مندرين... قيد الكتابة

١

" تك .. تك ... صوت كعب عالي ، كل ما ليهو الصوت بيقرب على باب غرفتي ، مع كل خطوة كنت بسمع خفقان قلبي ماشي يزيد اول مرة احس بحقد تجاه انسان بالكترة المخيفه دي زي الموج مندفع جوا قلبي و مالي صدري لمن حاسة بيه تقيل ، من جواي قاعده اقول يارب ما تجيني يارب ما تجي ما هسي يارب ما هسي يارب لأنه ما واثقه من تصرفي حيكون كيف .. لحد م سمعت ( سيييييييك صوت الباب فتح ) رغم ان عيني قبلها كانت على الباب و انا مترقبه خطواتا ، الا أني لمن حسيت بيها قربت من الباب و خلاص حتفتحو ، قبلت وشي بسرعه من الباب احساس اني غير مُباليه ، و لكن في الحقيقه انا جواي حريق من ال.... #قاطعتني ! "

** (داخله و في يدها كباية عصير ، ختتها في الكومدينه ) معليش دخلت من غير ما ادق الباب ! لكن صاحية و لا مشغولة ولا نايمة حتى ، في كل الاحوال حنتكلم ! 

__ ( بي توتر م بعرفو ظاهر علي ولا لا ) : لااا عادي .... اا البيت بيتك ! 

** ما تقولي كدا ، دا بيتك برضو ! 

__ هممم !! 

** اخدتي أدويتك ! 

__ ( سكته و دا كان ردي ) ! 

** انتي عارفه انا بحبك قدر شنو صح ؟ و عارفه انك في معزة اختي واحد صح ؟ و حاجة اخيرة كمان ! انا ما حصل سألتك عن حاجة شخصيه ! او ليه و كيف و بعرف حدودي كويس شديد و بحترم خصوصيه القدامي ، لكن ما ... #قاطعتها 

__ ( بي انفعال هجومي و صوت عالي ) : انا عارفه انتي جايه هنا ليه و المقدمات دي مافي ليها اي ستين لازمة لان انا عارفه و انتي عارفه ! و لو بتحترمي خصوصيه القدامك زي ما بتقولي ما حتجي داخله علي كدا تووووش و لا حا تجي تقعدي قدامي القعده دي ! 

** ( وقفت على حيلها ) : فعلاً كلامك صح !! 

لكن طالما ما جات منك أقلاها من باب الذوق انا الليل كله سهرانه فوق راسك مُقلقة و اكذب ل دا و ابرر ل دا ، قلت اخليها تجي مني ! و جيت على نية اني اساعدك يمكن منتظراني اجي اسألك او حتجيني و تتكلمي معاي ، لكن الاكتشفتو اسي انك م كنتي ناويه ، ( ربعت يدينا ) لكن اسمحي لي المرة دي انا جايه و مصممة اعرف الحصل ! يا اما اعرف يا اما اعرف م عندك معاي خيار تالت !! ( بي نبرة حادة ) لان المنطق بيقول ان مرة رااجلها مـ... #قاطعتا ! 

__ ممكن تطلعي برا ؟ 

** اطلع برا !! هههه  

__ ايوا ! 

** ما حاسه انها قويه منك تطرديني من بيتي ؟ 

__ للمرة التانيه ممكن تطلعي برا ؟؟ 

** ما قبل ما اعرف ، ابوه منو ؟؟ 

__ قلت ليكي اطلعي براااا 

** ( بي كوراك ) : و انا ما طالعه قبل ما اعرف الفي بطنك دا جا من وين ؟؟ محترماك و جايه اتكلم معاك زي اي اتنين عاقلين و انتي لا مُصرة تتمادي لا و ماخدة لي وضعية ( هاجموهم بالصوت ) ! ختيت ليك قيمة و نفسي م سمحت لي اقوليك حملتي بالحرام و لا كنتي بتخوني راجلك زي ما الناس قاعده تقول !!