مستعد للموت من اجلك

البارت 31

حياه واقفه مع عزه في المطبخ و بتهزر معاها و بتعمل الاكل معاها

عزه :طلعتي بتعرفي تعملي بس الاهم النفس و انتي بتعرفي تعملي كل الاكل

حياه :بصراحه مش كل الاكل و لو مفيش تعب لحضرتك ممكن تعلميني كل الاكل اللي بدر بيحبه

عزه بصتلها....انتي بتحبيه اوي كدا

حياه اتكسفت و وطت في الارض.....اوي يا ماما فوق ما انتي تتخيلي  عشان كدا نفسي اعمل اي حاجه عشان اخليه مرتاح و فرحان و نفسي اقدر اخد مكان في قلبك انتي كمان حتي و لو صغير  ومش تشوفيني وحشه لاني والله مش كدا و غير ما انتي فكراني

عزه :عشان اخدتيه من مراته يعني هقول عليكي خطافه رجاله مش هكدب عليكي انا قولت كدا فعلا قولت ان انتي دخلتي حياته و خربتيها

حياه :والله ما كنت اعرف انه متجوز غير بعد ما حبيته

عزه :و اما عرفتي عملتي ايه سبتيه فضلتي معاه و مكمله باردو

بدر كان داخل ليهم و اما سمع كلام امه جيه يتكلم و يسكت امه بس اما سمع كلام حياه سكت

حياه رجعت خصلات شعرها لورا.....انا عارفه اني غلطانه بس بدر كان بقي كل حاجه في حياتي يا ماما  و حاولت ابعد عنه بس انا مش ليا حد غيره 
بدر هو ليا كل حاجه هو الوحيد اللي وقف جنبي و كان عنده استعداد يفديني بروحه بدر هو راحل اللي اي بنت في دنيا تتمناه هو كان ليا اب و اخ و صديق هو ليا كل حاجه يا ماما كل حاجه ولو عشت عمر فوق عمري مش هقدر اوفي ليه وقفته جنبي

عزه :انا عارفه ابني كويس و عارفه انه عمره مايسيب حد يقع في ضيق و يسيبه و اتجوزك و خلاص بس اتمني انك ما تستغليش حبه ليكي دا و تخليه يظلم مراته و بنته يبقي معاكي و معاها

حياه : انا عمري ما هعمل كدا ولا هفرق بينه و بين مراته لان انا اللي دخلت عليهم و اي قرار تقوليه عن بدر انا هكون موافقه بس بدر مش يبعد عني حتي لو هشوفه يوم واحد في الاسبوع انا موافقه و راضيه

حياه عنيها دمعت و هي بتتكلم

عزه بصت لها و حست ان في حاجات كتير في حياه حياه ....هو انتي مش ليكي اهل

حياه بحزن :ليا

عزه بصتلها باستغراب

حياه:بس و اخدت نفس طويل عشان مش تعيط ..

بدر دخل في كلام .....ايه لسه الاكل مش خلص انا جعان

حياه اتلفتت و ادت بدر ضهرها

عزه :خلاص يا حبيبي الاكل خلص اخرجي يا حياه اقعدي مع بدر و انا دقايق و جايه بالاكل

بدر :تعالي يا حياه

بدر اخد حياه من ايديها و قعدها علي كنبه و قعد جنبها و مسك ايديها.....معرفش انك بتحبيني اوي كدا