|| قِصص الأنبياء ..🦋'

47- أصحاب السبت

#قصص_الأنبياء
#الحلقة_السابعة_والأربعون
#أصحاب_السبت

بما إننا اتكلمنا عن يأجوج ومأجوج والسد..وقلنا إننا نحط بينا وبين الفتن سد،
فأنسب قصة نتكلم عنها النهاردة هي قصة أصحاب السبت😊
اليهود كانوا بيقولوا إنهم أحباب الله، فربنا قال لهم،
لو كلامكم صحيح ..طيب بيعذبكم بسبب ذنوبكم وعصيانكم ليه؟😒
أيوة ربنا فضّل بني إسرائيل بالنبوة والملك على باقي البشر في زمانهم، لكن إللي يعصي ربنا بيعذبه في الدنيا قبل الآخرة،
"وَقَالَتِ الْيَهُودُ وَالنَّصَارَىٰ نَحْنُ أَبْنَاءُ اللَّهِ وَأَحِبَّاؤُهُ ۚ قُلْ فَلِمَ يُعَذِّبُكُم بِذُنُوبِكُم ۖ بَلْ أَنتُم بَشَرٌ مِّمَّنْ خَلَقَ "

عايزين مثال إن إللي بيعصي ربنا بيعذبه في الدنيا..عندكم قصة أصحاب السبت👌
"وَلَقَدْ عَلِمْتُمُ الَّذِينَ اعْتَدَوْا مِنكُمْ فِي السَّبْتِ فَقُلْنَا لَهُمْ كُونُوا قِرَدَةً خَاسِئِينَ"

أصحاب السبت دول هم قوم من بني إسرائيل ، منعرفش زمانهم كان إمتى بالتحديد، لكن يُقال إنهم كانوا في زمن داوود عليه السلام،
وكانت قرية اليهود دي جنب البحر، فطبعا ده معناه إنهم بيعتمدوا على صيد السمك في غذائهم،
ربنا كان محرم عليهم صيد السمك في يوم السبت...باقي الأسبوع حلال لكن يوم السبت لأ👌

☆طيب اشمعنى يوم السبت😕
كل نبي من الأنبياء بيقول لقومه على يوم الجمعة وفضله،
فلما موسى عليه السلام قال لبني إسرائيل عن يوم الجمعة زي باقي الأنبياء ،
بني إسرائيل اعترضوا وقالوا لأ السبت أحسن ، وقعدوا يبرروا فربنا قال لهم خليكم في السبت،
فلما جه زمن قرية أ، ربنا ابتلاهم إنهم لا يصطادوا السمك يوم السبت اختبار وامتحان لهم👌

في البداية كانوا ملتزمين بعدم صيد السمك، وكانوا بيصطادوا في باقي أيام الأسبوع،
لكن مفيش سمك في البحر غير يوم السبت😶
طول الأسبوع مفيش ولا سمكة..يوم السبت السمك كثير جدا لدرجة إنه بينط على بعض وبيشوفوه بعنيهم😅

☆زي مثلا لما الواحد بيبدأ يتبع أوامر ربنا ونواهيه،
يقول خلاص بس أنا تبت 😤
مثلا تبت من سماع الأغاني..فكل ما يمشي في مكان يسمع الأغاني إللي كان بيحبها وعلى طول بيسمعها😳
واحدة تابت من اللبس الضيق والميكب ولبست الحجاب الشرعي،
طول ما هي ماشية عمالة تشوف البنات لابسة وعاملين في نفسهم البدع..ودي تقولها إنتي كبرتي نفسك ليه،
والتانية تقولها شكلك وحش والرابعة تقول ...والخامسة والسادسة....كل ده اختبار👌
ماهو ياجماعة سهل جدا إن الواحد يقول أنا مؤمن أو أنا ملتزم بأوامر ربنا😅
إزاي الإنسان يعرف إذا كان صادق فعلا في كلامه ولا لأ؟
بالإبتلاء والمشاكل و...و...
هو ربنا عالم الغيب، وعالم إذا كان الشخص ده صادق ولا لأ،
بس ربنا مش بيحاسبنا بسابق علمه فينا😊
بيحاسبنا باللي إحنا بنعمله،
فبيبتلي الإنسان عشان يقوله شوف نفسك..شوف أفعالك.. هل إنت فعلا صادق في كلامك وايمانك والتزامك ولا لأ👌
فلو صبر الإنسان قصاد الفتن والمُغريات واستمر على طريق الإلتزام يبقى هو فعلا كان صادق، لكن لو رجع خالص زي الأول وأكثر يبقى مكنش صادق🤷‍♀️
"أَحَسِبَ النَّاسُ أَن يُتْرَكُوا أَن يَقُولُوا آمَنَّا وَهُمْ لَا يُفْتَنُونَ"