جنت متوقعه جيتهم النا حته يطمنون عليه و ع صحتي
امي جانت كاعده يمهم بالديوانيه ويسولفون علما اكعد وابدل واتمكيج لان زوجي جاي يشوفني من وصايا امي طبعا
رحت سلمت عليهم وكعدت يمهم
ام علي .. ها عمه شلون صرتي بس كون شبعتي نوم وراحه
انه.. اي والله عمه امي ما مقصره بشي وياي تخاف عليه وع الولد
ام علي .. ها مادام شبعت راحه حظري روحج ولمي ملابسج حته ترجعين لبيت زوجج
اباوع ع علي ساكت ما يحجي بس يبتسم
امي.. شنو ام علي ماصارلها هواي من اجت خليها يمنه بعد اسبوع بلكي تصير زينه ونوديها الكم
ام علي .. لا عيني ميجوز الجنه هلكد تظل عند الاهل الناس شتكول علينه وثاني شي زوجها يريدها
علي .. اي زنوبه مشتاقلج شنو ما شتاقيتلي
علي خلي اكمل اسبوع ع الاقل وتعالو خذوني
ام علي .. لا اله تجين العالم شتكول زعلانه منهم جنتهم وهذا بعد مو بيتج انتي خطار هنا ذاك بيتج
علي .. اي صحيح كلام امي
ردت احجي سكتني امي وخذتني للغرفه
امي .. يله يمه ما اريد مشاكل رجعي لبيتج وزوجج عيب نرجعهم
يمه انه تعبانه ولازم اظل نايمه بالفراش علمود وضع الطفل وهمه يردون يرجوني للكراب
امي .. لا يمه مامعقوله هو الي بطنج هم ابنهم ويخافون عليه وانتي اشتغلي بس شغل خفيف ما يتعبج وهمه يدرون بصحتج يله ماماتي
سمعت كلام امي ولميت ملابسي ورجعت وياهم كعدت يمهم وتعشينا انه هم كمت غسلت ماعين العشه حته بالجذب محد كلي عوفيهم انتي تعبانه وصعدت فوك وعلي جان ينتظرني وسولفنا وحجينا ونمنا
ثاني يوم كعدت الصبح نزلت وكلت لازم اظل جوى ما اصعد وانزل هواي لان موزين علي واشتغل الي اكدر عليه لان ادري بعمتي مال تخليني بس نايمه جذب غير تاكل راسي
نزلت تلكتني يله عجني لان ماعدنا خبز نتريك بيه والبيت مثل ماتشوفين شلون وسخ والحمام متروس هدوم
ظليت صافنه ع حجيها شنو اكيد جاي تشاقه وياي
ام علي .. شبيج صمخه ويامن احجي
عمه تعذريني ما اكدر اخاف ع البطني وعندج بناتج هنه خلي يشتغل
ام علي .. حجي زايد ما اريدا كلنا حبلنا وخلفنا لو بس انتي حبالتج تختلف وجم مره كتلج
ًًً ا
بناتي مالج دعوه بيهم انه جايبتج جنه الي حته تساعديني وتشيلين بيتي موحته نخدمج
انه فرت وكلت كافي اسكت سكتت هواي انفجرت
جنه يعني زوجت ابنج وام جهاله مو معناه خدامه الج ولبناتج وكافي ظلم تظلمين بيه حرام عليج وكلما اكلج ع بناتج كلتيلي خطار هذا بيتهم وبيت ابوهن هسه الخطار هم اله جم يوم ويرجع لبيته وهنه اكل نوم الله واكبررحمي بحالي
هوااااايه حجي حجيت مااذكره وصعدت لغرفتي كبل وقفت الباب علي
صعدو وراي عمتي وحمواتي هدن علي بس انه مافتحت الباب لان خفت يكتلوني
ورا ساعتين اجه علي طلعن مخابرات عليه من الدوام وكايليله هسه تجي تشوف حل لمرتك
صعد فوك ودك الباب فتحت الباب اله وتولاني كتل ويجرني مشعري نزلني الدرج وكلي هسه تبوسين رجل امي وتعتذرين منها ولج منو انتي وترفعين صوتج عليها
كتله ما ابوس ولا اعتذر وهسه ترجعني لاهلي
جانت دنيا ظهر وعيالي كلهم موجودين حته عمي جان جاي يتغده ورجع للاسواق
علي.. لو تسوين الي كتلج عليه ولو اطردج بالشارع بالهدوم الي عليج
وجان يضرب بيه
بوكتها يبست راسي كلش وكتله ما اعتذر
طردوني من البيت الضهر جان بوكته شته وبادره والدنيا تمطر كتلهم بس عبايه حطو ع راسي ما قبلو قالو طلعين بالهدوم الي عليج
طلعت بالشارع ودشداشتي ملخه علي وشعري مكفش من الجر وعيوني حمر وجنت حامل توني داخله بالخامس وروح اسح بروحي سح لبيت عمتي كريمه
دخلت عليهم بهذا حالي وخطيه جانو صابين الغده يتغدون
تلكتني عمتي يمه بنيتي يمه زنوبه شبيج كلتلها عمه هاي القسمه الي كلتيلي تندعيلي وراها
عمه كريمه.. عمه والله ما ادري بيهم مو خوش ناس من زوجتي يله اجتلي مريه جوارينه كلتلي ليش ورطتي بت اخوج بهيج ناس طلعت ام علي عراكه وراعية مشاكل بس بعديش احجي شنو الصار
كلتلها القصه من اول لزواجي لهذا يومي وجانو بيت عمتي كلهم كاعدين زوجها ولدها كالو هسه نروح نهد عليهم ونبلغ عليهم بالمركز
راح زوج عمتي وابنها الجبير ورا نص ساعه اجو
ها عمو بشر شسويت
كال هدو علينا وسكتونا وكال ابو علي بس تبلغ المركز احنه نكتب تقرير ونكول بيه اخوانها مصطفى ومرتضى بحزب الدعوى وعدهم اتصال بخوالهم فسدو الموضوع احسن الكم
انه بس ابجي وعمتي ظلت تدك ع راسها
صار العصر رجعوني لاهلي وحجيت القصه لاهلي امي تخربطت وظلت تبجي وتلوم بروحها لان خافت ع خواني اكثر شي
يتبع...
