هــذا الـبـحــر لـــي
هــذا الـهـــواء الـرطــب لـــي
واســمــي...
وان أخـطــأت لـفــظ اسـمـي
عـلـى الـتـابـوت لي..
امـــا انـا
وقــد امـتـلـئـــت
بــكـل اسـبـــاب الغــيـــاب
فــلـســـت لــــي
انــا لـسـت لــــي
لــســــت لــــي
•••••********************•••••
اخذتني النومة واني بنص ذكرياتي...
كعدت الصبح كالعادة ماكو شي جديد و البنات نايمات
كمت من فراشي لميته وطلعت من الغرفة
رحت اغسل وبعدين رحت للمطبخ سويت ريوگ واتريكت وبعدها بدن البنات يكعدن وحدة ورة اللخ
وتقريبا بعد الضحى دخلت علينا ريحانة!
دخلت وتصرفتها غريبة ووضعها مخربط وهي تكول
ريحانة : يلا بنات كلمن تلم الي تحتاجه عالسريع استعجلن ولا تاخذن اهواي غراض وياجن أخذن بس الأشياء المهمة راح ننتقل الغير مكان متوفر بي كلشي تحتاجوه
تمارة : خير ريحانة شصاير؟!
ريحانة : مو وقت اسئلتج وفضولج تمارة الكل ينفذ الي
گلته وإلا اتخذ غير إجراء راح اطلع نص ساعة وجايتجن
ترف : كل البنات انخبصت وبعد ميعرفن شياخدن وشيعوفن واني مصفصفة وما اعرف شاخذ لان اساسا ماعندي شي مهم بهذا المكان
سارة : ترف شبيج صافنة يلا تحركي وفضيها ترة ماكو وقت
ترف : وشنو يعني؟ شريد اخذ شعندي هنا؟
سارة : اوووو ترف فضيها عاد ماكو وقت كلتلج .. وهي مستعجلة وتلم الي تحتاجه والي يخصها
خلصت النص ساعة فعلا مباشرةً طبت ريحانة!
ريحانة : كملتن؟؟
البنات : اي ماعدنة شي
ريحانة : يلا ع السيارة
ترف : طلعنا من المقر لكينا السيارة المعتادة الي ينقلونا بيها من المقر للملهى وبالعكس
صعدنا اني ومجموعة وسارة بالمجموعة الثانية ما اعرف وين ودوهن بأي سيارة!
تقريبا مشت بينا السيارة نص ساعة أو أكثر شوية ما احس غير!
انفتحت بيبان السيارة طبوا اثنين ملثمين حطوا على خشم كل وحدة كلينسة ومباشرةً غابن عن الوعي
واني اخر شي اتقربلي واحد منهم حاولت اقاومه بس هو جان كُلش جثل وضخم جرني من راسي حط الكلينسة
وبعد ما اعرف شصار ووين اخذونا؟؟ شكد مشت بينا السيارة؟؟ كلشي ما اعرف!
غير كعدت بمكان مثل الشقة جبيرة واني افتح عيوني واغمضهن واني احاول استعيد وعيي واركز اني وين؟
رفعت راسي واني اشوف البنات مثل حالتي ما يدرن الدنيا طشت لو رشت
كمت على حيلي واني بالگوة امشي مسطورة أثر المخدر الي خدرونا بي العارات الله لا ينطيهم
