جالس تحت القمرة فالجردة المضوية بالشمع فلكيسان على الارض حدا لاللة ياقوت كيعاود بيها ماجرا ليه فالحرب ويحكي قصتو مع الغدار دولد عمو اللي طعنو فضهرو وكان ناوي يقتلو ويقول باللي مات فلحرب شكون يكون دابا الخليفة ديالو. تخلعات لاللة ياقوت من كلام الملك وحطات يدها على فمها وقالت - حفضك الله اولدي... حفضك الله من الحفرة اللي حفر ليك ... والحمد لله اللي طاح فيها ورجعتي لينا سالم ... كان غيقول باللي تقتلتي فالحرب ... والحرب هاديك وكان كلشي غيصدق كلامو ... شووف الخاين وشنو خرج منو ! تنهد ساهي قدامو وقال : تخاف من الحبيب اللي قريب ليك اما عدوك راك عارفو كيحفر ليك لاللة ياقوت : شوووف الغدار .. وانا اللي جالسة نبكي عليه ونضيع دموعي على خاين ... ياحسرة عوض يوقفو جنبك ويسخنو كتافك زادو هم على همك . قال ساهي : وان ينصركم الله فلا غالب لكم لاللى ياقوت : و مولاي قاسم واش حتى هوا معاه؟ غمز لعينو وهوا ساهي قدامو وقال : تأ مكنضنش ... مكنضنش واش الامير قاسم نيتو خايبة معايا ... يقدر يكون معاجبوش حكامي على شعبي .. باغي حتى هوا يتزوج ويدير ولادو .. هادشي مناش معصب ..اما شي حاجة اخرى غير هادشي منضنش... عدياني عارفهم واحد واحد .. من الضحكة كنعرفو علاش ناوي ولاش باغي يوصل . لاللى ياقوت : هادشي رجع كيخلع ... وشكون اللي نتا عارفو وبان ليه فيه الدغل ؟ حرك راسو وقال : شكون كره يحكم بلاصتي؟ شكون هادا اللي كيحني راسو ليا وهوا مرتاح ؟ .. حتى واحد ... كاع اللي كتشوفي هنا كيدورو ماكرهوش يحكمو بلاصتي ... حتى من النسا صدق ليهم ري جديد ورجعو حتى هما باغيين المرى تحكم ... بنادم هوا هادا مايمكنش تبدل فيه شي حاجة ... كل واحد باغي يكون حسن من لاخر لاللة ياقوت : هي غتنوض السيبة ضحك بالجنب وقال : اللي هز راس نقطعو لباباه واخا يكون من دمي ولحمي ... ويدي الى غدراتني نقطعها من الجدر ... حر الغدر قوى من خر الجرح .. وانا نصبر للجرح ومنصبرش للغدر (شاف فيها بنص عين ) وحتى اللي كيكدب ويخبي وعند بالو راه مخبي ... نهار يتكشف ويتفضح نشرب دمو واخا تكون الكرش اللي ولداتني تزعزعات لاللة ياقوت من بلاصتها كتمتم وقالت كترجف - و وو علاه مالها الكرش اللي حملاتك اش دارت ليك ؟ وشنو مخبية عليك؟ رجع تكى على ضهرو كيحشي ليها الهضرة وقال - قلت زعما تكون مخبية عليا شي سر ولا شي حاجة ... ماشي غير دابا وهنا حتى من هنا لقدام .. الى نوات تخبي عليا شي حاجة ... على خاطر الى جات صارحاتني بلسانها نقدر نسمح ... اما الى عرفتها بنفسي مابقا سماح حطات يديها على كتافها كتحكم وتمتم وقالت - البرد ... تحرك البرد شوية ... ندخلو بحالنا؟ هز حاجبو وقال : دخلي نتي الى جام البرد ... انا باغي هاد البرد يضربني يالاه نرتاح شوية وقفات كتقاد سلهامها وقالت : شفتي روح الندى ؟ حرك راسو وقال : شفتها ... وردي معاها البال بانت ليا البنية بدات دخل وتخرج فالهضرة لاللة ياقوت : لوحم هاداك اولدي غير ساعف ... والى بانت ليك فشي شكل سيفطها لقصر الريف تجلس فيه حتى دوز هاد الوقيتة ديال الوحم ويرجع ليها عقلها .. حسن مادير شي زبلة .. راه النسا فهاد الوقت كيكونو غراب ... يضحكو ويتعصبو على اقل ما هيا حاجة حرك راسو وقال : غير خليها ... وردو ليها البال شوية ... ووجديها غدا تمشي معايا للشمال ... نخرجو من جو الحرب و الموت هادي تبسمات لاللة ياقوت وقالت : علاش لا ...
مشات لاللة ياقوت وجلس موراها فالجردة شحال حتى كملات وقفات القمرة فالنص و ضربو الريح مزياان عاد ناض رجع لجناحو ... دخل بشوية عليه بان ليه المكان خالي .. مافيهش حس روح الندى .. البيت مضلم كامل وبيبان الشرفة محلولين .. خيامو الحمرا كدخل وتخرج والريح الهادي كيدي فيها ويجيب كيف بغا ، بدا كيشعل فالشمع وحدة مور وحدة حتى بدا الضوء كيبين اللوان ، حيد عبايتو حطها بقا للباس خفيف زرق غامق توبو شفاف مبين لحم صدرو وضهرو كامل ... خرج للشرفة عندها فين واقفة ساهية فالسماء والريح كيرجع شعرها للور لابسة عبايتو الكحلة اللي عطاها ساترة بيها مفاتن جسمها العارية ..حاطة التاج على راسها وواقفة مكتحركش .. مسلمة للريح اللي كيدور بيها من كل جوايه ، ماحسات بيه حتى حوط يدو على كرشها من اللور وحط فكو على كتفها ويدو كدوز على خدها .. همس فودنها كيشوف بعييد فين كتشوف هي وقال - مالكي واقفة بوحدك ؟ شنو شاغل بالك ؟ جمعات النفس فصدرها حتى علاتو مزيان وطلقاات تنهيدة تقيلة من نيفها .. حط يدو على صدرها وقال - هاد التنهيدة ديال اللي دار صدرك ديال وحدة هازة جبال من الهموم ... قالت بشوية ساااااهية متحركاتش من مكانها - بالي مع شي حاجة ما عرفتش شنو هي ... عقل معلق مع شي حد وماعرفتش شكون هوا ... قلبي مزير عليا وعقلي مشطون .. ماعرفت نفرح ولا نحزن ... نضحك ولا نبكي .. حاسة بشي حاجة غريبة غطرا وخايفة منها ... خايفة تقلب حياتي ... خايفة نفقد راحتي ... خايفة بزااف ... مناش ؟ مانعرف ؟! شد يدها بشوية ودورها عندو . تكات بضهرها على الصور كتشوف فيه .. وهاد المرة شوفة ديال وحدة تالفة ... ضايعة بحال شي حمامة معارفاش فين ترصي . وكل شوية تنهد تنهيدة طول من ختها ، بنفس الشوفة ديالها شاف فيها حتى هوا وقال - شنو اللي شاغل بالك ؟ واش كلامي خلعك؟ ولا الوحم اللي كيدير فيك هادشي ... حسب ما قالت ليا لاللة ياقوت .. كيجيكم الوحم ... وكيدوخكم ويغير جوكم بلا ميغرو ليكم شي واحد رمشات كتشوف للجنب بشوفات تقال وقالت - ماعرفتش ... انا باش حاسة راه قلتو ليك ... منين جاي ماعرفتش؟ خايفة وصافي دور وجهها عندو وقال : الى كان كلامي هوا اللي تلفك ... بلا متعمري بيه راسك... انا عندي كي لبنت كي لولد بجوج فكفة وحدة ... غير انا كنفضل الولد هوا الاول ... وهادشي مكيعنيش باللي مغنبغيش لبنت الى تزادت ... بلعكس ... بلاصتها فقلبي بحالها بحال الولد (هز يديه بجوج قدامها وقال) كتشوفي هاد اليدين بجوج ... (حركات راسها) اليد ليمنة هي الولد .. وليسرة هي البنت ... ليمنية كتخدم بزاف وتحرك بزاف وعليها كنعتامد كتر .. وليسرة كتعاونها و مكتحركش بزاف بحالها ... وداكشي علاش حطيت الولد فلكف ليمنية والبنت فالكف ليسرية ... فهمتيني شنو كنقصد حركات راسها وهبطات عينيها حازنة .. هز ليها راسها وقال : ولاكن .... واش نقدر نقطع يدي ليسرية واخا مكنعتامدش عليها ؟ ... منقدرش ... وصعيب عليا ... بحال هاكاك البنت ... من دمي ولحمي و واخا بنت كتبقا بنتي منقدرش نفرط فيها ولا تمسها ناموسة وحدة هزات عينها فيه وقالت : يعني بلا منخاف واخا نولد لبنت تبسم وقال : بلا متخافي ... الى ولدتي البنت غنبقاو تابعين الولد حتى يجي بقيتي على خاطرك تبسمات وبدات دور فراسها وترمش .. عنقها فحضانو ومع التعنيقة سمعو باب الجناح تحل ودخلو يشوفو يلقاو العبد دخل صندوق كبير منقوش حطو الوسط وحنا راسو
أنت تقرأ
عروس الملك السابعة🫐مكتملة🫐
Romance💎مكتملة💎 😍😍😍😍😍😍😍😍😍😍😍😍😍😍😍😍😍😍 بقلم: Ghazal Trust🍒 👑عروس الملك السابعة👑 قصة شاملة بطابع فكاهي، ودرامي،... ولأول مرة غنوضف الخيال فقصصي ... نجرب الخيال هاد المرة ونشوف اش غيطلع تاني 😂😂...
