عن عبد الله بن مسعود، رضي الله عنه، قال: قال رسول الله- صلى الله عليه وسلم-: «إنَّ للهِ مَلائِكَةً سَيّاحِينَ فِي الأرْضِ يُبَلِّغُونِي مِنْ أُمَّتِي السَّلامَ».
فصلوا على من بكى شوقا لرؤيتنا ❤️
___________________________
أنهى شريف الايف، وارتدى ملابسه وقرر النزول لمقابلة بعض أصدقاؤه في كافيه قريب من منزله، وعندما خرج من غرفته أو بمعنى أدق الحظيرة كما تسميها أمه، وجد أمه تجلس على اريكة ضخمة أمام التلفاز كعادتها، وترتدي تربون فوق رأسها ويضم كتفيها وشاح من الصوف يقيها برودة الجو كحال غالبية الأمهات، وبيدها طبق مليء بأنواع مختلفة من مقرمشات التسالي المُحمصة تأكل فيهم بنهم، ويٌعرض امامها على الشاشة الإعلان الخاص ببرنامج "هي والمجتمع" الذي ستقدمه قطعة المارشميلو -كما تسميها هي - شيرين جابر، وما أن لمح شريف البرومو الذي استرعى انتباه أمه بالكامل حتى شهق في صدمة واتسعت عيناه وهو يقول :
- إيه دا يا انشراح!!!! انتي بتتفرجي على الأعداء؟!
نظرت له أمه شزرا من أسفل منظارها، ثم قالت:
- يا شيخ اتنيل.. أعداء إيه! دانا مستنية البرنامج بتاعها بفارغ الصبر .
فرد شريف بتهكم ساخرا :
- مستنياها ليه بقا أن شاء الله؟! عايزة تعرفي منها الطريقة اللي تتعاملي بيها مع المرحوم لما يجيلك في الحلم.
زمّت شفتاها مستنكرة، وتقوست شفتاها ثم قالت :
- لا يا خفيف.. كنت عايزة اسألها عن روتين شعرها، شايف يا واد شعرها طويل وتقيل وسايح إزاي، يا خرابي قمر.
- شعر إيه يا انشراااح!! دي بروكة.
- اسكت أنت.. أنت ايش فهمك .
فرد شريف بغرور :
- اسكت أنت!!! ماشي ماشي بكرة البرنامج بتاعي يتذاع وهقعدها في بيتها، وانتي بقا بكرة تشاوري عليا وتتفشخري قدام الناس وتقولي دا ابني، وأنا هقولهم ولا أعرفك.. خليها بقا تنفعك.
- اتوكس هو حد هيعبرك ولا هيتفرج عليك.. احنا ناقصين خناشير!
ما كفاية علينا يا خويا اسمه إيه أديب الاقرع دا هو وجوزه خميس، عايزين نشوف حاجة عدلة في التليفزيون بقا .
فقال باستنكار رافعا حاجبه:
-محدش هيتفرج عليا!!! دانا الجروب اللي على الفيس بوك بس فيه أكتر من اتنين مليون، أمال لما هطلع في الشاشة الصغيرة هيبقوا كام؟!!
فقالت انشراح بفرحة:
-ياما أنت كريم يارب، أخيرا هنحل أزمة الضاني في مصر.
- اشمعني يعني؟!
-ما هو ما شاء الله بقا عندنا اتنين مليون خروف ماشين وراك..
- ماشي يا انشراح.. ما انا مش هخلص معاكي.. يلا سلام أنا نازل.
قالها وهو يتوجه ناحية باب الشقة للخروج، فاستوقفته قائلة باستنكار :
- انت رايح فين!!
ثم أردفت بنبرة منكسرة تجيدها جيدا :
- يا بني هو أنت كل يوم على الحال دا؟ تعبت قلبي.. هتعقل أمتى بقا وتدور على بنت الحلال وتتجوز، أنا نفسي أشيل عيالك قبل ما أموت.
أنت تقرأ
احتلال جسدي (مكتملة)
Randomماذا سيحدث عندما تستيقظ المرأة الجريئة وعدوة الرجال الأولى ومنظمة أقوى الحركات النسوية في مصر "شرين جابر" لتجد نفسها في جسد رجل، بينما يستيقظ الصحفي الذكوري الشرس "شريف زاهر" ليجد نفسه في جسدها المفقود. حرب كوميديا لها مغزي سنرى فيها امرأة طاغية ال...
