زهرة حياتي 💔

الجزء الخامس والعشرون والأخير 2️⃣5️⃣

الجزء الخامس والعشرون ( الاخير ):-

(فيروز و عمار )

عمار / مر سنتين اني حتى بنتي مادري بيها وين ماوين مرت زياد هي الي مداريتها ومعتنية بيها والطفله زياد هو الي سماها مروة حتى اضل ذكرة مروة بالبيت لان محد شاف منها مكروه والكل انقهر عليها من ماتت

اما اني كلما اشوف مروة الصغيرة اذكر كلشي واضل بس ابجي وانتكس بالزايد وحتى بالاحلام هم ما جنت اشوفها لان حتى نومي مخربط واخذ مهدئات يله اكدر انام واهلي يحجون عليه وايلومون بيه يردوني انتبه لنفسي ولبنتي هاي امانه عندي بس اني عايش بغير عالم وما انفذ كلامهم

وبيوم من الايام بعد كل هاي الفترة بيومها قررت اسافر بس اجتني مرت زياد وكلتلي عمار لهنا وبس اني صار سنتين اكول هسه يصحه على نفسه وينتبه لبنته وبما انك قررت اسافر لعد اني عندي امانه الك وحان وكتها

انطتني ضرف صغير مكتوب علي من مروة الى فارسي

خذيت الضرف وخليته على كلبي وكعدت بالكاع وضليت ابجي بحركه ما بجيت هيج من يوم الماتت بي مروة

رجعت فتحته لكيت بي وصية من مروة اتوصيني بأطفالها وتطلب مني اضل ازورها على طول بكبرها واجيب اطفالها وياي وطلعت تدري بموضوع الاسحار بس ما حجتلي حتى لا اخسر اخوية حسن

بعد ما شبعت بجي وعدت الرساله اكثر من مرة طلبت من مرت زياد اجهزلي مروة الصغيرة اريد اخذها للنجف ازور امها لاول مرة صح بعدها صغيرة سنتين بس هاي وصية امها

ومن وصلت هناك وكفت على قبر مروة واني شايل مروة الصغيرة بيدي قريت الفاتحه ورجعت كعدت يم القبر بجيت لحد ما مليت بعدها اعتذت منها لان كل هاي الفترة جنت هامل الطفله ومادري بشي ووعدتها من اليوم اعتني بيها واعوضها عن كل الي فات وما راح تدخل اي وحدة بحياتي لان الحب مرة وحدة بالعمر وهي حبي الاول والاخير

وبهذا الاثناء جان اكو قبر قريب مني اجت بنية لابسه عباية ومحتشمه كعدت يم القبر بجت وشفتها تحجي وي القبر اني ضليت صافن عليها شراح اسوي

رجعت وكفت و طلعت اوراق من جنطه جانت بيدها وخلتهن على القبر وثبتتهن بشي حجرة

رجعت التفتت عليه من شافتني بهذا الوضع اتقربت مني وكالت

البنية /مرحبا ، هذا قبر زوجتك ؟

عمار / مراحب ، اي وانتي ؟

البنية / قبر زهرة حياتي

وعافتني ومشت اني هنا صار عندي فضول بعد ما مشت البنية رحت على القبر الجانت واكفه علي خذيت الاوراق لكيتهن عبارة عن مجموعه من الاوراق مرتبات بشكل متسلسل ومكتوبات بخط ايد

وعنوان ليفوك مكتوب بي ( رواية بعنوان زهرة حياتي 💔 ) بقلم ابنتها

خذيت الاوراق ومروة الصغيرة واتأكدت من حلمي الي كانت نهايته بسبب سحر دمر حياتنا 💔

...........................................

بقلم / الكاتبة يقين جواد ✍