طفولة مُظلِمة

Part 19

طفولـة مُظلِمة

بقلمي : تبارك محمد

كًون بكُل شارِع اشوفّك
چا گضيت العمُر امشي
وكون اگابل مرة وجهَك
اله أعميهن اذا ينطبُگ رمشي
مو مجرد صدفة أنـتَ
ولا محطة ويَمها أكعُد واستراح
أنــتَ كُل شي،

_________________________________________

منذ 8 حُزيران
سنة الـ 2014 ،

زهرة :دموعنا بعيوننا والخوف محتلنا كُلنا
وصار ينعاد الزمن والموقف نفسه ومر العِراق بـ احتلال مرة أُخرى ،
طالعين متوجهين لـ شمال العراق مُتهجرين جميعًا ،
اهلي و اهله كُلهم ..

-انا ومرت خالي اللي هي ام ذياب بـ سيارة وحدة
واطفالي الـ 3
وامي وبيت نمر بـ سيارة
ومُظهر وعائلته
وكذَلك علي وعائلته وياهم ..

-وذياب يحاول يطمنني ويقلل مــن خوفي ،
سألته وانا دموعي مغرگه عيوني ،

زهرة : ذياب شراح يصير ويانه ؟
ومنو هُم الدولة الاسلامية ؟

ذياب : الدولة الأسلامية هي اسم مُزيف

-الدولة الاسلامية كانت هي تسمية عِند الشام والعراق
بـــس احنا نختصرها ونكوللكم هما اسمهُم داعش

داعش هو تنظيم مُسلح ارهابي
وهو شبُه دولة غير معترف بيها دوليآ
وهما غير اسلام
هُما مُرتدين عن الاسلام وخارجين عن ديننا
لان ابسط شي شوفو جرائمهم بحق الموصل و اهلها
سبايا وقتل وخطف ونهب
فـ هيچ مُجرمين شلون نگدر ننسبهم على الاسلام ؟
واللــه اليستر على العراق ويخلصنا منهُم ومن شرهم

زهرة : كلامه زاد حيرتي وخوفي
وصرت ابچي وادعي يارب عراقنا الحبيب بـ حفظك ورعايتك
تعبنا واللــه وما نعرف شنو الينتضرنا ..

-بقينا نمشي وكُل شويه سيطرة توگفنا
وملامحهم وحدها ترعب الواحد ..
لحد ما وصلنا أربيل تحديداً
وبدينا نطمئن ولو شويه لان شمال العراق غير مُحتل
وما اكدر داعش يسيطر عليها او يدخل لـ منطقة مِن الشمال ..

-عشنا فقر و ضيم وانذلينا برة ديارنا
وفعلآ اللي يطلع مــن داره يقِل مقداره ..

واهلي تبهذلو اكثر لان كُلهم بالسلك العسكري
اخوي نمر ضابط ولما طلعنا خسر راتبه وگعد بالبيت ما عندة شغُل
ومُظهر كذَلك مُنتسب وانقطع راتبه
وتبهذلو وسكنوا بـ مجمعات متهالِكة وتعبانة
هي حقيقتآ ما تصلح للسكَن بـــس هما مُجبرين ،

-عشنا اسوء الظروف وقت التهجير بـ 2014

____________________________________

‏Flashback(الى الماضي)

علي : مــن سمعت منها هذا التلميح
عرفت أن وّد هي بعد راغبة بـ هالزواج ولمحت الي ؏ الموافقة ..