اسكربتات:نوران محمد🌾

اسكربت رقم:11

"‏قل للرياح تأتي كيفما شاءت السفينة للبيع".

أنا«فيروز»16سنة...فى أولي ثانوي بحب ماما وبابا واخواتي واصحابي..بس مش بحب المدرسة،عندي مشكلة فى حياتي وهي المقارنة أنا إنسانة بكره كلمة زَيْ لكن الي حواليا بيقارنوني بالأشخاص الي معايا فى السنة الدراسية،مع إني لا زيُّهُم ولا هما زيِّي..لكن بتحصل بينا المقارنات في كل حاجة..

كنت قاعده فى أوضتي لوحدي وفجأة رن تليفوني..كانت«لمى»صديقتي الوحيدة فى المدرسة لأ وفي كل مكان..يمكن لأنها شبهي في حاجات كتير،أو لأنها كانت بتتعرض لإلي أنا بتعرض له فهي فاهمة مُصابِي...

لمى:فيروز إنتِ مش بتردي واتس ليه أنا قلقت عليكي هو فيه حاجه؟!

فيروز:المسلسل التعليمي بتاع كل يوم كان شغَّال من شويه فما كنتش فاضيه أرد علي حد.

لمى:الناس قدرات مامتك ليه مكبره الموضوع كده!!!

فيروز:هي ماما لوحدها!!
كلهم مكبرينه إنتِ ليه مش زي فلانه إنتِ ليه مش زي فلان..إلي بيعملوا وبيخلوا وبيسووا.

لمى:ما تعلقيش نفسِك بيهم واعملي الي عليكي أساسًا الحياة تجارب وادينا بنجرَّب.

فيروز:بس الي حواليا ضاغطين عليه أوي أنا اتخنقت.

لمى:بت يا فوزى اجمدي كده وطلعي لهم سوبر جيرل الي جواكي والي يحصل يحصل.

فيروز:السوبر جيرل دي انتحرت من زمان بسبب أفعالهم أنا حتي ما بقتشي عارفه أذاكر من كتر ما همه بيحطموا فيه.

لمى:قولتلك سيبك منهم انتِ كده هتضيعي نفسك..قومي صلي ركعتين واقعدي علي كتابك اعملي الي تقدري عليه وسيبي الباقي علي ربنا...بس تعملي الي عليكي هاااه مش تفتحي الكتاب ثانية وتقفليه وتقولي اتوكل علي ربنا بقا.

فيروز:هههه ماشي يا لولو اسيبك دلوقتي وأروح اشوف حالي ده.

لمى:ماشي سلام.

فيروز:سلام.

قفلت مع«لمى»وعملت زي ما قالت صليت وبدأت أذاكر وكان عندي بعد يومين امتحان فى درس العربي علي الوحدة التانية..الحمدلله جبت درجة كويسه آه يمكن مش النهائيه ولا زي البنات الي أهلي بيقارنوني بيهم بس علي الأقل بمجهودي وتعبي وأنا مبسوطه جدًا جدًا.

لمى:شوفتي لما سمعتي كلامي والله أنا فرحانه ليكي من قلبي..خليكي سوبر جيرل علطول.

فيروز:حاضر..يلا نروح علشان أفرحهم فى البيت بس يارب ميحطمونيش زي كل مره.

لمى:إن شاء الله خير..

..........
روحت البيت ووريت ماما ورقة الإمتحان هي صحيح ابتسمت بس قالتلي إنها عايزة الدرجة النهائية المرة الجاية..

صحيح إن الأهل بيحبوا إن ولادهم يبقوا أحسن ناس بس الكلمة الطيبة صدقة..دا أنا حتي من كتر الإحباط كنت مش هاممني الريح هاتيجي منين دا أنا بعت السفينة خلاص..بس علي العموم أنا اقتنعت إن أنا مختلفه مهما الي حواليا يقولو أنا هكون مَثَل مِش مِثْل.

دق باب الأوضه...ودا كان أخويا الكبير«حسن»هو متجوز وعنده ولد سكر اسمه«أحمد»علي اسم بابا.

حسن:عامله إيه حبيبتي الصغيره.

فيروز:الحمد لله بحاول زي ما انتَ شايف.

حسن:عارفه ممكن تلاقي ماما وبابا ضغطين عليكي بس والله فرحة النجاح متتقدرش بِتَمن..دا في الأغنية قال"دا ما فيش فرحة فى الدنيا زي الفرحان بنجاحه".

فيروز:أنا هنجح إن شاء الله وهجيب بإذن الله درجات كويسه بس أنا عايزاهم يبطلوا يقارنوني بالي حواليا أنا بكره الموضوع ده أوي.

حسن:اعتبري الأشخاص إلي انتي بتتقارني بيهم دول مش موجودين أو انتي ما تعرفيهمش وهم بس شئ يحفزك علشان تبقي أحسن وأفضل...ولا إيه؟!!

فيروز:ولو ما قدرتش؟!

حسن:يبقا تناسيهم واعملي وذاكري علشان تفرحي نفسك علي القليل وأنا هكلم ماما وبابا ماشي.

فيروز:ماشي بس اوعدني.

حسن:وعد..

كانت كلماته زي حبل النجاه الي أنقذني من اليأس أنا كنت فقدت الأمل بس هو رجعهولي تاني...

أيوه أنا هعمل وأتعب والباقي علي رب العباد..هو الي عارف الي نفسنا فيه..وهو الي معانا دايمًا مهما اتخلي عننا الناس..

أنا هفضل«فيروز»مهما يحصل ومهما إلي حواليا شككو فى قدراتي...

"ڪن أنت لڪن بالطريقة الأفضل دائمًا.."

#كن_كما_أنت
#نوران_محمد