نزلت وهي تتوجه لطاولة الاكل اللي مجتمعين فيها كل اهل البيت ' راحت تجلس جنب شروق وهي مبتسمه من شافت زول جدتها وهي تاكل ومرتاحه
وضحى : عساتس ارتحتي بغرفتس يانغم
نغم بابتسامه: اي الحمدالله
وضحى بابتسامه وهي تكمل فطورها بس رفعت راسها وهي تشوف غزيل ومشعاء نازلين متاخر ' راحو يجلسون على الطاوله وهم يخزون نغم بنظرات غضب بعد اللي قالوه لهم بناتهم عن الموقف اللي صار امس
غزيل وهي تاشر لمشعاء بعيونها انها تبدا خطتها
مشعاء بصوت عالي : اقول وضحى مو كإن امس ناقصه شيء
وضحى بتنهيده من حركات مشعاء اللي ما تخلص
حصه : امس كامل الحمدالله وانبسطنا واهم شيء نغم انبسطت
مشعاء : اكيد بتنبسط وبتفرح دام امس كل شيءٍ غالي جبتوه
وضحى : صلو عالنبي وخلونا نفطر زين
مشعاء لوضحى : بسوي لبناتي وبنت غزيل عزيمه اليوم وبعزم كل صديقاتي وقريباتي
حصه : وش المناسبه
مشعاء : كذا ابيهم ينبسطون ' ولا الفرحه لناس وناس
وضحى : محد قال شيءٍ وسوي عزيمه للي تبين بس مب اليوم عاد
غزيل : وليه مب اليوم وش فيه هاليوم
وضحى : هاليوم سالم عازم رجال عنده ومحنا فاضين
مشعاء : ليه بتروحين تقهوين الرجال ؟
وضحى بغضب : احترمي نفسك هاذي جزاتي ابيك تسوين عزيمتك بيوم الكل فاضي فيه
مشعاء بضحكه : وليه انتي حاسبه نفسك بالجمعه ؟ حبيبتي هالجمعه مو اي شخص يدخلها
نظراتها تحولت لنغم : وخصوصً اللي ما يحترمون نفسهم
نغم لفت على كلامها وهي ترد عليها بهدوء : مين تقصدين
غزيل : ماشاءالله طلعت فطينه وتلقطها عالطاير
مشعاء : سبحان الله عارفه نفسها بدون ما اتعب نفسي
نشميه : مشعاء ثمني كلامس وكملي فطورس بخير
غزيل : الا نشميه بسالس فستان حفيدتس اللي امس واضح غالي من وين
نشميه وهي تستغفر وتمسك نفسها
مشعاء : اكيد سارقينه
نغم بفزه وهي تلف عليهم وبغضب : ما سرقت شيي انا والفستان جاني هديه
مشعاء : مين اللي بيجيب لك فستان غالي هالكثر
شروق بغضب : يحق لها تلبس اللي اغلى منه بعد
غزيل : والله وطلع لك لسان ياشروق وصرتي تردين
نغم وهي بتروح فوق
وضحى وهي تقوم بسرعه وتمسك نغم : والله ما تروحين وترجعين تكملين فطورك
نغم بهدوء وبعبره : شبعت ياعمه
وضحى بلطف : ماكليتي شيء وين تشبعين
مشعاء : خليها تروح معليك بترجع تسرق اكل هاذا اذا ما تمادت وسرقت فلوس
نغم وهي تمسك نفسها انها ما تطلع ضعفها عندهم وهي تروح تركض بغرفتها
وضحى وهي تلف على مشعاء : ياختي انتي ما تستحين على وجهك ؟ ما تحترمين عمرك ؟ خلاص ياختي طفشتينا ترا
مشعاء وهي تقوم وتتقدم لوضحى : هالمره سرقت فستان ثاني مره الله اعلم وش تسرق
نشميه وهي تقوم بغضب : حفيدتي ما سرقت شيء بنتي شروق هي اللي عطتها الفستان وهم خوات
مشعاء : صارو خوات الحين ؟ وينهم عن بعض كل هالسنين ما صارو خوات الا الحين
وضحى : تتحركين الحين وتروحين لغرفتك لا يوصل كل هالكلام لسالم
مشعاء بضحكه : يعني بتخوفيني بزوجك ؟ ترا ما يقدر يسوي شيء هدي
شروق : ابوي يقدر يطردك ويطرد بناتك من البيت بكبره ويخليك بالشارع ولا يدري عنك
مشعاء : الله والبيت عاد حبيبتي ترا هالبيت كان بيت زوجي الله يرحمه بس قبل يموت سجله باسم ابوك اللي مفتخره فيه
شروق: قلتيها زوجك مات وراح وسجل البيت باسم ابوي شاده حيلك فيه على وش
مشعاء وهي تحس انها ما تقدر ترد اكثر كان ببالها تنرفزهم وخصوصً نغم بس وصل الموضوع للبيت وربطت يدها ' تركتهم وهي تروح لغرفتها بكل غضب وحقدها يكثر ويكثر لنغم ' ماتدري ليه اذا شافتها تتنرفز تعصب تحقد ' بس اللي تعرفه انها ما تقعد بهالبيت اكثر
<<<<<<<<<<<<<<>>>>>>>>>>>>
" الساعه ست المغرب "
طلع من بيته وهو يتجه لسيارته ' بعد طلب سالم له وبعد الموقف اللي صار وهو قالب كلياً ' مايدري ليه رد على اتصاله ومايدري ليه هو رايح لبيته برجوله ' بس بعد ما فكر تفكير عميق وطويل قرر يروح وهو يبي يشوف وش بيغير بحياته اذا تزوج ' ما يبي يقول لاحد الا اذا تم الموضوع رسمي واذا حس انه مرتاح ومستعد يواجه حياته مع شخص مشترك بكل شيء فيه ' بنص الطريق وهو يهوجس عنها ' ما غاب زولها عن باله ولو لحظه ' اذا جاء ينام ينعاد الموقف كامل عنده ' اذا اشتغل اذا قعد لحاله بكل حاله الموقف بباله وينعاد عليه دايم ' وده يرجع الموقف ويعيد النظر ويتعمق اكثر واكثر ' دخلت قلبه من غير ما يدري ' مايدري هل هو اعجاب او نزوه بتمر او حب صدق '
<<<<<<<<<<<<<<>>>>>>>>>>>>
قاعد بالمجلس ينتظر حضوره ومتوتر من رده على طلبه وهل بيرده او بيفزع له ' قام وهو يشوفه يدخل ويسلم عليه '
سالم : اقلط يابهاج اقلط
بهاج وهو يجلس وهو يحس انه استعجل بالجيه
سالم : علومك ياولدي
بهاج : علومي تسرك يابو عيد علومك انت
سالم : علومي انتظرها منك
بهاج وهو يتنحنح
سالم : انا قلتها لك من قبل واقولها الحين ' ما ودي اربطك فيني او اعلقك ' بس صدقني البنت ذهبه ' بتداريك وتهتم فيك ' بتكون لك الام والاخت والزوجه
وانا تراني معطيك اكثر وحده من بنات اخواني احبها ' احبها ولا ارضى عليها ' ما ارضى عليها الزعل ولا الضيق ' بس ان راحت مع ولد عمها بتشوف الزعل والضيق والتعب ' وانا ما ارضى
بهاج وهو يتنهد : البنت عرفت
سالم : ما عرفت وماني قايل لها شيء الا عقب ما تملكون ويتم كل شيء رسمي
بهاج بصدمه : كيف ؟ بتتزوج وهي ما تدري ؟ ولا حتى تعرفني ؟
سالم بسرعه : ان قلت لها زوجتك قبل ولد عمك يجيك
بهاج : هي تعرفه
سالم : اي تعرفه وتعرف انه مب صاحي ' بس هاذا الكلام قبل معرفتها فيه ايام اول
بهاج : انا فكرت بالموضوع ' بس انا عندي اخ بعد
سالم : اخوك بيسكرها بوجهك ؟
بهاج : لا ابد ' بس لازم استشيره
سالم : يمديك تقوله الحين ؟
بهاج : الحين ؟ ليه مستعجل
سالم : ودي تملكون من بكره ياولدي وارتاح
بهاج وهو يقوم : على خير ان شاءالله بينا اتصال
سالم : اسف اني حطيتك بهالموقف بس مابيدي حيله
بهاج : ماعليه هو رجع من السفر ؟
سالم : راجع اليوم عشان كذا اقولك بكره تملكون وتستعجلون عشان ارتاح ونفتك منه
بهاج : تتوقع اذا تملكنا بيتركها
سالم : اذا تملكتو مايقدر يسوي شيء
بهاج : وش اللي يخليك واثق لهدرجه ؟
سالم : انه ولد اخوي واعرفه
بهاج سكت
سالم : شف ياولدي انتو تزوجو وبعد فتره اذا زوجوه وهجد واستقر ان كان ودك تكمل معها حياتك براحتك وان كان ودك تنفصل عنها براحتك بعد كل شيء راجع لك
بهاج وهو ساكت ويحس انه ورط نفسه بس ما يبي يبيين
سالم : يعني الزواج بس على الورق
بهاج تنهد : ارجع لك بكره
سالم وهو يقوم معه : انا قلت لك المساله مسالة وقت بس بعدها كل واحد الله يستر عليه ويسمح دربه
بهاج هز راسه وهو يطلع من المجلس وهو يحس ان المسؤليه عنده زادت ' مشتت ومصدع من كل شيءٍ تجمع عليه بفتره وحده ' يبي يبعد عن الكل ويرتاح مع نفسه ويفكر مع نفسه بعيد عن الكل ' بس لازم يقول لاخوه ويكون عنده علم ' لو ما قاله من بدري السالفه بتكبر ' وهو مو ناقص ابد ' حرك سيارته وهو يتجه للبيت عشان يفاتح اخوه بالموضوع ويقرر اذا يتمم الموضوع ولا يكنسله كلياً ' جات بباله وهو يبتسم من تذكر شكلها وصوتها وضحكتها ' هاديه ورقيقه جداً '
يحس اذا ارتبط بيكون باله متعلق فيها ' يخاف يظلم بنت الناس معه ' وهو اشد ماعليه الظلم ' وده ينعاد الموقف مره ثانيه ' وده يعرفها ' وده يشوفها ' وده يتأملها من قلب ' يحس تعلق قلبه وباله فيها وهالشيء متعبه ومضايقه حيل ' وبنفس اليوم اللي شافها فيه جاءت فكرة الزواج من وحده مايعرفها ولا يعرف اسمها حتى وصل البيت وهو يدور على اخوه شافه يسوي له شاهي
بهاج : احسب حسابي معك
همام هز راسه وهو ملاحظ عليه من اول ما دخل
جلس جنبه وهو يحط الشاهي عنده ويحدد النظر عليه
همام بتركيز : بهاج ؟
بهاج وهو يلف النظر عليه بسكوت
همام : وين رحت
بهاج تنهد : شف ياخوي انا بقولك شيء ولا ودي اخفيه عنك بعدين اصدمك فيه
همام وهو يحس ان الموضوع كبير ووراه شيء
بهاج وهو منزل راسه ويناظر كوب الشاهي
: سالم طلب مني طلب ' وطلب كبير وبيغير حياتي كلياً
همام بتركيز
بهاج : طلب مني اتزوج بنت اخوه
همام وملامح الصدمه ماليه وجهه وينتظره يكمل
بهاج : مالها والي ' ابوها ميت ' امها ميته ' مالها اخوان ولا خوات '
همام : يعني ؟
بهاج : ولد عمها يبيها ' بس انه مب صاحي
همام ؛ كيف مب صاحي
بهاج : مريض ونفسيه وعنده هوس بشكل كبير ومعذب خواته ويتحكم فيهم بشده وماهو مخليهم يتنفسون ' وهو عمها ' مايبيها تتعذب نفس خواته ' لان اذا تعذبت مالها احد يدافع عنها ولا يحميها
همام : مو تقول عمها ؟ كيف مايقدر يحميها
بهاج : عمها كبير بسن ' وانت شايفه بعينك ' عنده بنات وحرمه ودنيا ' وهو ماهو قادر '
همام : يعتبرها بنته طيب
بهاج : لو ما يعتبرها بنته ما جاني وهو يطلب مني اتزوجها
همام : وانت وش قولك ؟ راضي ؟
بهاج ؛ يقول الزواج على الورق ' وبعد فتره اذا تزوج ولد عمها واستقر ولا سافر واستقر بديره ' ياننفصل يا نكمل
همام ؛ شف انا ماني مانعك من اي شيء ' انت رجال وقادر تشيلها وتشيل اثقل منها ' البنت مالها ذنب ' ولا لها دخل بكل هالمواضيع ' البنت تبي لها سند تبي لها رجال يعوضها عن فقدها بابوها واخوانها ' هالشيء بيدك ياخوي وانت اللي بنفسك تقرر ' وان كان الموضوع من صوبي انا اقولك وافق ' تممها ياخوي ' بس ابيك توعدني ' انك تبعد من المشاكل ' وتبعد من كل شي يدمرك ويدمر حياتك ' يمكن اذا تزوجتها وهو يبيها يسوي مشاكل ودنيا وحوسه ' بس ابيك تبعد عن هالمشاكل كلها ' عشاني وعشان البنت '
بهاج وهو يحس انه سوا انجاز يوم اخذ راي اخوه وقاله ' ارتاح وجداً من كلامه ' كان يبي يسمع هالكلام ' كان يبي يخفف من نفسه ويسمع هالشيء ' يحس كلامه وعاه اكثر وصحاه خلاه يستوعب اكثر ' مايدري وش يقول ووش يرد عليه ' اللي يعرفه انه ارتاح وبس
<<<<<<<<<<<<<<>>>>>>>>>>>>>>
بعد بكي ودموع خذت شور تنفه عن نفسها وترتاح '
تكرهه نفسها انها على ادنى شيءٍ تبكي وتنزل دموعها
لبست وتجهزت لجية بنت جارتهم اللي تعتبرها اخت قبل صديقه ' نزلت وهي تشوف البيت فاضي وهادي ارتاحت انها ماهي شايفه احد ولا بتكلم احد ' راحت وهي تفتح لها الباب وتنشرح روحها بشوفتها ' ضمتها وهي تمسك نفسها من البكي ' اشتاقت لحياتها قبل وبيتهم ' ندمانه على الجيه وودها برجعه بهاليوم ' خذتها وراحت لغرفتها وهي تقولها عن كل شيء صار لها وعن كل شيء مضايقها
بيان بصدمه : وانتي شلون جالسه ببيتهم ليلحين
نغم بضيق : وش بيدي اسوي ؟
بيان : خذي جدتك وارجعو لبيتكم وحياتكم قبل مانتو مٌجبورين تكلمون حياتكم هنا
نغم : بس عمي سالم
بيان : عمك سالم ماهو غاصبك على شيء وانتي تدرين ' اذا مانتي مرتاحه هنا ارجعي لحياتك اللي قبل
نغم : بس جدتي مبسوطه هنا ' مبسوطه ان بينها اهلها وناسها ' شفت بعيونها الامان والراحه ' ماهي مرتاحه عشانها ' مرتاحه عشاني بهالبيت وحولي ناس
عشان تطمن علي لبعدين
بيان : مادري شقولك بس انتي تعرفين جدتك وتعرفين كيف تقنعنيها
نغم : مستحيل اقول لجدتي !
بيان : اجل خليك ساكته وقاعده هنا ودايم دموعك تنزل ودايم صدرك ضايق
نغم : بيان انا اقولك عشان اريح نفسي وانتي تزيدينها
بيان : نغم حبيبي انتي تدرين اني اكثر شخص ابيك مرتاحه ومبسوطه بحياتك ' ما ابي هالناس تشوف نفسها عليك وتتكبر '
نغم : للاسف ان هالناس خوالي
بيان : ما ودك تقولين لعمك ؟ يمكن يقدر يسوي شيء
نغم : عمي اذا قلت له بيكبرها زود ! ماني ماخذه فايده بالعكس بيزيد كرهم وحقدهم علي
بيان : يعني خلاص بتسكتين ؟ بتخلينهم يضايقونك ويشوفون نفسهم عليك ؟
نغم : عندي يقين بيجي اليوم اللي ربي بيعطيهم اللي يستاهلونه
بيان : نغم هالطيبة اللي بقلبك هي اللي مضيعتك ومتعبتك
نغم بتنهيده وهي تناظر بيان بقلة حيله ' صحيح طيبه وحيل وطيبتها متعبتها ومهلكتها ' تتعب من نفسها وكثير
