قاعدين حوله ويتناقشون عن اللي صار له وكيف ومتى وليه ؟ وهو وسطهم مغمض عيونه ويحاول يتجاهل كلامهم '
يوسف : الحين انت عاجبك وضعك هاذا ؟ عاجبك الحاله اللي وصلت لها ؟ يابن الحلال حياتك بيدك لا تهملها
مطلق : همام يدري ؟
بهاج بفزع : ياويلكم احد يقوله ولا يدري عن خيط واحد
بتال : طيب عطنا سبب عشان هو الوحيد ما يدري
بهاج : ما ابيه يدري عن شي وخلاص افهمو
مطلق : خلاص محد بيقوله بس انت بعد ساعدنا لا تهمل عمرك اذا مب عشانك عشان اخوك ولا يكبر الوضع ويصير شيء ما يعجب الكل
يوسف : وجع وش يصير ان شاءالله ما يصير الا كل شيء خير
مطلق : يادرج اقوله كذا عشان لا يزيد على نفسه صدق انك خبل مانت بعيد من فهاد
بتال : اي صدق باقي العيال وينهم ترا مختفين كلهم
مطلق : فهاد مسافر مع اهله الدمام عندهم زواج ' ونايف يالله يحك شعر راسه من الضغط اللي عليه بشغل ' وجبر تلقاه نايم وخالد مع همام مختفين ورعد وغيث جايين الحين
لحظه ويفتح الباب ويدخلون كل العيال '
فز بهاج وهو يشوف اذا همام بينهم وارتاح لما ما شافه بينهم " بدا السلام والسوالف اللي ما تخلص من جمعتهم وحطو عذر ببهاج انه مصخن وحار '
مرّ الوقت وجاء وقت خروج بهاج وهو بقمة فرحته انه بيفارق المستشفى وهو مكتوم منه ولا يتحمله ' اصرو عليه انه يروح لبيته ويرتاح بس عناد بهاج محد يتحمله وراحو للخيمه " دخلو حصلو خالد غارق بنوم ومحد حوله
نايف وهو يهز خالد : خويلد ورع قم وش منومك هنا
غيث : ياخي خله راقد شف كيف غارق بنومته
نايف : ياربي يالحنون اقول اصه
غيث : احترمني طيب اكبر منك
نايف : اكبر مني بسنه وشايش ترا سنه مب عشره سنين
غيث : شكلك تبيني اتوطى ببطنك
نايف : فيك حيل تعال
قامت هوشتهم اللي ما تخلص ولا يملون منها ودايم هالاثنين مناقر وهواش
مطلق : ورع ورع انت وياه خير بزران انتو
جبر : بالله خلهم والله انهم يونسون
خالد قام من الازعاج والهواش اللي عنده : هي ورع رح تهاوش مني هناك ما حلّت لكم الهواش الا فوق راسي
سكتو على عصبية خالد اللي ما تعودو عليها وماتو ضحك
قام مستغرب منهم : بسم الله مجنن انتو قبل شوي تتهاوشون الحين تضحكون شفيكم
مطلق : قم قم رح غسل وجهك وتعال
قام خالد وهو يسمي على نفسه ويحصن نفسه
بتال : همام وينه ؟
نايف : تلقاه جاي الحين
وصحيح ثواني وهو يدخل عليهم والابتسامه ماله وجهه
همام : اوووو العيال مجتمعين خير ان شاءالله
غيث : وجع اكيد خير ليه شايفنا ما نجتمع الا بشر
همام : ماعلينا وين خويلد ما اشوفه
غيث : كان نايم توه قام راح يغسل
همام : اما توه قايم
غيث : اي ليه
همام : غريبه
غيث : ليه شصار
همام : ياخي الله يشغلك بنفسك شتبي مني انت
غيث : هاذي جزاتي معطيك وجهه واجاوبك
همام : ماعلينا ياعيال تراني جوعان وش عشاكم
مطلق : وش تشتهي
نايف وجبر : نعم نعم
مطلق : شفيكم انتو
جبر : وحنا مخدات هنا ؟ ما تسالنا
همام وهو يجلس جنب اخوه : تعرف العنقود لازم يكون رايي مهم
نايف : تراك كبر جدي وين عنقود
همام : مطلق انا عنقود ولا مو عنقود
مطلق : انا كلب يوم سالتك قدامهم اللي بسويه اكلوه واسكتو
جبر : اشوا ما قالو شيء ثاني
نايف : انا حسيت بيقول بس اشوا مسك فرامل
همام لف على اخوه : شعنده العضيد ساكت
بهاج بإبتسامه: ابد معكم
جبر : اقول بهاج ما ودك تتوظف
بهاج : وين اتوظف فيه
جبر : مع بتال بالرياض
بهاج : اما اروح لرياض
همام : صدق ليه ما تروح شفيها
بهاج ؛ لا لا وش يوديني لرياض اقعد هنا احسن
نايف : بس مانت لاقي وظيفه هنا لو وش
بهاج : شغلي اللي عندي عاجبني ماله داعي اروح
همام : حتى ما ودك تغير جو وتشتغل شغل جديد حتى نفسك بتتغير
بهاج : نشوف بعدين
نايف : طيب يا بعدين قومو قابلوني اكسرو روسكم
بهاج وهو يعدل نفسه وبصحصح : هه بدري عليك
همام : بهاج معي وانت وجبر
جبر : لا عاد
نايف : حاصل لك انت
قعدو يلعبون بكل حماس وضحك وتغيير جو لنفسهم
بس قطع الحماس صوت خالد وهو يصارخ من بعيد
فزو العيال وهم يطلعون لصوت خالد اللي ماوقف صراخ ' شافو واقف معي شباب ويتهاوش معهم
بهاج وهو يبعدهم عن خالد : خير خير من انتو له
: تعال يا ورع تعال شفت اخوياك وتحاميت وراهم
خالد وهو يبعدهم : ما تحاميت الا فيهم وانت جاي مع بزرانك وتهايط علينا
بهاج وهو يدفهم بقوه :وش وضعك انت من تبي
: جيتكم اول مره وهددتكم بس الواضح ما يفيد معكم الا طق روس
بهاج : تخسي وتعقب ما جابته امه اللي يطق روسنا تفهم
همام وهو ماسك خالد ويبعده عنهم بكل قوته كان خالد يقوله بصوت قصير انه ينحاش بس ما سمعه من الصراخ اللي فيه
: قلت لكم عطوني اللي ابيه واترككم
مطلق وهو يتقدم : مالك شيء عندنا واشوفك تتوكل الحين
بهاج : وش وجعك انت ها علمني وش تبي
: همام محمد وينه
تم الصمت بينهم ووجه بهاج اللي تجمد وقرب صوبه بهدوء ما وقف قدامه الا بتال وهو يرده لورا
بتال : استهدي بالله يابهاج وهد
بهاج بهدوء وعينه بعين اللي قدامه : وش تبي به
: علموني وينه واعلمك وش ابي به
همام وهو يتقدم صوبه بس يد بهاج هي اللي وقفته
همام : انا همام محمد
بهاج شد على يد همام وهو يحاول يرد لورا بس همام كان ثابت وعينه بعين اللي قدامه
تقدم صوبه : اجل انت همام محمد
همام : اي نعم
: يعني الحين قاعد تثبت لي انك مو خايف
همام : اخاف من وش
: يمكن مني
همام بضحكه : تخسي اخاف منك وحط هالشيء براسك تراك ما حركتني فيني حتى شعره
: يعني تتحامى باخوياك
همام : خذها اللي تبي بس عطني اللي ببطنك اول
تقدم اكثر ويد بهاج اللي ترد همام لورا بقوه
همام بعصبيه وهو ينفض يد بهاج : بهاج خلني
بهاج وهو يدفه لورا : اهجد واسكت
: خله يجيني
بهاج : عندك علم عطني اياه
: ابي همام
بهاج : وش تبي به
همام وهو يتقدم ويلف عليه : وش وجعك
بهاج وهو يغمض عيونه بقوه يحاول يتمالك نفسه
: انس وشلته اتوقع انك حافظهم وعارفهم زين
همام ؛ انت منهم
: ماعليك مني انا ابيك تسمعني زين
بهاج وهو يدفه عنه ويتهاوش معه ' قامت الهوشه بينهم وكل واحد يضرب الثاني لحد ما جات الشرطه وخذتهم كلهم للمركز ' وصلو للمركز وهم كل واحد فيهم ليلحين الحرقه بقلبه ما طفت
الشرطي: بهاج وهمام محمد هم اللي بدو بالهوشه صحيح
بهاج : انا اللي بديتها
مطلق : لا الله يطول بعمرك هم اللي جو اول وهم اللي بدو بسالفه اول وترا ثاني مره يهاجمونا
الشرطي : وش سبب جياتهم لكم
مطلق : والله ماندري اول مره جو هددونا وهالمره جو وبراسهم شر وليلحين ما ندري وشهو
الشرطي : احد قد قابلهم من قبل او كلمهم
مطلق : لا واصلاً اول مره جو كانو متلثمين وهالمره جايين بوجيهم واول مره نشوفهم
الشرطي : خلاص وقعو على التعهد وتقدرون تمشون
بهاج قام : بس كذا ؟ نوقع ونمشي ؟ انا ابي اعرف علتهم وش ووش يبون من اخوي
الشرطي : اخوك اللي هو همام
بهاج : جايين براسهم شر على اخوي تبيني اوقع واطلع بارده كذا
همام وهو يوقف بهاج : خلاص بهاج هد
الشرطي : تحب تحقق مع المعتدي
بهاج : امنيتي
الشرطي تفضل معي
بهاج وهو يطلع بسرعه وهو ليلحين وده يخنقه
دخلو وهم يروحون بمكانهم المسجون ويوقف قدامهم
الشرطي : بحر
بحر تقدم صوبهم وابتسامة الشر مرسومه على وجهه
بهاج ؛ علمني وش تبي من اخوي
بحر بضحكه ؛ اخوك لهدرجه بزر ما يقدر يواجهني لحالي
بهاج بعصبيه : احترم نفسك لا اتوطاك وعلمني وش تبي منه
بحر : خل اخوك يكف شره عن اخوي عشان افكه مني
بهاج : واخوي وش يبي من كلاب نفسكم
بحر ؛ عشان ماعنده اب يجي يتكلم بدالك او عشان ما عنده ام يبكي بحضنها اذا رجع البيت
بهاج بعصبيه اكبر وهو وده يذبحه بمكانه
بهاج : ابوي لا يجي على لسانك
بحر ؛ يتيم
بهاج : عساس آني بحزن ولا بشيل بخاطري ؟ تراك مسكين وجاهل وبزر مايعرف وش يسوي بحياته ' اخر شيء عندي يا تمسك نفسك وتمسك اخوك يا بتشوف شيء مني تتمنى موتك وقتها
طلع وهو يحس ودي يرجع ويذبحه بمكانه وليلحين قلبه يغلي وعصبيته تزيد اكثر ' شاف اخوياه واقفين عند السياره واللي واضح ينتظرونه
غيث : كسرت راسه
مطلق : ورع اهجد انت بعد ' هددت صح
بهاج : علمته كيف يصير رجال
جبر : انا ليلحين ما فهمت هم وش يبون
بهاج : يارجال بزران لا تهتم لهم
همام ناظر اخوه ؛ بهاج انا اسف
بهاج لف على اخوه : لا تتاسف لان مالك ذنب
همام : لي ذنب اني ما قلت من اول ' لي ذنب اني كنت ساكت طول الفتره اللي راحت ' لي ذنب اني ما قلت لك وش صار لي اللي خلا الكلاب يجون لمكانا
بهاج تقدم : ورع وش تهذر انت
خالد : بهاج اليوم همام تهاوش مع انس وشلته ' والصراحه مو اليوم وبس من زمان كانو يحتكون بهمام بس اليوم صارت الهوشه
بهاج ؛ طيب وش السبب
همام بصراخ ؛ اني يتيم " اني ما عندي اب يسال عني ولا عندي ام تهتم فيني ' من اول سنه بالجامعه وهم حاطين علي وماسكيني طقطقه بكل مكان ' كل اللي بالجامعه صارو يناظروني بنظرات تضايق وتزعل ' تعقدت من هالموضوع وتعقدت من نفسي ' صرت اكره اروح للجامعه بس اغصب نفسي عشان وعدي لك ' تبيني اصير دكتور ولي منصب واسم ' دايم اغصب نفسي ودايم الهي نفسي عن الكلام اللي يجيني وعن النظرات اللي تضايقني وعن كل شخص جنبي ' طلعو علي كلام ان امي تركتني اول ما انولدت ' قالو ان ابوي مات بسكته قلبيه اول ما انولدت وكان ما يبيني ' كان يبي بنت بس ربي عطاه ولد ' كنت ما اسمع لهم ولا اهتم لهم بس الواحد لي متى بيتحمل لي متى ' خلاص كرهت نفسي وكرهت حياتي وكرهت حتى التخصص اللي دايم احلم فيه ودايم ابني طموحي له واسعى له '
بس انا يا بهاج تعبت ' تعبت تعبت معد فيني حيل اتحمل اكثر خلاص ' ركض بهاج وعيونه تكسيها الدموع وهو يحضن همام ويشد عليه بحضنه '
بهاج : عسى ربي يفقدني روحي ان خليتهم يروحون من ايدي ' عسى ربي يحرمني عافيتي ان خليت فيهم عظم صاحي '
همام شد على حضن اخوه من الدعاوي اللي يقولها ومن اصراره عليهم
همام مسك وجه بهاج بخوف : لا تروح مثل ابوي وامي ' لا تروح وتخليني '
بهاج ناظر اخوه ومنصدم من انهياره ومن دموعه اللي تنزل بكره ومن جسمه اللي يرجف ' شد على حضنه وهو يسمي عليه ويخليه يبكي ويطلع اللي بصدره كله على ظهره ' العيال قررو يمشون ويتركونهم بحالهم ووجيهم تعبر عن الكسر اللي شافوه ' قعدو حاضنين بعض لدقايق وكل واحد فيهم يطلع حزنه لثاني '
بعد همام عن حضن اخوه وهو يمسح دموعه '
لف بهاج وهو يمسح على وجهه ويتنهد '
همام : انا اسف
بهاج يناظره بنظرة تأمل ' كيف تحمل كل هالاشياء على ظهره ' كيف كان ساكت طول هالسنين ولا تكلم ولا حتى بين له ' هو ما وده يشيل همومه لحاله ' ما وده يضيق ولا حتى ينكسر ' بس طلع كل شيء مكتوم وخافي له سنين ' مسك كتوفه وهو يحضنه على جنب وهم يمشون وكل واحد ساكت ومصدوم كيف صار كل هاذا ' ما توقع همام ان بيجي هاليوم اللي بينهار فيه وبينفجر وقدام بهاج " راضي ينهار عند الكل الا بهاج ' ما يبيه يشوف ضعفه ما يبيه يشوف انكساره ' كان دايم يقويه ويعلمه ويشد عليه ' ما يبيه يشوف ان كلامه عبث ' قعدو يمشون لين طلع الفجر وراحو يصلون بالمسجد بعدها اتجهو للخيمه عشان ينقلون الاغراض وينفهون عن نفسهم لو شوي ' وصلو للخيمه وقبل ينزلون مسك بهاج يد همام وهو يوقفه قبل ينزل
بهاج : خل عندك ثقه ويقين تام انهم بيروحون من يدي
همام هز راسه بابتسامه : واثقه وعندي يقين ومتاكد منه ' اخو همام ما يصعب عليه شيء
بهاج بابتسامه: واخو بهاج ما يصعب عليه شيء
بهاج : لا تضايق نفسك ولا تكدر خاطرك انبسط ووسع صدرك وحقك بيجيك لين عندك
همام : يفرجها ربي
نزلو وهم يدخلون الخيمه ويشوفون العيال وحوستهم اللي ما تخلص
<<<<<<<<<<<<<<>>>>>>>>>>>>>>
" نرجع لورا شويات "
رجعت البيت وهي كاتمه بكيتها وانهيارها عن جدتها
دخلت لغرفتها على طول وهي تنزل عبايتها وتطيح على السرير وتنهار بكي ' طلعت اللي بقلبها كله بكت لين وجهها حمر وعيونها ذبلت ' قامت غسلت وجهها وعدلت شكلها وراحت تجلس مع جدتها بابتسامه صفرا
نشميه : ادري انس ضايقه من اللي صار
نغم بصدمه وهي تلف لجدتها
نشميه : اي ادري ولا شيء يتخبى علي
ووصلي العلم وادري انه مب ودتس
نغم : من قالس
نشميه : ماعليس من اللي قالي ' علي فيس انتي
لا تضايقين نفسس ولا تعطينهم اهميه ' الكل شاف ان الغلط منها وانتي واقفه تنتظرينها وهي اللي طيحت الفنجال عليها
نغم بدموع : يحسبون اني طامعه بالالماس اللي لابسته
نشميه : يحسبون اللي يحسبونه ويفكرون اللي يفكرونه
اهم شيء انتي عارفتن نفسس وبس لا يهمس كلام احد
نغم وهي تبوس يد جدتها : يطول بعمرس ويخليس لي
نشميه : ويخليس يانغم هالقلب وراعيته
لفو على صوت الباب اللي يدق
نشميه : قومي يامس اظنه خالس سالم قومي افتحي
قامت وهي تفتح الباب والابتسامه تملى وجهه بعد ما شافت خالها يرحب فيها ويضمها دخلو للمجلس وهو يسلم على اخته ويجلس جنبها
سالم ؛ يالله حي هالوجيه وسلمها
نشميه : يحييك يابوي ويسلمك
نغم وهي تمد الفنجال : سم ياخال
سالم بضيق : رجعنا للخال حنا وش قلنا
نغم بتذكير : يووووه اقصد سم يابوي
سالم : اي خليس بنت سنعه ' انا جاي ماني مطول عليكم جاي اعلمكم بعرس ولدي محسن
نشميه : ماشاءالله الله يوقفه ويتمم له على خير ان شاءالله
سالم : امين امين
نشميه : منهي بنت الحلال ياخوي
سالم : بنت خالته نوره
نغم : ياعمري زين ما اخترتو يابوي والله انها تهبل وسنعه والكل يشهد باخلاقها
سالم : عقبالس ان شاءالله نفرح بتس قريب
نشميه وهي ترفع ايدها : يالله ياكريم عاجل غير اجل
نغم : جديده خير
سالم : ما كذبت يابنتي باذن الله قريب نفرح بتس
نغم : لا يابوي جديده تحسسني اني قاعده على قلبها تبي الفكه مني
نشميه : لا تسمع لهم عارفه غلاتها عندي وانت تشهد بها
سالم : اي بالله اشهد بها ' الا ياختي ليه ما تجين تسكنين عندنا البيت ماشاءالله كبير وكل اخوانا وخواتنا فيه الا انتي
نشميه : والله الود ودي جمعتكم والجلسه بينكم بس هاذا بيت نغم هي اللي تقرر
سالم ؛ وش قلتي يانغم ' ودتس ببنات خالاتس وجمعتهم
نغم : الا بالله ودي ومتشفقه عليها ' بس اذا طلعنا هالبيت وش نسوي به
سالم : البيت خليه علي باجر ناس به والفلوس اللي تجيه يجي بيدس
نغم بتفكير
نشميه : ها يامس
نغم ؛ لا يابوي انت اللي تشتغل وانت اللي تجيب الناس وانا اخذ الفلوس بارده مبرده
سالم بضحكه : البيت بيتس وانا ابوس
نغم ؛ وبيتك انت بعد ' شف انا راضيه عن كل شيء بس الفلوس تجينا بنص
سالم : بس يابوس
نغم : لا بس ولا شيء راضي نفسي ولا نقعد ببيتنا ونقضي
سالم : لا لا خلاص تم المهم تجون بينا
نشميه : على بركة الله
سالم : يالله عاد انا بروح ابشرهم بجيتكم وانتو ولمو اغراضكم وبجيكم على عشر الليل
نشميه : توكلنا على الله
