|| قِصص الأنبياء ..🦋'

44- ذو القرنين'1'

#قصص_الأنبياء
#الحلقة_الرابعة_والأربعون
#ذو_القرنين(1)

وقفنا المرة إللي فاتت عند بني إسرائيل لما رجعوا سكنوا فلسطين مرة ثانية تحت الحكم الفارسي، وبعدين تحت الحكم الإغريقي بقيادة الإسكندر الأكبر،
وفي ناس بتخلط بتقول إن الإسكندر الأكبر ده هو ذو القرنين😅
والكلام ده غير صحيح ..لأن الإسكندر المقدوني كان كافر بيعبد الأصنام، زيه زي الدولة الفارسية بالضبط👌
وكان الإسكندر المقدوني على الرغم من كفره إلا إنه كان ملك عادل وكانت فترة حكمه لفلسطين ٢٦٩ سنة،
فيها علوم كثيرة وازدهار، انبهر بها اليهود إللي كانوا في فلسطين، وبدأوا يتعلموا لغة الإغريق وثقافتهم،
وانقسم اليهود لفرقتين فرقة متأغرقة يعني بتتبع الإغريق في كل حاجة حتى الوثنية 🤦‍♀️

☆يعني مش إنهم ياخدوا الحلو ويسيبوا الوحش لأ ده خدوا كله😑
ويمكن حجتهم زي حجة بعض المسلمين في زماننا من إللي بيتبعوا الغرب في كل حاجة برده🙄
تلاقيهم يقلدوهم في كل حاجة حتى لو مخالفة للعقل زي لبس الهدوم المقطعة،
أو مخالفة للدين زي التبرج وإن البنت يكون لها صاحب أو الولد يكون له صاحبة، ومفكرين إن هو ده التقدم والحضارة..مفكرين إن استعمالهم لكلمات بلغات أجنبية وسط المسلمين ده بقى عنوان الرقي💁‍♀️
رسول الله صلى الله عليه وسلم قال :
"الحكمة ضالة المؤمن أنّى وجدها فهو أولى الناس بها"

الإسلام بيدعوا إننا نتعلم كل حاجة تفيدنا في حياتنا حتى لو كان إللي صنعها كافر، لكن إيه لازمة إني أخذ حياة الكافر دي
وأخليها حياتي🤷‍♀️
ده إللي طائفة من بني إسرائيل عملوه..اتعلموا ثقافة الإغريق وعلومهم وكل حاجة حتى عبادة الأوثان، وهم أصلا أهل كتاب وعندهم الأنبياء،
ومش بس كده دول حرفوا التوراة المحرفة أصلا عشان توافق ثقافة الإغريق 😅
ماهم كمان كان عندهم تجديد الخطاب الديني ..أمّال إيه🙄

¤عارفين..معلومة كده عالسريع..في القرون الوسطى أوروبا كانت في أشد عصور جهلها في حين إن المسلمين في الأندلس كانوا في قمة حضارتهم...لدرجة إن أبناء ملوك أوروبا كانوا بييجي يتعلموا في جامعة قرطبة ،
وكان الأمراء بيدخلوا كلمات باللغة العربية وسط كلامهم عشان يتفاخروا بإنهم يعرفوا لغة أكثر ناس عندهم حضارة في الزمن ده👌
نقول إيه بس..ده إللي بيحصل لكل أمة مهمزومة مبهورة بأي أمة أقوى منها😞

ده كان حال الفرقة الأولى المتأغرقة...الفرقة الثانية هي إللي فضلت على التوراة المحرفة التحريف العادي☺
وكان قائدهم واحد اسمه يهوذا المُكابي، فاليهود بيعتبروه بطل لإنه ثبت على التمسك بالتوارة وسط اتباع معظم اليهود في أرض فلسطين للإغريق👌

☆واخدين بالكم🤭
ناس حرفوا وغيروا في الدين عشان يوافق هواهم وعشان خاطر الإغريق😏
وناس ثبتت على موقفها ودينها من غير ما تغير 😈