السلام عليكم
ادري والله ادري اني كلش مقصرة بحقكم وحقكم علية كمتابعين وقراء القصتي .. بس بالتالي كل انسان وظروفه وحياته تحكمه اني اكيد لو فارغة وماعندي لا شغلة ولا عملة جنت كتبت الكم وما خليتكم منتظرين اكثر من سنة .. صح اني من بلشت بالقصة وكتبتها جان المفروض ومن مسؤوليتي اكملها لان اني اتخذت اكتب هاي القصة ولازم اكملها بس شاءت الاقدار ما اكملها وظروفي حكمتني الله يشهد علية اني اعتذر الكل متابع ومتابعة وقارئ وقارئة ضلوا لحد الان منتظرين القصة وما ساؤوا الادب بالتعليقات .. علما اني جنت اقرا التعليقات واشوف البعض خصوصا من البنات يتجاوزن علية بالرغم هن ميعرفني ولا يعرفن ظروفي ولا يعرفن الي مريت بي والي دا امر بي حاليا و بالنهاية هن ديعكسن تربية اهلهن ع العموم الله يسامحهم
نجي هسة .. ليش والسبب الي خلاني انزل الكم بهذا الوقت .. على الرغم اني جنت مقررة على نهاية هاي السنة 2024 انزل الكم تكملة القصة وافاجئكم بس صار موضوع خرب هاي المفاجأة وعرفت بي من خلال متابعاتي انه قصتي انسرقت من بنية مسمية نفسها اساور التميمي و على اساس هي كاتبة القصة وحاليا دا تنسخ بارتاتي وتنشر بيهم وعلى اساس القصة الها وتريد بعد ما تكمل نسخ ولصق بارتاتي بحسابها تكمل القصة من خيالها !!! شلون ومنو سمحلج تتعدين على حقوقي وعلى تعبي وعلى ملكيتي لا وفوك سرقتها مسوية اكاونت انستا وكاتبة بالبايو انه هي كاتبة قصة بين يدين النشهل !!! على العموم راح اتخذ الاجراءات اللازمة بحقها
يا ريت محبيني ومحبين القصة يروحون يبلغون على حساباتها الواتباد والانستا راح اكون ممنونة جدا منكم .. واكو بعد شغلة قريت تعليقات بعض البنات يكتبن اني من طرف الكاتبة بنات لتصدكون ماكو اي احد من طرفي اني اي شي جديد يطرأ بخصوص القصة او بخصوصي اني راح انزله الكم هنا او على حسابي الانستا.
كونوا بخير دائما ෆ
