اسكربتات:نوران محمد🌾

اسكربت رقم:9

‏"إياك وإثارة الذُعر والخوف فى قلوب الآخرين..فكما تدين تدان..".

أنا:"لانا"...عندى ١٢ سنة فى تانية إعدادى ما عنديش إخوات غير:"مجد"...وهو عنده ٧ سنين فى تانية إبتدائي إحنا الإتنين فى تانية...مش موضوعنا دلوقتى خليك مركز مع إلى هقولهولك عزيزى|تى القارئ/ة...

"أنا شخصية مرحة وبحب أتكلم وألعب واتحرك كتير..
بس فى مشكلة إن أنا كنت بحب أخوف أى حد معدِّى(أخضه يعنى)لكن ماما دايما كانت تقولى كده ما ينفعش إلى بيخوف حد ربنا بيخوفه،بس أنا كنت بحب أخوف أى حد معدى وأكتر حد كنت دايما رعباه مجد بصراحه كل مرة كان بيصرخ وأنا كنت بضحك عليه وماما تزعل منى وأروح أصالحها وخلصنا من المشكلة..

-مرة كنت عايزة أخض ماما وأصالحها بأننا جبت الدرجة النهائية فى العلوم...
بس أنا وأنا رايحة أخوفها كان معاها كباية عصير مودياها لبابا يسلى نفسه بيها وهو قدام التلفزيون الكباية وقعت من إيديها اتكسرت ستين حته فبهدلتنى..
وقالت لى:مشى من وشى.
ولما هِدَت وجات تسألني عملتي كده ليه قولتلها إن أنا كنت جاية أقولها على امتحان العلوم وبما إن قلب ماما أبيض فبالتالي سامحتنى علطول من غير نقاش..

-مرة تانية كان مجد راكب الحصان اللعبة بتاعه بيتمرجح عليه روحت قايلاله:أووووو
راح مقلوب على وشه متعور فى خده وراح قال لماما...بس أنا اتصرفت وفضيت الموضوع بسرعة...

-جات ماما مرة بالليل وقعدت جمبى وقالتلى:يا لانا يا حبيبتى لازم تعرفى إن الى انتى بتعمليه ده غلط إنك تفضلى تخوفى إلى حوليكى علشان الضحك دا مينفعش ما انتى ممكن تضحكى بطريقة تانية.!!

لانا:طيب..بصى اقولك حاجة أنا صاحبت بنت فى المدرسة قالتلى إن باباها بيحضر عفاريت..

-إيه بتقولى إيه عفاريت!!

لانا:ههههههه بهزر معاكى والله ما صاحبتش حد جديد شوفتى خوفتك إزاى هههه.

-طب نامي يا أم دم خفيف وما تعمليش كده تانى.

لانا:حاضر..

-ورغم إلى حصل أنا مقتنعه إن دى وسيلة للضحك أنا كنت بخوفهم ولما جيت أنام سمعت زى حاجة بتخبط على شباك الأوضة...إيه ده حراميييي!!!
ومن الخوف ما كنتش قادرة أتحرك ولا أتنفس وحسيت إن فى حاجة مسكانى من رجلي لا وربطانى كنت بعافر بحاول أقول ماما ومش عارفة....
يارب ساعدنى..
وفجأة لقيت زى ظل حد جاى من بعيد بس من غير صورة والمشكلة إن أنا مش عارفة أتكلم ولا أنادي على أى حد ولقيت الظل ده لمس كتفى وأنا حسيت بإيده...
بس إزاى عايزة حد يلحقنى ومش قادرة أتكلم دا ما فيش صوت بيطلع وكأنى من الصم والبكم..يارب ساعدنى ومش هخوف ولا أخض حد تانى يارب أنا تايبة والله..

وفجأة كل ده اختفى ولقيت الأوضة بتاعتى منورة وفيها ماما وبابا ومجد كمان كلهم ملمومين حوليا..

لانا:فى إيه إيه إلى كان بيحصل ومين الظل ده ومين إلى كان بيخبط على الباب مين؟!!

مجد:اهدى ما فيش حد دا انتِ كنتِ بتحلمى وبتصرخى واحنا صحينا وجينالك ما فيش حد دا كلها كوابيس...شوفتى اهو أنتِ بتخافى اهوه..

لانا:أنا آسفة يا مجد مش هخوفك تانى سامحنى وانتِ يا ماما وإنتَ يا بابا كلكم سامحونى مش هعمل كده تانى..

-طالما إنتِ اتعلمتى يبقى لازم أجيبلك أحلى هدية..

لانا:وهى إيه يا ماما..؟!!

لقيت ماما بصت وراها للحظة وفجأة طلعت دبدوب بفرو بيخوف.

لانا:آآآآآآه إى ده يا ماما.

-ههه إنتِ خوفتى دا دبدوبك غسلته بقا شكله كده.

مجد:ما تخوفينيش تانى يا لانا علشان ما أجلكيش فى الحلم وأخوفك.

لانا:عندك حق ما إلى بيخاف من العفريت بيطلعله..

الكل جه حوليا وخدونى فى أحضانهم مبسوطة إن أنا إتعلمت من غلطى فأى حد بيعمل كده ياخدنى عبرة...

<<نهاية سعيدة>>".

كان كل ده منشور بنشره على وسائل التواصل علشان الكل يتعلم من إلى حصل لى.."...

#كن_كما_أنت
#نوران_محمد