في ليلة ١٤ بدر نوره مكتمل ' وفي خلا الناس ماهو كاره ' على كثر اللي بحياته من اهل وربع واخوان الا انه يقدس جلسته مع نفسه ' وينتمي لها كثير ' دايم بكل ايامه بعد ما تنتهي الشوارع من الازعاج وبعد ما البيوت تتقفل ابوابها يبدا يومه وتبدا شخصيته '
——— بطلنا ———
-بهاج ابن محمد
-٢٨سنه
-بنعرف شخصيته اكثر مع البارتات-
>>><<<<>>>>><<<<<>>>>
الساعه ٧ المغرب بتحديد بخيمة مطلق -
مجتمعين على الضو وحولهم براد شاهي واكيد جلستهم ما تخلا من البلوت وازعاجها '
وليد : ياعيال يبي لنا سفره سنعه نضبط لها
مطلق : وين نسافر ونخلي الديره
وليد : ما قلت نخليها قلت نروح نغير جو ننبسط
خالد : تراها مب شينه يا عيال فكرو فيها شوي
مطلق : اقول على شحمه انت وياه وخلونا نلعب
وليد ؛ وين نلعب شايف عددنا كم هذي حتى كوره ما تكفي عددها
مطلق : ياكثر هرجك على غير سنع
خالد : صدق وين باقي العيال غريبه ما جو
مطلق : ماردهم بيجون وين بيروحون يعني
تم الصمت بينهم وكل واحد جلس على جواله
بعد دقايق سمعو صوت سيارات توقف برا ظن ببالهم ان اخوياهم جو ' بس للاسف ظنهم خاب "
دخلو مجموعة رجال ملثمين وواضح جيتهم ماهي يم الخير ابد '
مطلق : اخوك ياصبي وش العلم
: خيمة همام محمد ؟
وليد : وش تبي به
: عن الحكي الزايد وعطونا العلم هاذي خيمته ولا لا
مطلق رفع حاجبه : لا ماهي خيمته ولاهو موجود
: شف علي بالحرام ان كانك تكذب علي ما راح تشوف خير مني
مطلق تقدم صوبه : وش بتسوي يعني ؟
خالد : ياعيال تعوذو من ابليس ما توصل
: ان ما تبونها توصل لكذا عطوني مكان هالكلب
:""""""""""""
: من الكلب اللي تقصده ؟
لفو على راعي الصوت وزاد القلق بوجيه اخوياه
: من انت بعد ؟
بهاج : ودك تعرفني معرفه حلوه ولا تمسح بك الارض ؟
مطلق : تعوذ من ابليس يابهاج ما يستاهل ترا
بهاج : دامه ما يستاهل خل يعطيني عرض اكتافه
: طالع بس خذوها مني لي رجعه ثانيه والرجعه ماهي عاجبه الجميع الا اذا الشخص المقصود وراني وجهه بينكم
تم الصمت بينهم وطلعو الشباب وبقو العيال يناظرون بعض بحيره وقلق وكيف بيقولون له ان المقصود اخوه !
بهاج : اقعدو وعلموني وش صار من البدايه
قعدو وكل واحد واضح على وجهه التوتر !
قطع الصمت مطلق : وش تبي بهم عيال مهبل مايدرون عنهم اهلهم ووقتهم كله بشوارع
بهاج : وش يبون جايين عندنا هنا طيب
وليد : ياكثر تحقيقك يا بهاج خلاص قلنا لك عيال شوارع جايين يدورون مشاكل بتعطيهم اهميه ؟؟
ناظرهم بهاج وقطع السالفه وسكر عليها : وين باقي العيال ؟
خالد : الا بسالك اخوك هالتيس ورا ما تقوله يخمد بدري تراه يقروشني الصبح وانا رجال مستعجل
بهاج : وش عنده المستعجل ترا جامعتك وجامعته وحده مستعجل على وش ؟ ان تاخرت تاخر هو بعد
خالد : وانت عاجبك الوضع كذا دايم متاخرين ؟
بهاج : خلاص الله يسد نفسك
مطلق : دقو على العيال خلوهم يجون كلهم يجون
وليد : ليه ؟ بضحكه : بيجتمع القائد ؟
مطلق : ياحبك للهذره صدق وياليتها على سنع
المهم دقو عليهم خلوهم يجون ضروري
بهاج : وش علمك انت ؟
مطلق : ياخي انا ما اخاوي الا اللي يهذرون على غير سنع صدق قلت لكم دقو عليهم خلهم يجون وخلاص
قام مطلق وطلع برا الخيمه
بهاج : شفيه ذا
خالد : وراه شيء صدقوني وشيء كايد
بهاج رفع حاجبه بتعجب من الوضع وهو مو مرتاح من اول ما شاف الشباب اللي متلثمين
>>>>>><<<<<<<>>>>>>><<<<>>>>>
الساعه ٩ ونص الليل
بوسط المطبخ وبحوسة المواعين والطبخ موجوده
الجده نشميه : يانغم هالقلب وينس ابطيتي علي
نغم بابتسامه تتوسط شفايفها من صوت جدتها اللي تعشقه وتدعي دايم ان هالصوت ما ينقطع
نغم : لبيه ياجده ثواني وانا عندتس
وصحيح بعد ثواني اجتمعت مع جدتها بالمجلس الصغير اللي يتوسط الحوش واللي ترتاح فيه وتحبه حيل
نشميه : اقول يامس ما ودتس تزورين اميمتس
نغم بشهقه : افا يا جديده طفشتي مني ؟
نشميه بضحكه : انا اطفش منس ؟ ان كان طفشت منس فا مالي بهالدنيا عمر
نغم وهي تبوس راس نشميه : بسم الله عليس والله يطول بعمرس ان شاءالله
نشميه : الا صدق ما ودتس تزورين اميمتس ؟ ترا لها حق بالجيه وبصلة الرحم يامس
نغم بضيق : بس ياجديده انتي تدرين انها مشغوله مع زوجها وعيالها واحس اذا جيتها ما راح يكون مكاني مبين وسطهم
نشميه : مثل ماهم عيالها انتي بنتها بعد ولس حق فيها مثل مالهم حق
نغم : لا تضايقين عمرس ياجده وامي انا بكل اسبوع اتصال عليها واشوف اخبارها
نشميه بعصبيه خفيفه : الاتصال وش يفيد يامس ؟
الا روحي لها برجليس وخليها تشوفس وتشوف كيف كبرتي وكيف صرتي
نغم : حاضر ياجديده ما طلبتي شيء من عيوني بس انتي ريحي نفسس وتبشرين باللي يرضيس
نشميه : اي يامس هالكلام اذاني ودها تسمعه من زمان ' بس شوفيني ان كانس تسكتيني بهالكلام ترا بزعل عليس وانتي عارفه زعلي كيف مايحتاج اقولس
نغم : الا بالله اعرفه واشهد به كل شيء الا وزعلس
كملو عشاهم بكل حب وسوالف وضحك وسعادة غيم بجدتها عميقه ولا تنوصف ' تحبها وتشوف الدنيا فيها وتعتبرها امها الصدقيه بحق انها مربيتها ومكبرتها وتعتبر عايشه معها سنينها كلها ' بعيد عن امها اللي حملت فيها تسع شهور اشد البعد ' تشوف الدنياااا فيها وتعبها يتعبها وضيقتها تضايقها وسعادتها تسعدها ' بخص انها ما عاشت شعور حب وحنان واهتمام الاب ! بس شافته بجدتها خلتها تنسى وجود الاب ' صارت لها الاب والام والاخت والاخ والسند ' امتنانها لجدتها عميق ومحد يقدر يوصفه ولو بذره
———بطلتنا———
-نغم بنت عبدالله
-٢٢سنه
-بنتعرف على شخصيتها بالبارتات-
>>>>>>>><<<<<<<<>>>>>>>><<<<<<<<<
نرجع لخيمة مطلق -
اجتمع الكل على الساعه ١١ مساء بوسط الخيمه حول الضو مجتمعين وكل واحد يناظر الثاني بفراغ وينتظر شيء ينقال عشان يختفي هالصمت اللي موتر الجميع
مطلق تنحنح : شوفو ياعيال انا جمعتكم عشان اقولكم ان هالمكان بيتغير
ناظرو بعض بصدمه وكل واحد قام يعترض ويتكلم
مطلق بصوت عالي : انتو مو فاهمين شيء ' هالمكان بيتغير لان عيال الشوارع كثار فيه ' وانا ماني مستعد احط عزبتي واغراضي وخيمتي بوسط هالحوسه
بهاج : كان عاجبك هالمكان وزود وكنت تدري انه بعيد عن عيال حارتنا وش غير رايك الحين ؟
مطلق : وليلحين عاجبني بس الواحد ما يهمل نفسه واشياءه وهو قاصد ' وخصوصً انت يا بهاج راع اخوك وانتبه له هالشارع ما ينقعد فيه
بهاج ناظر اخوه ورجع نظره لمطلق برفعة حاجب : وش تقصد يا مطلق ؟ انت مخبي علي شيء ؟
مطلق سكت ونزل عيونه
همام : ياعيال لا تخرشوني شوضعكم انتو
بهاج : مطلق ان ما تكلمت حطيت وجهك بهالضو اخلص احك ترا دمي تجمد
مطلق بصوت عالي : انتو فيكم بلاء ؟ يعني اذا عشانا بنغير مكانا لزوم يكون فيه شيء ؟
بهاج : ليه حددت على همام بذات ؟
مطلق : اخوك شيء اكيد بوصيك عليه من عيال الحرام وعيال الشوارع
بهاج سكت يوم حس ان كلام مطلق مقنع بنسبه له ' بس لا زال شعور القلق مخاويه
جبر : نهاية المارود وش قراركم
مطلق : انا اصلاً قد دورت مكان وحصلته وجيت عشان اقولكم ننقل العفش كله ' والحين
خالد : انت صاحي تبي تخلينا نشل عفش خيمه كامله وهاذا غير الخيام اللي برا حقت الحمام والمطبخ بهالوقت ؟
مطلق : ليه وش وراك ياحظي ؟ دايم ما تطلع من هالخيمة الا يوم يطلع الشروق وش معنى هاليوم
يوسف : هاليوم برد بزود ياخوك بنتجمد ترا الشغل كثير
بوسط معمعة السوالف والازعاج ونقاش النقل والحوسه عيونه كانت مركزه على اخوه وعلى حركاته وسطهم
همام لاحظ نظرات اخوه وظل يناظره بصمت وطلع جواله وارسله
همام ؛( شفيك ؟ )
بهاج : ( اطلع لي برا ثواني واجيك )
همام ناظر اخوه بتعجب وقام طلع
ثواني ويلحقه بهاج
يوسف : شفيهم ذولا طلعو بصمت
خالد : تحس وراهم شيء
جبر : شعليكم فيهم اخوان ويتصرفون ياحبكم للهذره
مطلق : ماشاءالله مسوي طالع نفسك منها ؟ تراك نفسهم تحب الهذره
ضحكو بصوت عالي وظلو يسولفون ويتناقشون عن النقل
راحو يمشون على رجليهم بشوارع وكل واحد ساج عن الثاني ويمشي على عماه
بهاج قام من سجته وحط يده على كتف همام
بهاج : تدري ابوي قبل يتوفى بثواني اخر شيء وش قال ؟
همام بابتسامة صفرا ناظر اخوه
بهاج : قال ترا اخوك برقبتك
غمض عيونه همام وهو يبلع غصته من طاري ابوه
بهاج : صرت احسك ولدي مانت اخو لي
ناظره همام بتعجب : بهاج انت فيك شيء صح ؟
بهاج ناظره وهو ساكت
همام : ادري ان هموم الدنياااا كلها فوق ظهرك ' وادري إنك ضايق من داخل بس ما تبين ' وادري إنك مضغوط ضغط يشيب الراس بس ما تبين ' لا انت اللي مخليني اشيل عنك هالحمل ولا انت مخليني احمل ضيقتك بصدري
بهاج ابتسم من كلام اخوه وشد يده على كتف اخوه
بهاج : صدرك ما ابيه يحمل ولا ذرة وجع ' وظهرك ما ابيه يحمل غير ظهري ويكون سند لي' لا تصدع راسك بهالحكي ' اهم شيء عندي انك ما تضيق ولا تشيل نفسك شيء يرهقه
همام : واخلي الهم والضيقه لك ؟ واحط عندي الراحه والسعاده ؟ اجل انا ما اعتبر اخوك ولا سندك
بهاج : اششش انت سندي وظهري ' وانت اخوي وولدي '
تم الصمت بينهم لدقايق
همام : امي
رفع حاجبه بهاج بضيق وهو يحاول يكتم غيضه
همام : امي كلمتني امس ' تقول انها تبي تشوفني
بهاج : ووش المناسبه ؟
همام رفع كتفه بعدم فهم
بهاج : ووش رديت عليها
همام : قلت لها بشوف بهاج وارد لك خبر
بهاج : وقالت كلامها كالعاده صح
همام هز راسه بضيق
بهاج تافف من حركات امه اللي عمرها ما تغيرت
همام : ماعلينا لا تضيق على نفسك الحين خلنا نرجع للعيال الحين
بهاج : لا لا خلنا نروح للبيت عشان تنام وراك جامعه بكره ! وعشان خويلد ما يقروشنا كل صبح
هز راسه همام وراحو مشيء للبيت وتركو سيارتهم عند الخيمه
>>>>>>><<<<<<<<>>>>>>><<<<<<<
بغرفتها تهز رجلها بعصبيه كبيره ' وواضح على وجهها اللي شوي وتنفجر ' لفت على فتحت الباب وهي تحاول تكتم عصبيتها قد ما تقدر
ناصر : مزن ؟ شفيك مانتي على بعضك ؟ احد مزعلك
مزن برفعة حاجب : انت تدري ان بهاج واخوه ماخذين لهم بيت ؟
ناصر بنظرات وهقه وهو يتنحنح : احم اي ادري
مزن : ومخبي علي ؟ وساكت ؟ ليه ما قلت لي ؟ ومن متى تدري؟ اخلص تكلم
ناصر وهو يسكر باب الغرفه : قصري صوتك لحد يسمعك ! صاحيه انتي شايفه الساعه كم العيال لا يقومون بكره وراهم دوام !
مزن : ماعلي من احد ! علي فيك انت ليه ما قلت من اول ومن متى تدري
ناصر : داري لي يومين بس ' وكنت بقولك بس مالقيت فرصه اعلمك فيها ' وادري اذا قلت لك بتكبرين السالفه
مزن : يعني داري بكل شيء ليه ساكت طول هاليومين ومخليني ساجه مادري عن العالم
ناصر : طيب يالله الحين عرفتي وش استفدتي ؟
مزن : ليه ما قلت لي اول ما عرفت عشان اعرف اتصرف !
ناصر : وش بتسوين عيال شنبهم خاط وجيهم وكتوفهم يوقف على حيلها الجبل ! بتوقفينهم ؟ بتسدينها بوجيهم ؟ تتوقعين بيعطونك وجه ؟ بيلفون عليك ؟ بيسمعون لك ؟ صدقيني احلامك بعيده عن هالاشياء تتحقق
مزن وهي تحس نفسها بتنفجر من الكلام اللي تسمعه ' للاسف ما يمديها تنكر وتقول لا لان كل اللي قاله متاكده منه !
مزن : بس انا امهم ! مالهم غنى عني بدنيا
ناصر بصوت عالي : امهم وش خذو منها ؟ خذو حنانها حبها اهتمامها ؟ كل هاذا انتي تدرين انهم ما حسو فيه ' والحين جايه بكل عين تقولين انا امهم ' مافيه امي كذا ! طلع بعصبيه وهو يسكر الباب بقوه ، والام اللي انهارت بكي ودموعها ما وقفت وكل مالها تنهار اكثر ! هي بيدها سوت كل هالاشياء بس الشيء الوحيد انها ما تقدر تعترف فيه مهما كان الوضع ' مستحيل تطلع نفسها الغلط حتى لو الغلط راكبها
-أتمنى البدايه تنال على أعجابكم "
-أعذروني اذا حصلتو اخطاء بالاملاء او اذا قصرت في شيء "
~دمٌتم بود~
