زهرة حياتي 💔

الجزء الرابع عشر1️⃣4️⃣

الجزء الرابع عشر :-

(عمار )

طبوا وشافوا الهوسه للضالين اريد مكان نضيف ايكعدون بي ماكوا من فشلتي ركضت على القنفه وضليت الم بالهوسه رتبتها وطلبت من عدهم ايكعدون
وضليت الم بالهوسه انداريت على سلوان

عمار / سلوان شبيك صافن ايدك وياي

سلوان / عمي يا ادية حتى اذا اشغل رجلية وي ادية هم ما انلحك اذا انت مسويها حرب

هذا ابدال ما ايساعدني انفجر من الضحك على الهوسه وعلي شلون امشي والكط بالكلاصات والملابس

ومثنى ويا يضحك على الواهس اما مروة ابتسمت ودنكت راسها

اني فشلت فشلت عمري دائمآ سلوان يجيني ويدري بهوستي بس هالمرة سواني فلم كوميدي يفتر وايقلد علية وايصيح عود هذا استاذ ال

جريته من ايدة وطلعت بي عالمطبخ

عمار/ شنو القصه سلوان هي وكت ضحك مشوف المصيبه البيها احنه
سلوان / اصدك اني نسيت كلشي من شفت هواستك

عمار/ هسه الحل شنو مال اطلع منا واعوفهم بالشقه وحدهم ما اكدر بصراحه خايف احد يتهجم عليهم ومال ابقى هنا ويانه بنية شلون راح انمشي الوضع

سلوان / سالفتك سالف ولك عمي شبيك كلها ساعتين ويطلع الفجر بعد منو اينام واني من الصبح انأجر بيت محد يندله من اهلك وانكعدهم بي شنو كلت واني هم راح ابقى وياكم

الصبح طلع سلوان ورى عشر دقايق اجه كال يله أجرت بيت ومكانه امان محد يندلكم بي بس استعجلوا شوية حتى انلحك نوصل

طلعلوا كلهم ومروة اخر وحدة واني جاي اقفل بالباب مال شقه مدت ايدها وانطتني المبايل وما حجت اي شي راحت ورة اخوها بسرعه

طلع البيت خوش بيت صغير ومرتب والمكان هادئ احسن محد يوصلهم اني هنا اطمأنيت عليهم بقى مشكله عمامي مناك من يجون ويلكون الولد وأخته ماكو شنو راح ايسوون
اني نسيت مبايلي بالشقه ومن رجعت لكيت حسن حارك المبايل حرك
اتصلت علي وسويت روحي طبيعي

عمار/ الو ...ها حسن خير.... شبيك هالكد داك ؟ البارحه اجيت منكم يعني مالحك ارتاح ؟

حسن / ولك الولد هو واخته ماكو وعمامك حاركين الدنيا ايدورون عليهم وفوكاها ابن عمك صحه بس ما يقبل يحجي وي احد ورافض العملية مايقبل ايسوويها
عمار بس لا انت الك أيد بالموضوع ؟

عمار/ تحجي صدك تتشاقة طول عمري عايش وحدة وشارد من مشاكل العشيرة لا اذبوها براسي رحمه لوالديكم هو اسبوع كرهتوني بروحي وندمتوني لان اجيت

حسن / ماشي لعد حاول اتمشي امورك بسرعه وترجع للناصرية لان عمامك يردونك وياهم وبنفس الوكت تبعد الشبها عنك

عمار / تمام باجر اجيكم واي شي ايصير بلغني مو تنسى

قفلت الخط وكعدت على القنفه لزمت راسي يارب تنحل هاي السالفه على خير لازم اروح للناصرية واسمع كل الحجي من علي ولازم اعرف شنو السبب الي خلا ايسوي هيج صح هو مو قريب علية بس لازم هالمرة اكون قريب من عندة علمود الامانه العندي

مددت اجازتي بالمدرسة ورجعت ثاني يوم للمستشفى حتى اشوف علي واحجي ويا

لكيت حالته حاله ونفسيته مدمرة ورافض العملية نهائيآ وما يقبل يحجي وي احد

بس من شافني دخلت علي الغرفه صاحني وطلب يحجي وياي على انفراد ولد عمامي جانوا كاعدين يمه واخو طلعوا بس كلها اتباوعلي صفح ليكول مسوي جريمه لان ماقابل يحجي وي احد بس اني رادني فشكوا اكو شي

بقينه وحدنه كال ادنه علية ما عندي قابليه اعلي صوتي وماريد احد يسمعنه
قربت الكرسي ودنيت راسي يمه باوع علي بعينه الوحيدة البقت وبجه وكال.......