|| قِصص الأنبياء ..🦋'

30- مُوسىٰ عليه السلام'5'(هلاك فِرعون)

#قصص_الأنبياء
#الحلقة_الثلاثون
#قصة_موسى(5)
#هلاك_فرعون

وقفنا المرة إللي فاتت عند فرعون لما رجع تاني يقتل أبناء بني إسرائيل عشان ينتقم منهم ومن موسى،
عاش موسى عليه السلام في مصر يدعو في بني إسرائيل،
فهو في الأساس أُرسل لهم، وكان عنده طلب محدد من فرعون وهو إنه يسيب بني إسرائيل يخرجوا من مصر وفرعون مش راضي،
يعني إديني بني إسرائيل أخرج بيهم من البلد وعيش إنت مع نفسك بقى زي مانت عايز 🙄
وموسى عليه السلام كان عايز يخرج ببني إسرائيل من مصر لأنهم ذرية يعقوب عليه السلام،
وكانوا موحدين على دين يعقوب ويوسف عليه السلام ولم يعبدوا فرعون أو أي آلهة أخرى برغم الظلم والبطش،
وعشان كده ربنا اصطفاهم على غيرهم من الأمم بسبب صبرهم،
وكل الأنبياء هييجوا من بني إسرائيل حتى عيسى، وهم معرضين للقهر والظلم، فربنا أراد إنه يخرجهم من الظلم والبطش ويرجعهم لبيت المقدس إللي بناه يعقوب عليه السلام مرة تانية،

وفرعون مش موافق إطلاقا إن بني إسرائيل يخرجوا عشان ميحصلش إنهيار في الدولة بسبب عدم وجود عمال، زي ما قلنا المرة إللي فاتت 😉
ربنا أراد إنه يقيم الحجة على فرعون أكثر فأرسل معجزات تانية:
"وَلَقَدْ آتَيْنَا مُوسَى تِسْعَ آيَاتٍ بَيِّنَاتٍ "
أولها القحط والجدب...مفيش مطر ..جف النيل ..فمبقاش في مية ..فعرف فرعون إن ده بسبب موسى عليه السلام، فأرسل له فرعون إنك لو رجعت النيل والمطر نزل هنسيب بني إسرائيل يروحوا معاك،
"وَلَقَدْ أَخَذْنَا آلَ فِرْعَونَ بِالسِّنِينَ وَنَقْصٍ مِّن الثَّمَرَاتِ"
فدعا موسى عليه السلام الله فرفع عنهم القحط والجدب ونزل المطر ورجع النيل،
وخلف فرعون العهد مع موسى ومرضيش يسيب بني إسرائيل يخرجوا من مصر،
فربنا أرسل عليهم الطوفان...فاض النيل وغرّق الأرض كلها ،
فبعت فرعون لموسى عليه السلام تاني ووعده فلما ربنا رفع عنهم البلاء رجع فرعون في وعده لموسى،
وفضل الوضع كده ..ربنا يرسل الآيات ورا بعض وفرعون يطلب من موسى عليه السلام الدعاء ويوعده ولما البلاء يترفع يخلف فرعون وعده،
ربنا أرسل عليهم الجراد فأهلك المحاصيل الزراعية، وأرسل عليهم القمل ويقال إنه حشرات الرأس ويقال إنه السوس، وأرسل عليهم الضفادع، بقت كل البلد مليانة ضفادع..في أكلهم ..في سرايرهم.. في كل مكان،
وأرسل عليهم الدم،
كل السوائل تحولت لدم، المصري ييجي يشرب الماء يتحول في إيده لدم...يأخذه الرجل من بني إسرائيل يتحول لماء، وابتلاهم بنقص الثمار ...
"فَأَرْسَلْنَا عَلَيْهِمُ الطُّوفَانَ وَالْجَرَادَ وَالْقُمَّلَ وَالضَّفَادِعَ وَالدَّمَ آيَاتٍ مُّفَصَّلاَتٍ فَاسْتَكْبَرُواْ"
وكانت أي حاجة تحصل في البلد يقولوا: موسى ...موسى...موسى وإللي معاه هم السبب...
☆ده على أساس إن الابتلاءات إللي إنتم فيها دي مش بسبب أفعالكم وبسبب الظلم ومعصيتكم لله😑
"وَلَمَّا وَقَعَ عَلَيْهِمُ الرِّجْزُ قَالُواْ يَا مُوسَى ادْعُ لَنَا رَبَّكَ بِمَا عَهِدَ عِندَكَ لَئِن كَشَفْتَ عَنَّا الرِّجْزَ لَنُؤْمِنَنَّ لَكَ وَلَنُرْسِلَنَّ مَعَكَ بَنِي إِسْرَآئِيلَ فَلَمَّا كَشَفْنَا عَنْهُمُ الرِّجْزَ إِلَى أَجَلٍ هُم بَالِغُوهُ إِذَا هُمْ يَنكُثُونَ "