياة جديده الي حياة ثانيه وانه امشي الطريق كله اندعي امي وخواني يوافقون حته الهي نفسي بشي انه احبه
رجعنا للبيت وفاطمة حجت لامي
امي ما قبلت لان انه مطلقه وحجي الناس طابه وطالعه
وتوسلت بيها تقبل وتقنع خواني لان كعدت البيت تمرضني وتفكرين بحسوني وهو بعيد عني ياذيني اكثر
ما اقتنعت واجوي اخواني وكلتلهم ع الموضوع مرتضى عادي ما كال شي لان جان كلش سبورتي ما تحكمه عادات وحجي الناس وهمه اصلا يعرفون بيه وباخلاقي بعكس مصطفى
مصطفى عارض وكلي كعدي بالبيت منين جبتي موضوع الشغل والطبه والطلعه انتي مرة مطلقه
حاولت اختي وياهم ما قبلو اخر شي اجه وسام وخالتي النا حته ياخذون فاطمه ويشوفونه
فاطمه حجت الموضوع لخالتي وخالتي رحبت بيه وقنعت امي واخوي مصطفى واذا ع روحتي ورجعتي فامي واخواني همه يتكفلون بيها
كدرت خالتي تقنعهم وسام همين يله قبلو
قبل وضع العراق جان يختلف عن هسه صح جان اكو عادات وتقاليد بس الناس جانت ع فطرتها وعقولهم نضيفه كلمن ملتهي بضيمه مومثل هسه حته الي تلبس بوشي كالو هاي مو زينه وكذا وكذا
رحت ثاني يوم الصبح انه وامي للصالون وام الصالون رحبت بينه وامي وصتها عليه وحجتلها عن قصتي وهي تاثرت وكلتلها احطها بعيوني ولا يهمج حالها حال ضحاوي بتي
جانت وحدها تشتغل بالصالون ومرات بتها ضحى ساعدها اذا صار عدها شغل هواي ضحى طالبة اعداديه جانت هي وامها كلش حبابات وياي
جنت متحمسه وبسرعه اتعلمت ع الشغل وجانت ام ضحى تحمد دايما بيه واعتمدت عليه بكلشي
وسولفتلي عن وحده جانت تشتغل وياها فاهيه وكوه تشتغل وهواي الزباين يشتكون منها لان ما تشتغل عدل
يمكن لان انه حابه هايه المهنة تعلمتها بسرعه واحسها مثل الهوايه
مرت الايام وانه التهيت بشغلي وجنت فرحانه بيه غيرت من روتين حياتي وتعرفت ع هواي ناس وهواي قصص جانت تهون علي من قصتي صح لو كالو الي يشوف مصيبة غيره تهون عليه مصيبته
جانت امي تجيبني وترجعني ومرات خواني ومرات وحدي لان جان امان محد يكل للثاني انته منو وشنو شعدك
جنت دايما اتعده ع بيت الضابط بروحتي وبرجعتي لان قريب ع الشارع ويمكن بس مرتين او ثلاثه شفت رائد بيها لو جاي من دوامه لو رايح جانت بينه نظرات هاي النظرات ترد الروح بيه وامل بالحياة واظل بس افكر بيها الليل كله ع الرغم انه من اشوفه ادنك وامشي ولا كانما هو موجود
يوم من الايام كالت امي اليوم مسويه ثواب الظهر ادزه بيد اخوانج للصالون
وصلتني للصالون وكلت لام ضحى امي مسويه ثواب لابوي وكييفت المره
صارالظهر واتصلت امي من جوارينه ع الصالون كلتلي يمه الغده جاهز بس انه مابيه حيل اجيبه لان تعبانه واخوانج حالين من المدرسه وتعبانين ما بيهم يجون
يمه والحل شنو كالت تعالي انتي اخذيه
رحت للبيت واخذت الغده وبطلعتي شفت الضابط رائد طالع بسيارته للدوام لان جان لابس ملابس عسكريه انه شفته انخطف لوني اكو فرع كبال بيتهم رحت بيه وبكل سرعتي امشي هو لحكني بسيارته
اوكفي اوكفي احجي وياج
وانه امشي بكل سرعتي وكلبي يدك قوي وظليت ارجف من الخوف والصخونه صعدت للراسي
بوكتها الدنيا ضهر ومحد طالع بالشارع
نزل من سيارته ولزمني من جتفي حيل حجه وياي بعصبيه
رائد.. انه مو جاي احجي وياج ليش ما تريدن
عوفني الله يخليك منا عالم
رائد .. معليج بالعالم انه جاي احجي وياج
احجي شتريد بس عوف ايدي اذيتني
رائد .. اريدج بموضوع مهم
عفيه مو بالشارع لا احد يشوفنا
طلع قلم من جيبه وكتب رقم تلفون بجف ايدي وكلي نص ساعه واتصلي بيه انه العقيد رائد انتضر اتصال مو ماتتصلين
ركب سيارته وشخط
انه نص حيلي نهد اريد اوصل للصالون ما بيه رجلي كوه امشي بيهن
وصلت للصالون تلكتني ام ضحى خيرج زنوبه شبيه وجهج مخطوف
انه ترددت اكلها لا .. كلتلها بس خلي اكعد واشرب ماي ريجي يبس
ماكو شي بس مخبل ركض وراي
وهيه ماتت من الضحك عليه وكالت اكيد هذا مسيعد المخبل
كلتها اي
جاي اغسل ايدي حته نتغده انتبهت ع الرقم كلت ما اتصل بيه ولا احفظه
بس حفظته ع كلبي كلت كلشي يصير بس ما تصل بيه
اتغدينا بس ما اكلت غير خاشوكتين من الهبطه الي صارت بيه
رجعت للبيت والليل كله مانايمه ع الصار شيريد مني بس لاهو من هذول الي يدورون نسوان يكضون وكت ويعوفوهم وانه الصخونه ما فكتني ابد وحته صداع صار عندي
ترددت اكول لاهلي لا ما اكول
انوب عقيد يمه وين اودي روحي كوه خلصت من هذيج القصه وسلمت ع خواني انوب عقيد بالجيش
ياربي حلها من يمكم يا اللاهي وطلعني من هالشده
وين ما اروح الضيم لاحكني
ردتك عون طلعت فرعون هذا هم حظي
وانه بس ابجي جوى البطانيه
ثاني يوم ما رحت للصالون خابرت لام ضحى وكلتلها تعبانه وكالت عادي ارتاحي بس يوم لان عندي شغل
وراها بيوم رحت للصالون
العصر وجان زوجت العقيد رائد تدخل للصالون انه تخربطت احوالي
حجت ويه ام ضحى وكلتلي ام ضحى استلميها
استلمتها وظلت تسولف وياي وكلتلي شايفتج وكلتلها انه جوارينكم كالت صحيح اكول شايفتج وكالت انه ما اختلط
