" خيمة مطلق "
نايف ' غيث ' بتال ' مطلق '
الموجودين بالخيمه فقط والوضع جداً هادي
الكل على جواله والصمت سيد المكان
قطع هالصمت دخول همام وخالد وهم بأعلى مراحل الروقان '
همام : ارحبو
محد رد وهم يرجعون نظرهم للجوال
خالد : ابن ابوي صدق
همام : وش وضعكم انتو
مطلق : انطقو انطقو
دخلو وهم يناظرون بعض بفراغ
همام وهو يجلس : وش علمكم انتو
غيث : مافيه علم بس الوضع مثل مانت شايف
خالد : وين باقي العيال طيب
مطلق : كل واحد ونفسه
همام : طيب قومو خلونا نسوي جدول بدال وضعكم الميت
غيث : على ايدك
همام بتفكير : شرايكم نطلع للبر ؟
نايف : يرحملي امكم كشته وحوستها مالي فيها غيرو
خالد : شرايكم باللي يستاجر لكم مخيم ؟
مطلق : اما مخيم بديره !
غيث : مضيع الرياض انت
خالد : شفيكم ممنوعين تطلعون من الديره انتو
مطلق : دور لنا جدول بالديره برا الديره ماني طالع
همام : شوضعك انت
غيث : عليه ايقاف خدمات لحد يشره
مطلق : يعني تنكت انت ! انتو تعرفوني من سنين مالي من الديره مفر واذا بطلع ما اطلع الا لضروره غيره اخسي
همام : اشهد انك تخسي
نايف بضحكه : ماعلينا وش اتفقتو عليه
خالد : انطقو هنا ونسوي عشانا ونقضيها بلوت
همام : هلابي البلوت
غيث : جيت عند حبيبته
مطلق وهو يرفع جواله اللي يتصل ' قام وهو يطلع برا الخيمه وكل نظراتهم عليه ومستغربين هدوءه بعد الاتصال وقومته '
خالد : شفيه ؟
غيث : اصبرو مردنا بنعرف
ظلو ينتظرونه ولا زال تفكيرهم مستمر حوله وحول الاتصال الغريب اللي تركه يطلع بهدوء وبدون ما ينطق بحرف '
بعد ما طلع وهو يرد على الاتصال
مطلق : سم
: قلت لهم ؟
مطلق : لا
: اشوفك قاعد تلعب ولا همك ؟
مطلق : عطيتك وعد
: متهاون بوعدك
مطلق : تبي شيء ؟
: ابي اللي وصيتك عليه
مطلق : وانا قلت بيجيك
: اتمنى ما تتهاون فيه لانك عارف وش مرودك مني
مطلق : بسلامه
سكر وهو يتنهد ويغمض عيونه بورطه ' ضبط ثوبه وهو يرجع ويشوف الصمت اللي فيهم ووجيهم اللي مليانه اساله اتجاهه
مطلق : شفيكم
بتال : تعال عطنا علمك
مطلق وهو يتنحنح وجت بباله فكره انهم سمعوه ولا حسو بشيء
مطلق وهو يجلس : ابد خالي داق علي يسال
همام بتركيز : خالك ؟
مطلق : اي خالي !
خالد : اي علومه
مطلق : ابد يسال اذا لي جيه ولا شيء
بتال : ووش قولك
مطلق : والله مدري اذا بروح مابي اروح لحالي ابي معي رفيق خط
بتال : ودك بروحه ؟
مطلق : مره ودي ومره مالي خاطر
بتال : ودك بروحه الليله ابشر فيها
مطلق : وافي يا بتال وافي ' بس خلني اشوف وضعي واقولك
همام : ايييي ماعلينا قومو واجهوني بلوت
غيث : الله ياخذها
خالد : انا معك
همام : حي ذا الراس ي خويلد
بتال : قومو يالله معه
تجمعو وهم يلعبون البلوت ورفيقهم الاساسي الشاهي ما يفارقهم بكل جمعاتهم ' اما مطلق اللي جالس ويناظر بفراغ وباله مشغول ولا هو يمهم ابد
<<<<<<<<<<<<<<<>>>>>>>>>>>>>>
طلع من الفندق وهو يشوف سالم بسيارته واقف واللي واضح من شكله العصبيه والقروشة ' ركب سيارته بعد ما سلم عليه شاف رده البارد واللي شغل السياره بسرعه كبيره ' استغرب هدوءه وسكوته المستمر وهو حاط يده عند شفايفه بتفكير عميق '
سالم : نغم شلونها ؟
بهاج باستغرب : طيبه
سالم بتنهيده عميقه : اسمعني يا بهاج ' الوضع زاد وكبر ' وانا ماني متهاون فيه ابد
بهاج بنظرات تركيز وفراغ كبير !
سالم : عزيز جاني البيت وسوا حوسه بالبيت وارعب اهلي والبيت كله '
بهاج : عزيز ماغيره ؟
سالم : اي ماغيره ! جاي وواضح ماهو يم الخير ابد !
بهاج : وش قال ؟
سالم بنظرات شر : يبي نغم
بهاج بنظرات تحولت لغضب كبير من قال نغم !
سالم : لازم نوقفه عند حده يا بهاج ولا ترا بيزيد وماهو تاركنا الا لما نوقفه حنا بنفسنا
بهاج : انت علمني الحين وش صار بعدها اعطيك العلم
قاله سالم كل شيء من اول ما جاء بيته لحد ما طرده
وبهاج اللي صدمته وغضبه ما كانت اخف من سالم '
بهاج : انا جاني اتصال اليوم من رقم مجهول '
سالم : رقم مجهول ؟
بهاج : اي وقعد يهذر بكلام ويهدد
سالم : يهدد ؟ هذا اكيد عزيز
بهاج : انتو عندكم احد نفس عزيز ؟
سالم ؛ كيف يعني
بهاج : يعني من فئة عزيز
سالم : لا مافيه واصلاً عزيز ما طلع صوته الا يوم عرف بزواج نغم
بهاج بتفكير عميق وخطط ماليه راسه '
يحلف ويوعد بآنه ما راح يترك هالموضوع يمر مرور الكرام '
سالم : الا علمني كيفك انت ونغم
بهاج بتنهيده من طاريها : عادي
سالم لف عليه من سمع نبرته : كيف عادي
بهاج ؛ يعني عادي مافيه شيء
سالم : مرتاحين ؟
بهاج ؛ مدري
سالم : شفيك انت ؟ صاير بينكم شيء ؟
بهاج : اتركنا حنا بسالك ' ابي اجيبها تشوف جدتها قبل نسافر متى فاضين
سالم : تسافرون ؟ تستهبل انت
بهاج : ليه محرومين ؟
سالم : تسافر وانتو بالوضع ذا ؟ مب صاحي والله
بهاج : اذا قصدك عزيز ما يمديه يسوي شيءٍ لها
سالم : وليش واثق لهدرجه ؟ انت لو تسمع تهديده بالبيت عندي كان ما قلت هالحكي
بهاج ؛ ماهمني تهديده ولا همني هو بكبره ' عنده شيء يجي ويواجهني ويعطيني اللي ببطنه اما يقعد يهدد بصوته هذا ولا شيء عندي
سالم : بنت اخوي يا بهاج
بهاج ؛ بنت اخوك بالحفظ والصون ' وانت أدرى
سالم بتنهيده وهو يركز بالطريق ويحاول يشتت تفكيره بعيد عن عزيز وموضوعه '
اما بهاج اللي باله مشغول وماكله راسه بالأفكار اتجاه نغم ' ماهمه عزيز ولا همه تهديده كثر همه لنغم وانه ما يصيبها اي أذى ' معطي وعد واهم ماعليه يوفي بالوعد مهما كان '
<<<<<<<<<<<<<<<>>>>>>>>>>>>>
" عزيز - فالح "
