رونق البحر

ابتسامته ✨

*غيث*

* ومحمد ما گدرت اكمل كلامي من الصدمه هاي منو هاي عيوني شجاي تشوف !!!!*

رونق : ها حبي شنو رأيج بيه !؟
إيلاف: انتي منو!
رونق : أني رونق شبيج ماما. ها طالعه حلوه مو ؟!

* أني ما أريد أبالغ بالوصف ولا أريد ازيد عُقد بلاغيه بسسسس اللي جاي أشوفه مو الكل يگدر يشوفه ما اعرف اكدر أسمي نفسي محظوظ !! بسسسس شلون أنعجب وهي لابسه هيج ؟! شيله سوده وبشت أسود وعبايه متحزمه بالعبايه لافتهه على خصرهه وشايله المرواح على چتفهه ،،حلوه ؟!!
لا تخسي كلمه حلوه كدامهه ضليت فاتح حلگي مثل الأثول وعيوني مرمشت لحظه *

غيث: طالعه تخبلينننن .
رونق: شنو .
إيلاف : احم احم.يي بنيتي حلوه ، يلا لعد أنتي تعبتي حگوم أني اسوي غده واجي اگعدو بالمشراگه هنا .

*وطبت امهه للبيت وضليت أباوع الهه هي رعنه ييي وصلفه أييي وشلنفصص أييي بس حلوه دخيل الله شسوي شلون احجي وياها ؟!! *

رونق : شكو بوجهي شبيك صافن عليه .
غيث : وليش اصفن عليج إسم الله .
رونق : يمكن لأن اني طالعه اخبل! هممم .
غيث : لا محلوه چوء .
رونق : لالا الله عليك غيث ملايگتلي الشيله مو أحله من الحجاب العادي .

*جابت فرشه وخلتهه بصف الكرسي الگاعد عليه اني وگعدت عليه تباوع للحديقه وتسولف ويايه هي اجتماعيه مو مثلي أني سألتني شلون طالعه ،واخ يا لساني شلون گدر يجذب هاي شبيه اني ليش جاي اشوفهه حلوه هيج *

رونق : لتجاوب ضل صافن .
غيث : تدرين شنو بعد ناقص وتكملين ؟!
رونق : شنو !؟
غيث : تخلين ديرم بشفايفج وو تدگين بحنچچ خط ونجمتين .
رونق : دقيقه مفهمت شنو ديرم وشلون ادگ شدگ مفهمت ؟!
غيث : ولج شلنفص انطيني مجال الغي ، باعي خويه الديرم هذا لحاء مال أشجار خاصه ف يخلوهه النساوين لحلوگهم تصير ملونه وحلوه متفحه هيج .

رونق : هاااااا هسه هاي فهمتهه داده بس دگ الحنچ شنو .
غيث:هااا أفهمنج انه هسه ، هاي نسوان گبل تعرفيهن المعدلات !!؟.
رونق: لا ما اعرفهن .
غيث: چا انجبي وسمعي ،هاي حبوبتي أم أمي جانت داگه على جسمهه وحنچهه وگصتهه .

رونق : يااااا يعني تاتو تقصد مو على الجسم .
غيث : يي حجيه يشبه التاتو.
رونق : كمل كمل شلون دگت منو سوالها.
غيث : جان اكو فرق نسوان وبنات ورجولتهن وياهن يفترن ، من يصير عرس لو طهور لو مناسبه يدزون عليهن يغنن ويرگصن هنه وچوالاتهن بس الشي المميز بيهن جانن يعرفن بالطب العربي القديم اعشاب ما اعشاب هيج سوالف ويعرفن يدگن عدهن أبر وماده عشبيه مخدره يستخدمنهه قبل الدگ.

رونق : هااااا شيصيحولهن بالله .
غيث : كيولي*.
رونق : عزززه همه ذولي! لعد حبابين ليش مطلعين عليهم سمعه شوف حته يداون المريض .
غيث : أيي رقاصات حبابات كلش خوش ناس .
رونق : أيي أيي.يعني شنو طالعه اشبه بيبيتك ؟! دقيقه بس أشوف النسوان هذني اخليهن يدگلي حنچي .
غيث : باع هاي لج خويه بعد ماكو انقرضن .
رونق : يااا حرامات زين والديرم هم انقرض .
غيث : لا موجود .
إيلاف : يااا ديرم رونق شمعرفج بي !!
غيث : هاي اني يوم جاي اسولفلهه على اهلنه گبل .چا انتي ما مستخدمه ديرم !؟