ليه عمرُي مالقى لبره دفا الا دفاكِ؟

البارت السابع

قفل دهام جواله ودخل على لين
لين : متى يطلع ؟
الممرضة: يجي دكتور ويقول متى يطلع
دهام : شفيتس مستعجله على الطلعه خليتس بس
لين : ما احب المستشفى
دهام بضحكه : في احد يحبه
لين : ايه
دهام : مين؟
لين بضحكه: سيف ختم مستشفيات نجد العذيه
دهام وهو يتذكر مصايب سيف : اخ ياسيف يذبحني هالانسان من الضحك
لين : الا بسالك وش ودك نسميه
دهام : انتي امه يا دنياي وكلّي وانتي الي تعبتي فيه ٩ شهور وانتي ألي استحملتي الالم ما احد يقدر يستحمله انتي لك الحق باسمه الي ودك فيه انا ودي فيه والي تبينه انا ابيه والي تبين تعشينه انا ابي اعيشه معك ومع ولدنا يا كل دهامك
لين بحب وهي تناظر كلام دهام وحبه و شلون مدقق بكل شي وقالت : نايف بن دهام بن احمد ال دهام
دهام : تم يا ام نايف
دخلت ام نادر
{ تعريف بسيط }
ام نادر تكون اخت ام رعد
ام نادر ( هدى ) عمرها ٦١
ابو نادر ( فهد ) عمره ٦٤
( نادر ) عمره ٣٧ ملزوم بشغله وما يحب يكون بين ناس كثيره ومتزوج وعنده طفلين
هدى زوجة نادر عمرها ٣٧ ومن خمس سنين تكذب بعمرها وتقول ٣٣ وعاد مو لازم احكي لكم بشخصيتها واضحه
( ياسر ) عمره ٣٤ ومعقد جداً ومريض نفسي وفيه اكتئاب حاد باسبابه الخاصه الي راح نتعرف عليها بعدين
( مروى ) عمرها ٢٧ وطبعها من طبع اخوها متزوجه وعندها طفل واحد واسمه ( فهد )
لين ام نايف وهذي عايلة لين

ام نادر بطرف عين لدهام : شلونك دهام
دهام فز وباس راسها : بخير يملا الخير وشلونتس انتي يا خاله
ام نادر : زينه زينه
ياسر : شلونك ابو ؟
دهام بضحك : نايف
ياسر : شلونك ابو نايف
دهام : بخير على ما تحب
طلع دهام عشان ياخذون راحتهم
ام نادر : لا يكون غصبك على الاسم ؟؟
لين : لا يمه لا دهام مو كذا ولا بعمره سوا فيني كذا شفيتس
ام نادر : مافيني شي بس اسال المهم جهزت اغراضك نفاسك عندي فاهمه ؟
لين : اكيد يمه
..................................
عند البنات ببيت ابو ناصر
اديم : تعبت يا بنات خلاص ما اقدر ارقص بروح للحمام
ريهام : احسبي حسابتس بترجعين ترقصين لي فااهمه ؟
اديم تخصرت وقالت : شايفتني راقصه عندتس
ريهام : مالي شغل
اديم طلعت من المجلس وراحت فوق وكانت تشوف ستريك رعد وتضحك وصدمت بجسم رجل وكان ناصر
اديم بالالم : وجع اهخ راسييي
ناصر كان ساكت ويتاملها بذهول ولا كان يدري وين يحط  عينه  بالظبط كانت عينه تتحرك من بين شعرها  الاسود المدرج الطويل وعيونها الواسعه و غمازاتها وشفايفها وجسمها وخصرها كان يناظر كل شي فيها بذهول وبراسه سؤال واحد مين هذي
وجاء بباله شعر يقول :
العيون احلى من عيون المها
شافها قلبي وصفق واحتفل
من نظرته من فتنته شعله حياه
والجفون من الحيا فيها كسل
.....
رفعت راسها اديم وقالت : ناصر !
مسكها ناصر بسرعه قبل لا تروح وكان قريب منها ويسمع صوت أنفاسها و نبض قلبها وكان حاس بجسمها وقال بصوت عصبي : مين انتي !
اديم بعصبيه وخوف من قربه لها : صد جعل عيونك للفقع يا كلب ما احلّ لك
ناصر : علميني مين انتييي وكان شاد على يدها بقوها
اديم بصوت باكي : ناصر توجعني
ناصر شك بالصوت وقال  : مين انتي وشلون تعرفيني
اديم : انا انا اديم يا ناصر اديم
ناصر بصدمه : بنت .. عمي حمد ؟
اديم عضت يده عشان يترك يدها وحطت رجلها
وكان ناصر واقف يتذكر شكلها وخوفها وكل جزء منها !
وهز راسه بنفي وقال : لا نااصر سدن يا ناصر سدن خلك على سدن على حبيبتك وبعد كلامه لنفسه طارت اديم وطار كل شي معها ونسى مين هي اديم اصلاً
وراح لغرفته وانسدح وغمض عيونه وتذكر كيف كان ماسك خصرها وكيف كانت واستغفر ربه وقام يصلي ركعتين ودقت سدن وابتسم
ورد وقال : يالبيه يا نبض الناصر
سدن بحب : وينك ياروحي ما دقيت
ناصر تذكر اديم وقال : كنت مشغول امريني وش بغيتي
سدن فتحت موضوع زواجهم : وقالت متى ودك تطق الباب ؟
ناصر : ابشري بكره بكلم ابوي وجدي ونجيكم بأذن الله
سدن بحماس : امانه ناصر
ناصر تقشعر جسمه وتذكر كيف اديم نطقت اسمه 
وقال : ايه يا حبيبي ان شاء الله قريب
سدن : زين اسمع حبيبي امي تناديني بروح انتبه لنفسك
وكان ناصر يكتب شعر عن سدن 
بس هالمره كان شاك يكتب عن اديم الي ما راحت عن باله دقيقه ولا يكتب عن حبيبته
وكتب :
يا مدور الهيَّن ترا الكايد احلى
اسال مغني كايدات الطروقي
الزين غالي لكن الازين اغلى
وجت بباله اغنية تناديك رغبات المقابيل
وكان ضايع بين اديم وسدن بس الاكيد بيختار سدن
..................................
عند اديم
اديم : يمه ذا مو صاحي ولا شبلاه وتذكرت كيف عضت ايده وتفشلت وركضت لريهام دخلت اديم على البنات
وقالت وهي تأخذ أنفاسها : ريهام تعالي تعالي بسرعه
ريهام خافت : وش بلاتس خوفتيني وش فيتس طلعوا اديم وريهام للسطح
ميهاف : شفيها يمه يا بنات
حنين : مافي شي اديم تكبر المواضيع وريهام تخاف
رفيف : وحنيني صادقه
غدي : شغلوا السماعات بس قامت رفيف تشغل السماعات وكملت ترقص هي وغدي
وكانوا ريهام واديم بالسطح
ريهام : تكلمي شفيتس اديم خوفتيني
اديم : ناصر شافني !
ريهام ما انتبهت وقالت طيب
اديم كانت تنتظر صراخ ريهام ومجهزه المخده تكتمها فيها
وما مرت ثواني الا البيت كله يسمع صراخ ريهام
ريهام : امانتس بالله!! قولي والله
اديم : بكذب يعني وقصري صوتس تكفين
ريهام : اجلسي علميني وش صار بالظبط وجلست اديم تعلم ريهام وش صار
ريهام بصدمه: ما توقعت اخوي كذا توقعته يستحي بس طلع ملعون
اديم : وبس هذا الي صار
ريهام بحب : خلاص صدقيني دامه شافتس بياخذتس
اديم: اسكتي بس تكفين
ريهام : بروح اشوفه
اديم : انقلعي بس شوفي لي طريق بطلع للبنات
ريهام راحت تشوف ناصر واديم راحت للبنات
طقت ريهام الباب وقال ناصر : منو
ريهام : انا نصوري ادخل
ناصر : ادخلي
ريهام دخلت وكان ناصر سرحان بالسقف وضحكت على حاله وقال ناصر شفيتس
ريهام : انت الي شفيك علامك
ناصر غمض عيونه بقوه ويحاول ينسى اديم وبدا تقريباً ينساها وقال : لا مافيني شي ورجع يسرح
وطلعت ريهام وكتبت لاديم : اجل تقولين لي اسكتي الولد صار يسرح ويغمض عيونه بقوه
اديم : احلفي !
ريهام : ياليل كم مره بقولتس ما احب احلف على شي ما يستاهل وانا ريهام الصقر ما اقول شي ألا متأكده منه
اديم : والنعم والله
ريهام : ماعليتس زود وراحت ريهام وجلست جنب اديم وهي تتخيل كيف بيكونون حلوين مع بعض و تنتظر الانتاج الي بيدمر الدنيا وكانت تتخيل كل شي وتناظر اديم الجميله وكيف بتكون سعيده لها وانها بتكون معها طول الوقت لان ريهام تعتبر اديم اختها وصديقتها وكل شي
..................................
طلع ناصر وركب سيارته وراح ياخذ له شي ياكله وشغل المسجل عشان يسمع شي بالسياره وكان يقول المغني
ما كنني بين البشر يوم شفته
ولا كن به حوله من اهله عذولين
ولا كن قبله مر في القلب مره
ولا اظن بعده تعشق العين لسنين
وتذكر اديم وضرب الدركسون بقوه وقال بينه وبين نفسه :
خلاص انساها انساها خلك مركز على سدن على حبيبتك من هي عشان تلخبطك ناصر ركز تراك جالس تخون حبيبتك سدن ركززز تكفى خلاص ،، وقرر ناصر ينسى اديم ولأ يتذكرها ابداً وراح ناصر ياخذ اكله وكان وده يدق على رعد بس كان رعد يشبه اديم وهو ما وده يتذكرها ودق على خويه فارس
فارس : هلا يالخوي
ناصر : تعال للمكان الي برسله لك ابيك ضروري
فارس : احتزم يالذيب
ناصر : كفو يالبطل
فارس : كفوك الطيب يلا مسافة طريق واكون عندك
ناصر : انتظرك يالحبيب
قفل ناصر من عند فارس وهو خلاص بينفجر من التفكير بين اديم وسدن وكان محتار وراسه يوجعه وجاء فاارس
ناصر : اخخ والله اني مشتاق لك يالخايس
فارس ضرب ناصر وقال : مو كثري بس علمني شفيه وجهك
ناصر جلس وقال : مدري وشلون ابد
فارس : ياشيخ كب العفش شعندك
ناصر علم فارس السالفة وقال : بس والله هذي هي
فارس : يعني الحين سدن حبيبتك واديم بنت عمك ؟
ناصر : ايه وكل ما انسى اديم اتذكرها مع اني ما احبها بس اتذكر كيف كانت وكيف هي بذا الجمال الي ما ادري من وين جابتها
فارس ضحك بعد كلام ناصر وقال : اكيد امها ولا خوالها
ناصر بضحك : الي هو بس والله ضعت
فارس : اقول خلك على سدن هي عاشت معك سنتين واديم ما عاشت معك شي بس عشان لقاء واحد بتنسى سدن والسنين الي معها !
ناصر : انت تستهبل ولا تستعبط مستحيل اخذ غير سدن وانا ابيها واحبها بس ابي انسى اديم خلاص استحلت تكفيري وكان تفكيري سدن وانا ما احب اديم ولا ابيها بس افكر فيها
فارس : والله مدري وش اقول لك بس استعجل على زواجك من سدن عشان تكون معك وتنسى اديم وابو اديم
ناصر : ان شاء الله
فارس :يعني ما تبي اديم
ناصر : لا ما ابيها
فارس : خلاص نبي نخطبها لاخوي راكان
ناصر  : يصير خير أكلم الشيبان ونشوف
فارس : متاكد ما تبيها
ناصر : ما ابيها يا ولد
فارس : امزح معك يا ورع راكان خلاص لقى البنت الي تناسبه 
ناصر : قل والله !
فارس : اي والله
ناصر  قام يسلم على فارس وقال : مبروك يالخوي وعقبالك
فارس بضحك : الله يبارك فيك وعقبالك ذي ما عاد ابي اسمعها الا بعد خمس سنين ابي اعيش حياتي بدون ما اشيل هم احد
ناصر : ياليل يالمراهق وليد وليد وهو مراهق ما قال كلامك الله يثبت عقلك بس
فارس : امين امين يلا امش بنروح للاستراحه
ناصر بشك: للاستراحه ولا تبي تتمشى
فارس ضحك بصوت عالي وقال : يا فاهمنيييي بس لا بنروح لهم
ناصر قام وكل واحد راح لسيارته وانطلقوا للاستراحه