مابين السوالف والضحك والازعاج قامت وهي تاخذ جوالها اللي يتصل ' صارت تدور عن مكان هادي لجل تكلم فيه على راحتها وبهدوء ' راحت من الباب الخلفي حق المطبخ وهي تمشي بالحديقه وترد على الاتصال
بيان : يالكلبه وحشتيني
نغم : بياني انا اكثر والله
بيان : وينتس مختفيه لا تدقين ولا ترسلين
نغم : والله ادري اني مقصره معتس بس صارت تغيرات كثيره
بيان : تغيرات مثل ايش ؟
نغم : احنا سكنا ببيت خوالي
بيان بصدمه : احلفي
نغم : اي والله امس بالليل جينا
بيان : دقيقه وش هالازعاج اللي عندتس
نغم : اي خالي سالم مسوي عزيمه لنا
بيان : دقيقه انا ليلحين ما استوعبت انتي مو ببيتكم خلاص
نغم بضحكه : اي شفيتس نقلنا خلاص
بيان : وبيت ابوتس وش بتسوين به
نغم : اي خالي سالم قال انه بياجره
بيان : طيب ابي اشوفتس مشتاقه لتس
نغم بتفكير : طيب شرايتس تجيني بكره
بيان : ووش وضعي اجي بيت العرب
نغم ؛ بيت خوالي مو غرب بعدين ابيتس تشوفينهم والله بتحبينهم
بيان بغيره : احس فيه احد جاء مكاني
نغم بضحكه : انتي تعرفين مكانتس ماله داعي الاستغباء حقتس الحين ' المهم بكره على المغرب تجيني برسلتس اللوكيشن وتعالي
بيان : مدري بفكر
نغم : مافيه تفكير حسي اني مشتاقه لتس ياختي
بيان : خلاص ابشري تم
نغم : اجل يالله انا بسكر
بيان : ربي يحفظك
سكرت من الاتصال وهي تاخذ هواء يدخل جوفها وتعدل شعرها ' شافت شكلها بكاميرة جوالها وابتسمت بحُب لشكلها ولفت وهي تدخل تكمل الليله
<<<<<<<<<<<<>>>>>>>>>>>>>>>>>
كان واقف من اول ما طلعت وهي تكلم لين دخلت البيت ' صنم بمكانه معد يقدر يتحرك حس قلبه صار ينبض بسرعه وعيونه مركزه على اللي قدامه وبس
( نرجع لورا شوي )
بعد ما قال لاخوياه انه بيطلع يشم هواء شوي بعد الموقف اللي صار له والطلب الغريب اللي جاه
كان واقف ويدخن ويناظر قدامه ويفكر بعمق ووش بيسوي ' سمع حس كعب يطلع من البيت بس حس انه يتوهم او من التفكير اللي شتت وضعه ' لف يوم سمع الصوت الناعم ' الهادي ' الضحكه اللطيفه ' ما وقف هنا وبس ' شاف اللي طلعت وهي تكلم ومعطيته ظهرها ' مو بين منها الا شعرها وجسمها وصوتها الناعم ' ما شاف وجهها 'صنم بالجمال اللي شافه ماقدر يرجع ولا يقدر يتحرك ' حس ان احد صب عليه مويه بارده خلاه يجمد بمكانه ' بعد ثواني حس على نفسه وتنهد بقوه وهو يرجع يدخل المجلس وهو ليلحين يحس ان قلبه ينبض بشكل كبير وعيونه ما تشوف الا راعية الفستان الازرق ' ما توقع انه بيصير هالموقف ابد ' هو بالمره ما توقف هاليوم اصلاً يصير ' حاول يشتت تفكيره وينسى وهو يركز مع الشباب ' بس عجز يستوعب اللي صار وعجز يركز معهم ' حس ان باله وتركيزه ليلحين واقف عندها '
<<<<<<<<<<<<<>>>>>>>>>>>>>>>
رجعت وهي تشوفهم يتجهون للبوفيه ' راحت قعدت مع البنات وهي حالها حال نفسها بس مستحيل تمر الليل من مواقف تضايقها وتزعلها
ملاك وفرح مع صديقاتهم
فرح : بنات شوفو هاذي اللي اقولكم عنها امس
: حدها عاديه ومو ذاك الزود
ملاك : لا بنات هي صدق حلوه خل نعترف
: وين حلوه واضح كلها عمليات حتى شوفي خصرها واضح مسويه شد
فرح : اقولك البنت يالله تشتري لنفسها ملابس سنعه تقولين عمليات
: اجل الفستان اللي عليها لمين
ملاك : لشروق بنت ضحى
: احلفي يعني مو لها
ملاك : هي كانت بتلبس من عندها بس كل اللي عندها يفشلون ورايحين فيها واشوا ياختي شروق تدخلت وسنعتها
: شسمها
ملاك : نغم
: وع وش ذا الاسم
فرح : هي بس الاسم حتى الاخلاق رايحه فيها
ملاك بغمزه لهم : نغم قومي وزعي علينا الحلويات
نغم بنظره لهم بس حست انه شي عادي وقامت وهي توزع عليهم
: امم وش احلى بنات ؟
ملاك : وش تشورين علينا يانغم
نغم بتنهيدة طفش : شوفي وش يعجبك
: وجع وش في نفسيتك بخشمك انتي ؟ كافي مسوين هالعزيمه لك
نغم : ما نفست بس وش دراني انتي وش تحبين
: خلاص سديتي نفسي عطيني الموالح
دخلت شروق على نهاية كلامها وشافت نغم واقفه وهي ماسكه الحلا تقدمت صوبها وهي تاخذ الحلا منها
شروق : كل واحد يخدم نفسه بنفسه محد ملزوم بثاني
مسكت نغم وراحت تجلس جنبها
شروق : ضايقوك ؟
نغم وهي تكتم بكيتها : لا عادي
شروق : نغم لا تخفين علي
نغم بابتسامه: صدقيني ما تضايقت
شروق وهي تناظرهم بنظرات حقد وهي اصلاً تكرهم من زمان ولا تطيقهم
: اقول شروق
شروق وهي تمسك اعصابها
: اشوفك طقيتي صديقه مع الغريبه
شروق بغضب : اول شيء ماهي غريبه بنت عمي ثاني شيء انتي شدخلك فيها
: ولا شيء بس حسيت انك ارتحتي لها على طول
شروق : اي تعرفين بعض الناس اول ما تشوفينهم تحسين براحه وقبول لهم ' وبعضهم من اول ما تشوفين وجهها تعرفين نوعها وتبعدين عنها
ملاك : شتقصدين شروق وضحي كلامك
شروق : كلامي واضح هي سالتني وانا جاوبتها بس
فرح : ممكن مره ثانيه تجاوبينها باحترام
شروق : اسفه بس انا اتكلم بالمثل
: انتي شايفه نفسك على ايش ابغا اعرف
نغم لشروق بصوت خافت : شروق خلاص
شروق : الحمدالله مو ناقصني شيء ليه ما اشوف نفسي
: مريضه تراك
شروق قامت : اجل وش جلسك مع مرضى قومي توكلي بيتك يالعاقله
نغم : بنات خلاص ترا ما يسوى الموضوع
: شوفو مين يتكلم اشوف طلع لك لسان الحين
شروق : عندها يد تعرف تغير ملامح وجهك اذا تبين
: تخسي ما تتجرا وحده يتيمه مثل هاذي تمد يدها علي
نغم بصدمه ودموع ورجفه راحت تركض لفوق وهي تبكي
شروق تقدمت : قسم بالله انك جاهله وما تستحين على وجهك والحين اطلعي برا لان هالبيت ما يستقبل حمير زيك
: من زينكم ولا من زين بيتكم
شروق وهي تمسك يدها وتسحبها للباب : اطلعي برا لا بارك الله فيك يالوقحه
طلعت برا وهي خلاص بكامل غضبها وعصبيتها
حطتها براسها يعني خلاص مستحيل تسلم
<<<<<<<<<<<<<>>>>>>>>>>>>>>>
دخلت الغرفه وهي تسكر الباب بقوه وتسند نفسها عليها وتنهار وتطلع اللي بقلبها ' تكره كون انها حساسه وكثير وخصوصً بموضوع امها وابوها ' تعقدت من شيء اسمه ام واب ' صارت تستحي من اي شخص قاعد مع امه او ابوه تحس مكانها مو هنا مكانها لنفسها وضيقتها ووحدتها بس ' صارت تكره شيء اسمه جمعات من كثر النغرات والنظرات والحش الواضح عندها ' صارت تتحاشى الناس غصب عنها من كلامهم لها وحركاتهم وبعدهم عنها ' بس دايم تقول لنفسها انها قويه وقوتها قادره انها تتخطى كل العواقب اللي تجيها من كل شخص ' بس للاسف صارت تنكسر اكثر صارت تبكي اكثر صارت تحزن اكثر صارت عقدتها تكبر اكثر واكثر '
<<<<<<<<<<<<>>>>>>>>>>>>>>
سكرت الاتصال منها بعد ما اتفقت على موعد جيتها لبيتهم ' الفكره كبرت براسها اكثر وزاد الشر بقلبها ' حقوده ولا ترضى انها تكون اقل من احد بكل شيء ' المال ' الجمال ' الاخلاق ' حب النفس ' الحظ '
كل هالاشياء مستحيل تشوفها عند شخص غيرها وتتركه بحاله ' هي كذا شخص ما يحب الا نفسه فقط '
نزلت وهي تدور على امها ' شافتها جالسه بصاله وتفكر بعمق ومو معهم بالعالم
لارين : ماما اشبك تفكرين في ايش
مزن بتركيز : ها حبيبتي بغيتي شيء
لارين : اي ماما ابغاك تحولين لي فلوس
مزن : توني امس محوله لك ما كفتك
لارين : اللي امس امس خلاص اليوم يوم جديد
مزن : ووين بتطلعين
لارين : ما راح اطلع صحباتي بيجوني وبنقعد بالحديقه وابغا احجز بوفيه مصغر
مزن : بوفيه ليه الطباخ عندك خليه يطبخ لك اللي تبون
لارين : لا ماما البوفيه اكشخ واساساً صحباتي اللي بالجامعه بيجون اول مره
مزن : اف منك خلاص الحين احول لك
لارين : ثنكيو ماما
راحت وهي تتجهز
مزن وهي تتصل على ناصر : الو ناصر وينك ؟ تعال الحين ' تعال في موضوع بقولك اياه مهم ' بسرعه لا تتاخر
قفلت وهي ترجع تفكر ووشلون بتقنع زوجها بفكرتها بدون ما يعصب
<<<<<<<<<<<<<<>>>>>>>>>>>>>
قاعد عند الضو وهو ساج عنهم ومب حولهم ' التفكير من بعد زولها ماكل مخه ومضيع راسه صحى على مناداة اخوياه وهو يلف عليهم ويصحصح ويركز معهم
نايف : الا بهاج وش كان يبي منك سالم
غيث : تراك من جيت منه وانت صاير لك شيء
بهاج وهو يحاول يتمثل : ابد يسالني عن الوضع واذا كان ناقصنا شيء ولا شيات
همام بنظره : بس ؟
بهاج : بس
مطلق : مع ان ادري انك كذوب بس بنمشيها هاليله
بهاج : استح على وجهك وش كذوب شايفني ورع عندك
غيث : ماعلينا ما تلاحظون شيء
كلهم : وش
غيث : خالد وفهاد مالهم حس
همام : خالد بالعاده يكلمني اذا فيه شيء
نايف : ياسلام وش معنى انت
همام : اشهد إنك ورع وتركز على اشياء تافهه
مطلق : دقيتو عليهم طيب
بهاج : انا قبل نروح العشاء دقيت على خالد وكان صوته مليان نوم ويقول مصدع
نايف : ياخي صاير ينام واجد هالايام
همام ؛ وفهاد
مطلق : فهاد دامه مختفي يعني وراه بلاء
بهاج : وش وراه
غيث : دقو عليه طيب
همام وهو يطلع جواله ويدق عليه مره ومرتين وثلاث ولا يستجاب
همام : ما يرد
مطلق : دق عليه بعد
همام : خمس مرات وش تبي بعد
بهاج : صاير شيء غريب صدقوني
يوسف وهو يدخل عليهم
يوسف : سلام ياعيال
مطلق : وعليكم تعال اقعد حقق معنا
يوسف وهو يجلس : شصاير
نايف : ابد بس من كثر الفضاوه حللنا اخويانا
يوسف : كيف يعني
بهاج : اشهد انك فاهي
غيث : فهاد ولا خالد دقو عليك اليوم
يوسف : فهاد دق يقولي ان اهله تعبانين وبالمستشفى
بهاج : اما لا يكون صاير بهم شي كايد
يوسف : بيتهم محترق
كلهم : لاحول لله
همام : لا يكون صاب احد شيء
يوسف : لا بس كتمه وحروق بسيطه ' بس البيت روّح
بهاج : الله يعوضهم يارب ' لازم نزوه ياعيال
مطلق : صاحي انت نزوره عند اهله بالمستشفى
بهاج : لا يادرج نكلمه ونتفق معه يجينا هنا
همام : تتوقع بيرضى يجي بهالحاله والوضع ذا
بهاج : ماعليك بيجي
كملو يومهم بوضع عادي جداً وكل واحد راح لبيته لانها ليلة دوامات واشغال وكل واحد فيهم باله عند فهاد ووضعه
