နှလုံးသားနီးနီး...စည်းပါးပါး(Love And Pride)[Completed]

Part(9)

🌺နှလုံးသား နီးနီး...စည်းပါးပါး🌺

Part(9)

"သားငယ် သားဒယ်ဒီ အလုပ်ထဲမှာ မတော်တဆဖြစ်လို့ ဆေးရုံတင်ထားရတယ်" ဆိုသော မာမီရဲ့ဖုန်းဆက်လာမှုကြောင့် စက်ဝန်း စင်ကာပူကို ချက်ချင်းပြန်သွားရသည်။

သူရောက်တော့ ဒယ်ဒီက အရေးကြီးအခြေအနေကနေ လွှတ်လာပြီဖြစ်သည်။ စိုးရိမ်စရာအခြေအနေမဟုတ်တော့ပေမဲ့ စောင့်ကြည့်အခြေအနေမှာရှိသည်။

သူစင်ကာပူရောက်ပြီးနောက်ရက်မှာ ဒယ်ဒီသတိပြန်ရလာသည်။ အစက မြန်မာနိုင်ငံကိုသွားခဲ့လို့ စိတ်ဆိုးနေပေမဲ့အသက်ဘေးက သီသီလေးလွှတ်လာရတော့ အတ္တတွေခဝါချပြီး အရာအားလုံးနားလည်သွားပြီထင်ပါသည်။ စကားပြောလာ၏။

"ဒယ်ဒီပြောစရာရှိတယ်"

ဒယ်ဒီသက်သာလာပြီး ဆေးရုံဆင်းတဲ့နေ့မှာ အရေးကြီးကိစ္စပြောစရာရှိတယ်ဟုဆိုလာသည်။

"သားကြီးကတော့ သိလိမ့်မယ် သားငယ်အတွက်တော့ အသစ်ပေါ့ ဒယ်ဒီတို့ သားတို့ကို အိမ်ထောင်ချပေးဖို့အစီအစဉ်ရှိတယ် "

"ကျွန်တော့်မှာ ချစ်သူရှိပါတယ်ဒယ်ဒီ "

ကိုကိုက ချက်ချင်းလက်မခံနိုင်ကြောင်းကန့်ကွက်၏။ သူက ကိုကို့လို ကန့်ကွက်ရအောင်ကလည်း ချစ်တဲ့သူက အဖြေပြန်မပေးဘဲ ငြင်း‌ထားတော့ ဘာပြောရမှန်းမသိ။

"သားငယ်ကရော"

"ကျွန်တော့်မှာ သဘောကျရတဲ့သူရှိတယ်"

"အင်းး ဒယ်ဒီက သားတို့နှစ်ယောက်ထဲကတစ်ယောက်နဲ့လက်ထပ်ပေးဖို့ဆုံးဖြတ်ထားပြီးသား...သားကြီးကရော "

"ကျွန်တော်လက်မခံဘူး သူက ကျွန်တော့်စတိုင်လ်မဟုတ်ဘူး "

ဒယ်ဒီနဲ့မာမီ ကိုကို့စကားကြောင့်သက်ပြင်းတွေချ၏။ ကိုကိုကတောင် မြင်ဖူးပြီး ငြင်းတာ။ သူကမမြင်ဖူးပဲနဲ့ယူစရာလား။

"ဒါဆို သားငယ် "

"အခုခေတ်မှာ ဘယ်သူက မိဘပေးစားတာ ယူကြလို့လဲ ဒယ်ဒီ...ကျွန်တော်မယူနိုင်ဘူး"

"တစ်ဖက်က မိသားစုက ဒယ်ဒီတို့ရဲ့အသက်သခင်ကျေးဇူးရှင်...သားငယ် ဆယ်နှစ်တုန်းက ရေမကူးတတ်ဘဲ ရေကူးတော့ ရေစီးထဲမျှောပါသွားခဲ့တယ် ဒါကို မင်းထက်ကအသက်စွန့်ကယ်ခဲ့ပေးတာ ဒါကြောင့် သူတို့မိသားစုကို ကျေးဇူးဆပ်ပါမယ်လို့ကတိပေးခဲ့တာ ဒယ်ဒီတို့ကအနေဝေးပေမဲ့ အဆက်အသွယ်အမြဲလုပ်ဖြစ်ကြတယ် မင်းထက်ကမရှိတော့ပေမဲ့ တည်ထားတဲ့ကတိကိုတော့ တည်ရမယ်သားငယ် အိမ့်မှူးကိုပြောပြတော့လည်း လက်ခံတယ်"