နှလုံးသားနီးနီး...စည်းပါးပါး(Love And Pride)[Completed]

Part(41)

🌺နှလုံးသား နီးနီး...စည်းပါးပါး🌺

Part(41)

International airport...

မြန်မာနိုင်ငံလေဆိပ်ထဲသို့ လေယာဉ်ပေါ်မှ လောလောလတ်လတ်ဆင်းသက်ခဲ့သည့် လူတစ်ယောက်ထွက်လာသည်။ တွန့်ကြေနေသည့်အဝတ်အစား၊ ရှည်လျားနေသည့်နှုတ်ခမ်းမွှေး၊ ဂုတ်ထောက်နေသည့်ဆံပင်အညိုရောင်တိုနှင့် သူတောင်းစားလိုပုံစံမျိုးနဲ့ငေးမှိုင်မှိုင်ဆင်းလာသည့် ထိုလူက အပြင်ဘက်ထိလျှောက်သွားကာ ကောင်းကင်ပေါ်ကိုမော့ကြည့်သည်။

နောက်ဆုံးတော့ ဒီနေရာကို အခြေချရတော့မည်။

"ကိုယ်ပြန်လာပြီ မွန်လေး"

အတိတ်မှာ ရည်ရွယ်မွန်ဆိုတဲ့မိန်းမကို အမုန်းကြီးမုန်းခဲ့သည်။ သူမကြောင့် သူ့အချစ်တွေ ပရမ်းပတာဖြစ်ခဲ့ရသည်။ သူငယ်ချင်းကိုသစ္စာဖောက်မိခဲ့သည်။ ပြီး‌တော့ သူ့နှလုံးသား နာကျင်ခဲ့ရသည်။

ဒါပေမဲ့ သေချာပြန်စဉ်းစားမယ်ဆိုရင် အနှစ်သာရဆိုသောအမျိုးသမီးထက် အနှစ်သာရပေးတဲ့စာတွေက သူနဲ့ပိုနီးစပ်ခဲ့သည်။ ဒါက အနှစ်ကိုချစ်တာမဟုတ်ဘဲ အနှစ်သာရအဖြစ်ဟန်ဆောင်ထားတဲ့ သူကိုချစ်မိတာဖြစ်သည်။

နားလည်တာအချိန်နောက်ကျခဲ့ပေမဲ့ သူမ လက်ခံနိုင်ဦးမလား။

✿⁠............✿⁠...........✿⁠

"တီ..တီ.."

အော်ပရေတာစက်မှ တဖြည်းဖြည်းနဲ့ဆက်တိုက်ကျဆင်းလာသည့်သွေးခုန်းနှုန်း။ အမြဲတမ်းစောင့်ကြည့်နေသည့် သူနာပြုတစ်ယောက်မှ အရေးပေါ်ခလုတ်ကိုနှိပ်လိုက်သည့်အခါ ငါးမိနစ်အတွင်း‌အပြေးအလွှားရောက်လာသည့်ဆရာဝန်များက လူနာရဲ့အခြေအနေတည်ငြိမ်အောင် နောက်ထပ်ငါးမိနစ်ကြိုးစားပြီးသည့်အခါမှာတော့ လူနာရဲ့အခြေအနေက ပုံမှန်ပြန်ဖြစ်သွားသည်။

တဖြည်းဖြည်းမျက်လုံးပွင့်လာသည်။ ဒါက အခြေအနေတည်ငြိမ်သည့်အခါတိုင်း ဖြစ်လာသည့်ဖြစ်ရပ်ဖြစ်သည်။ သို့သော် ထိုနိုးထလာမှုက ခဏတာဖြစ်ရပ်သပ်သပ်သာဖြစ်သည်။

အရင်က လူနာကို သတိပြန်မမေ့အောင်အမျိုးမျိုးကြိုးစားခဲ့ပေမဲ့ မအောင်မြင်ခဲ့ပေ။ ယခုတစ်ခါမှာတော့ အောင်မြင်ခဲ့သည်။