Unicode
"ဒါဆို အန်တီက ဒေါ် ခိုင် ခင် ခန့်"
ခပ်ရေးရေး မှတ်မိသော နာမည်ကို ဦးနှောက်အား အလုပ်ပေးကာ တစ်လုံးချင်းစီ ရွတ်လိုက်သည်။
"ရှင်!"
ခိုင်မမြင်ဖူးသော လူမှ ခိုင့်နာမည်အား သိနေခြင်းက အံ့ဩသွားရသည်။
"ကျွန်တော့်ကို မမှတ်မိဘူးထင်တယ်"
"..........."
"အင်း... ဘယ်မှတ်မိပါ့မလဲ အချိန်တွေက ကြာခဲ့ပြီလေ"
ကိုယ့်မျက်နှာအား သေချာစိုက်ကြည့်ပြီး စဥ်းစားနေပုံရသော အန်တီက မှတ်မိပုံ မပေါ်ပါ။
"အန်တီ စဥ်းစားလို့မရဘူး ဒေါက်တာက ဘယ်သူလဲ"
"ကျွန်တော်က ဒေါ်သိင်္ဂီဝင်းရဲ့သား တည်စေမင်းပါ"
"ရှင်!"
ဒုတိယ အကြိမ်မြောက် အာမေဋိတ် ဖြစ်မိခြင်း။
"နာမည်ကိုတော့ အန်တီကောင်းကောင်း မှတ်မိတယ် သားအရင်က Aussieမှာနေတာမလား"
'တည်စေမင်း' ဆိုတဲ့နာမည်လေးက အဝင်းကိုယ်တိုင် သူမချစ်ရတဲ့ သူမရဲ့ တစ်ဦးတည်းသော သားလေးကို ပေးခဲ့သည်လေ။
အဝင်းရဲ့ သားဟု သိလိုက်ရသောကြောင့် "သား" ဟုသာ သုံးနှုန်းလိုက်သည်။
"ဟုတ်တယ် အန်တီ"
"အခုမှ ဒီကိုပြန်လာဖြစ်တာလား"
"ဒီကထွက်သွားကတည်းက အခုမှပထမဆုံးအကြိမ် ပြန်လာဖြစ်တာ အန်တီ"
"ပြန်ရောက်တာ ကြာပြီလားသား"
"သုံးရက်ရှိပြီ အန်တီ"
လေဆိပ်ကနေ ဦးလေးတို့အိမ်ကိုဝင်မနေတော့ဘဲ မေမေ့ဇာတိကိုသာ လာခဲ့လိုက်သည်။ရေကြောင်းနှင့် ကုန်းကြောင်းပါ စီးပြီး ဒီဒေသလေးကို ရောက်အောင်လာခဲ့သည်။
"သားက အပြီးပြန်လာတာလား"
"အဲတာက မသေချာသေးပါဘူး အန်တီ ဒါပေမယ့် အခုလောလောဆယ်တော့ ကြာဦးမှာပါ"
" ဒီက ဆေးရုံကို ပြောင်းလာတာလား"
နိုင်ငံခြားပြန် ဆရာဝန် တစ်ယောက်အနေနဲ့ အညာမြို့လေးမှာ အချိန်ကုန်မနေသင့်ပါ။
