Days Running From Mummies's Hand

1

Unicode

အရှေ့အရပ်ဆီမှ ဖြည်းညင်းစွာ ထွက်ပေါ်လာသော သူရိယနေမင်းကြီးသည် အထပ်မြင့်အဆောက်အဦးများကို ကျော်ဖြတ်ကာ အထက်သို့ တရိပ်ရိပ်နှင့် တက်လာပေသည်။

သို့သော် အလင်းရောင်ပေးခြင်းကိုတော့ အပြည့်အဝ မဆောင်ရွက်နိုင်သေး။

အရုဏ်တက်ချိန် အကျော်သာရှိသေးသည်ကြောင့် လောကတစ်ခွင်သည် အမှောင်ထု၏ လွှမ်းမိုးမှုအောက်တွင်သာ ရှိနေ၏။

အသက် ၁၇ နှစ်ကျော် ကောင်လေးတစ်ယောက်သည်လည်း အိပ်စက်ခြင်းစည်းစိမ်ကို စံစားနေလျက်ရှိသည်။

"​ဖီးလစ်(စ်)ရေ!! ဟဲ့...ဖီးလစ်(စ်)!"

အခန်းအပြင်ဖက်မှ မာမီ၏အော်ခေါ်နေသံကြောင့် ဖီးလစ်(စ်)တစ်ယောက် လန့်ပင်နိုးလာရသည်။

"ဖီးလစ်(စ်)ရေ...."

"ဗျာ... မာမီ။ အစောကြီးရှိသေးတာကို။"

ဖီးလစ်(စ်)သည် မျက်လုံးနှစ်ဖက်ကိုပွတ်ပြီး အိပ်ချင်မူးတူးအသံဖြင့် အော်ပြောလိုက်တော့

"နင်ပဲ မနက်ပိုင်း အချိန်ပိုရှိတယ်ဆို။"

မာမီပြောမှ သူသတိရသည်။ ဒီနေ့ဆရာက အားကစားလေ့ကျင့်ဖို့အတွက် အချိန်ပိုခေါ်ထားတာကိုပင်။

ကုတင်ခေါင်းရင်းမှ နာရီကိုလှမ်းကြည့်လိုက်တော့ နာရီလက်တံသည် ၅ နာရီခွဲသို့...။

၆ နာရီဆို အတန်းစမည်ဖြစ်သောကြောင့် အတန်ငယ်ပင် နောက်ကျနေပြီ။

ဖီးလစ်(စ်) အိပ်ချင်နေသည့်စိတ်တို့ပျောက်သွားအောင် ခေါင်းကို ခပ်ဆတ်ဆတ်ခါလိုက်ပြီး အကြောဆန့်ကာ ရေချိုးခန်းသို့ဝင်ရ၏။

ရေချိုးခန်းဝင်နေပြီ ဖြစ်ကြောင်းကို အခန်းရှေ့တွင် ရပ်စောင့်နေသော မာမီသိစေရန် အတွက်လည်း ရေချိုးခန်းတံခါးကို အသံကျယ်အောင် ပိတ်လိုက်​သေးသည်။

ဖီးလစ်(စ်)တစ်ယောက် ကျောင်းနောက်ကျနေမှာ စိုးတာကြောင့် ရေကိုခပ်သွက်သွက်ချိုးပြီး အဝတ်အစားလည်းအဆင်​ပြေတာသာ ဝတ်လိုက်ရ၏။

အဝတ်အစားလဲပြီး မှန်တင်ခုံရှေ့ရပ်ကာ ဆံပင်ကိုလည်း သပ်သပ်ရပ်ရပ်ဖြစ်အောင် ဖြီးရသေးသည်။