كبريائي يتحدى غرورك

(56)

وصل الى هناك .. دخل لغرفة كوثر ليجد يارا جالسة معاها

نظر لها و قال بصرامة : اخرجى بره دلوقتى

نظرت له يارا بستغراب و قالت بجدية : ليه ! انا لسة هدى لماما الدواء

جاسر بحدة : قولت اخرجى بره

نظرت له يارا بستسلام و خرجت

خرج وراءها و شدها من يدها الى غرفتهم و قال بحدة : تقعدى هنا متخرجيش غير لما اجيلك .. ثم اغلق الباب بعنف وراءه و خرج

عندما خرج .. جلست هى على السرير بجانب ريرى النائمة و ضمت قدمها الى صدرها بقلق .. ترى لماذا جاء من العمل !! بالتأكيد انه امر هام ليترك عمله فى اول النهار و يأتى و يعاملها بتلك القسوة

دخل لغرفة كوثر و اغلق الباب وراءه بعنف

بلعت كوثر ريقها بصعوبة ... فقد علمت فى تلك اللحظة انه قد علم بما فعلته

ضغط على اسنانه بغضب كى يهدأ نفسه .. الى ان هدأ تماما

نظر لها و قال بهدوء على غير العادة : ماما انتى ....... وقص عليها كل ما قالته شروت ثم تابع بحدة : الكلام دا صح

نظرت للأرض بندم و صمتت

جاسر بحدة : الكلام دا صح !! انتى عملتى كدا

لم ترفع كوثر بصرها عن اللأرض و دموعها تنزل بندم

جاسر بحدة : مدام عاملة كدا يبقى حصل .. ثم تابع بصدمة : فى ام تعمل فى ابنها كدا .. مكنتيش عايزة تشوفى عيالى و هى بتجرى حوليكى .. و بتقولك يا ناناه .. مكنتيش عايزة تشوفى السعادة فى عنيا .. كنتى عيزانى اقعد جمبك حزين .. كنتى عايزة تحرمينى من الأطفال من البنت اللى بحبها .. البنت اللى لقيت معاها الحب و التغير .. ثم تابع بحده : و لعلمك كل تخطيطك و اللى عملتيه دا ولا كان هيفرق معايا .. عشان لو مكنتش خلفت .. انا مكنش هيهمنى .. و كنت هفضل متجوزها .. و متجوزها هى بس .. لو الأختيار بينها و بين الأطفال .. هختارها هى

نظرت له و بدأت تبكى بكاء حاد ممزوج بالندم الشديد

تابع بحدة : انتى عارفة انا خرجتها ليه !!

نظرت له بدموع ممزوجة بالتساؤل

تابع بحدة اكثر : انا مش عايزها تعرف ان امى معندهاش قلب للدرجادى .. و عشان عارف ان موضوع الأطفال دا حاجة مهمة اوى عندها .. و انها لو عرفت مستحيل انها تسمحك .. ثم اكمل بصدمة : انتى ازاى قدرتى تعملى فيا و فى مراتى كدا .. قوليلى ازاى !! .. ياريتك ما كنتى امى

نظرت له و انهارت اكثر فى البكاء

نظر لها و قال بحدة : يعنى كنت مستحمل معملتك الوحشة ليها .. و انك عيزانى ابعد عنها .. و انك خدتنى منها يوم فرحنا تقوليلى فاكر لما كنا بنشوف الشروق انا و انت .. و كنت بقول غيرة حموات ... و قليل اوى لما تلاقى حمة بتحب مرات ابنها .. لكن تحرمينى انا و هى من الأطفال بالأسلوب الغبى دا .. انا مش عارف لو انتى مكنتيش امى انا كنت عملت ايه !! و عارف انى غلطان انى بعلى صوتى عليكى .. على الست اللى ربتنى و خليتنى راجل .. و شالتنى 9 شهور .. لكن انتى اللى وصلتينى لكدا .. انتى كمان اللى وصلتى بابا انه يتجوز عليكى و يمد ايده عليكى بعد العمر دا كله .. عارفة لما كان بيضربك انا كان فى حاجة مخليانى واقف و مش عايز اتحرك .. البنت اللى كنتى عايزة تمنعيها من احساس الامومة هى اللى فوقتنى و خلتنى انقذك من تحت ايد ابويا .. انتى اللى وصلتى نفسك للمرحلة اللى انتى فيها دى .. انتى انسانة سطحية كل همك المظاهر و بس .. بتبصى على المظاهر قبل القلوب .. و انا كنت هبقى زيك .. او انا اصلا بقيت زيك .. لولا وجود نازلى فى حياتى .. اللى كانت بترجعنى .. و بعد كدا وجود يارا .. اقولك حاجة .. انتى تستحقى كل اللى بيحصلك دا