Balas (Anak ni Randy) [COMPLETED]

BALAS:11

Chapter 11: Di madala ug Sorry

-
Nakuratan ko sa dihang nikidlat ug pinakalit ang langit. Kusog ang ulan rong adlawa. Naa kos akong kwarto naghigda. Gipugngan akong kaugalingon na hikapon ang cellphone na naka-off kay gi-off nako tungod sa kakusog sa ulan ug kidlat. Lamia na unta mag online oyy.

Naghayang-hayang kos akong higdaanan. Tutok sa kisame. Dungog kaayo nako ang bundak sa ulan sa among atop. Dugaya pud muondang ulana oyy.

What if nag-online na siya? What if naana siya'y reply ron? Ahhh mabuang nako. Pila na gyud ka adlaw ayy wala siya nag online. Miss na kaayo nako tong tawhana to. Ngano kaha wa ga online. Hell, pila na ka adlaw. Unsa kahay problema nila?

Nabalik rakos reyalidad sa dihang nikidlat napud sundan sa kusog na pagdalugdog. Nakuyawan ko as in kulang nalang mubulag akong kalag sa akong lawas. Hadlokonon kaayo ko ani pero di nako ipahalata. Keri pa man sa akong beauty!

Gisundan ato pag-abri sa akong sira. Nakita nako si Mama na nilili gikan sa gawas.

"I-off nang cellphone kay nangidlat.."

"Humana man ganina ra," gakulismaot nakong tubag.

"Oh..di maayo mugamit ana ha? Dakpon nas kilat," lingo-lingo pa niya dayon gisirado akong sira.

Nabilin napud kos kwarto. Ang kamingaw di matabang. Gusto nako mag-selpon pero bawal. Sayon ra unta sawayon ang sugo nila Mama. If mag open kos cp ug mag online pwede ra kay wa may makabalo pud kay ako ra isa. Pero tabang gud, if himuon pud ko to haha di kaha ko dakpon sa kilat. Then mamatay yaks diko batia guro nakog nawng ig makit-an nila Mama na namatay tungod sa kilat kay nag selpon gyud. Sunog guro kayko tas ang buhok pareha kakalkag kay Albert Einstein.

Tungod sa ka-bored nigawas kos akong kwarto ug niadto sa kusina. Ngitngit kaayo ang balay kay way kuryente. Gipagngan tungod sa kakusog sa ulan. Pusta, nangatumba nang poste ron.

Wa nako nahagilap sila Mama bisag sa sala o kusina. Siguro naa silas kwarto ni Dodong nangatug. Nidayon ko sa kusina ug nagkuhag baso then ang garapon sa gatas. Muinom kog gatas kay tugnaw. Paghumag butang sa pulo ka kutsara nga gatas gikuha nako ang thermos then woosh aso-aso lage. Ukay gamay then gibilin sa lamesa sa. Giabrihan nako ang ref kay nanguhag slice bread ug palaman na Lady's Choice na with chicken. My all time favorite palaman! Nibalik kos kwarto ug didto nangaon.

Undang na tawn ulan. Maluoy ka! Mingaw na kaayo ko niya hehe..

***

Pagkabuntag nakamata ko sa tingog ni Mama gikan sa gawas. Nibangon nalang sad ko. Deretso ko gawas ug adtos cr.

Nigawas kos terrace. Nafeel pa nako ang kabasa sa tiles didto tungod sa salibo. Nadungog nako ang silhig ni Mama. Nilili ko ug naa siya didto sa amoang tugkaran, nanilhig.

"Ma, nangaon naka?" Matik na napatan-aw siya nako.

"Wala pa. Mangaon nata ron.. "

"Edi ali na? "

"Wa pako nahuman ug pang-limpyo. Maypag tabangan sa ko nimo diri aron madali ni," nigawas nalang pud ko aron tabangan siya para wa napuy yawyaw ba.

Tungod sa ulan gahapon grabe ang sagbot. Daghan kaayog dahon sa kahoy ug mga uban pang kalat. Gipamunit nako ang mga wrappers. Then gipangtindog ang mga nangatumbang bulak ni Mama.

"Ingon sa balita wa may bagyo pero ang ulan gahapon lahi ra gyud sa kakusog."

Wa nako siya gitubag kay wa ko sa mood. Gipaminaw ra nako iyang gipang yawyaw. Hangtod sa naay naagi nga silingan ug dira na sila nagtabi ug ayo.

"Nangatumba man gani akong bulak madz. Unsa man tong ulana to, bagyo naman to?" Ingon ni Mama dala tudlo sa iyang bulakan.

"Ayy giingon pa nimo. Akoa gyud pagmata nako nigawas man dayon ko. Nya ang rose na imong gihatag nako Madz katong white ug pink na bag o pang tanom asus nabali oyy."