Unicode
စတုရန်းပုံကျယ်ဝန်းသော ခြံဝန်း၏အလယ်တည့်တည့်၌ တည်ဆောက်ထားသော နှစ်ထပ်တိုက်ကြီးသည် အဝါနုရောင်မှတစ်ဆင့် ဖျော့တော့သော ခပ်ဝါဝါကလေးပင် ကျန်ရှိနေပုံမှာ ကြာရှည်ပြီဖြစ်သော ရှေးအဆောက်အဦ၏ သက်သေဖြစ်နေသည်။ ရှေးလက်ရာအဖြစ် ပုံမပျက်ရှိနေခြင်းက အမွေအနှစ်အား ရိုသေစွာ ထိန်းသိမ်းထားပုံပင်။ ခြံဝန်းကို ပတ်ပတ်လည် ကာရံထားသော အုတ်တံတိုင်းသည်လည်း အရောင်မှိန်မှိန်လေးသာ ကျန်တော့သည်။ တိုက်၏ အပေါ်ထပ် မျက်နှာစာတွင် "ပဒေသာ" ဟူသော နာမည်အား ထွင်းထုထားသည်။ တိုက်ရှေ့ တံခါးဝမှ ခြံဝန်းထဲသို့ ခြေချလိုက်သည်နှင့် မြန်မာလူမျိုးတို့အကြိုက် သင်းပျံသော လက်ဖက်နံ့က ဆီးကြိုနေသည်။
ဧည့်ခန်းအတွင်းရှိ ကျွန်းညိုရောင် ထိုင်ခုံကြီးများက ခန့်ညားမှုကို ဖော်ပြကာ ကျောမှီတွင် ကြိမ်လေးများဖြင့် ပန်းအကွက်သေးသေးလေးများ ကွပ်ထားပုံက လက်ဝင်ပုံကို ထင်ဟပ်စေသည်။ ထိုင်ခုံများ၏ အလယ်ဗဟိုတွင် ကြီးစိုးထားသော ကျွန်းညိုရောင် စားပွဲပေါ်တွင် မှန်အကြည်လေးက အကျအန နေရာယူထားသည်။ဧည့်ခန်းရှိတစ်ဖက်တွင် ကနုတ်ပေါင်းများစွာဖြင့် ရုပ်လုံးဖော်ထားသော မှန်ဗီရိုကြီးထဲတွင် ခန့်ညားစွာနေရာယူထားသော ရွှေရောင်ပန်းယွန်းအုပ်သည် ရွှေယွန်းဖြင့် အလှဆင်ထားပြီး ရောင်စုံဖန်ကွက်များနှင့် ထပ်ကာထပ်ကာ ဒီဇိုင်းများဖြင့် အလှဆင်ထားသည်။
ယွန်းအုပ်၏ အဖုံးပေါ်တွင် ဒဏ္ဍာရီလာ တိရစ္ဆာန်များနှင့် တောက်ပနေသော စိန်နှင့်ပတ္တမြား,များဖြင့် ထည့်သွင်းထားသည်။ အဖုံး၏ ထိပ်တွင် ကံကောင်းသည်ဟု ယူဆထားသော ဟင်္သာငှက်ရှိပြီး ငှက်၏ တောင်ပံနှင့် အမြီးတို့သည် ယွန်းသတ္တုဖြင့် ပြုလုပ်ထားသည်။ အခြားယွန်းထည်ပစ္စည်းများဖြစ်သော ရုပ်စုံကွမ်းအစ် ၊ ရုပ်စုံလင်ပန်း ၊ ရွှေရေးပန်းစိုက် ၊ ယွန်းတောင်း ၊ ယွန်းချိုင့် ၊ ယွန်းသေတ္တာ တို့ဖြင့် ပြည့်နှက်ကာ မျက်စိမလွှဲချင်လောက်အောင်ပင် ရှေးလက်ရာများက ညှို့ငင်နေသည်။
