|| قِصص الأنبياء ..🦋'

60- عيسىٰ عليه السلام'6'

#قصص_الأنبياء
#الحلقة_الستون_والأخيرة
#مريم_زكريا_يحيى_عيسى(10)
#عيسى(6)

وقفنا المرة إللي فاتت عند الملك الروماني لما أرسل جنوده عشان يقبضوا على عيسى عليه السلام والسبب إن اليهود حرّضوه على عيسى عشان شافوا الناس بدأت تؤمن به وخافوا على ملكهم وسط الناس،
لأن عيسى عليه السلام فضحهم وفضح كذبهم ولعبهم في الدين ،
"ومَكَرُواْ وَمَكَرَ اللَّهُ وَاللَّهُ خَيْرُ الْمَاكِرِينَ"
فلما كان الجنود في الطريق، ربنا أوحى لعيسى عليه السلام إنه هيتوفاه ويرفعه إلى السماء،
يعني هينيمه ويرفعه للسماء يقعد فيها لحد ما ييجي الوقت إللي هينزل فيه تاني عشان يكمل حياته على الأرض ويموت زي باقي البشر،
"إذْ قَالَ اللَّهُ يَا عِيسَى إِنِّي مُتَوَفِّيكَ وَرَافِعُكَ إِلَيَّ وَمُطَهِّرُكَ مِنَ الَّذِينَ كَفَرُواْ "
كان عيسى عليه السلام في بيته وعنده الحواريين ،فخرج عليهم بعد ما اغتسل في البيت ورأسه بتنزل مية
وقال لهم : فيكم واحد هيكفر بي ١٢ مرة👌

☆يعني يمسكوه ويقولوا له إنت من اتباع عيسى فيقول لا أبدا أنا غير مؤمن به أصلا..فيسيبوه ..وبعدين يرجع يؤمن بعيسى عليه السلام فيمسكوه تاني ويقولوا أنت من أتباع عيسى فيقول لهم لأ أنا غير مؤمن به..وهكذا لحد ١٢ مرة👌

وحكى لهم عيسى عليه السلام إن الجنود عايزين يقتلوه وهم في الطريق،
فسألهم مين فيكم ربنا يخليه شبهي ويُقتل مكاني ويكون رفيقي في الجنة؟
فشاب صغير قال : أنا..فكأن عيسى عليه السلام أشفق عليه،
لأنه كان عارف إنهم هيقتلوه ومش أي قتل..ده قتل عن طريق الصلب،
يعني يحطوا الرجل على صليب وبعدين يدقوا المسامير في جسد الرجل من عند إيده ورجله عشان يثبتوه في الصليب،
فيموت على تاني يوم بسبب إنه بيكون اتخنق😑
تخيلوا يوم كامل إنسان بيتخنق بالبطيء لحد ما يموت.. عذاب فعلا 😞

فسأل عيسى عليه السلام مرة ثانية : مين ربنا يخليه شبهي ويكون رفيقي في الجنة؟
فنفس الشاب قال أنا 😕
فعيسى عليه السلام أعاد السؤال مرة ثالثة فنفس الشاب قال : أنا🙋‍♂️
فقال له عيسى خلاص أنت👌
فربنا غيّر شكل الشاب وخلاه نفس شكل عيسى بالضبط،
والحواريين شايفين ومستغربين😮
ده قول ابن عباس رضي الله عنه👆

وفي قول ثاني إن في واحد من الحواريين كان منافق وخان عيسى عليه السلام ودل الجنود على مكان عيسى ،
فربنا ألقى عليه شكل عيسى عليه السلام عشان يُقتل مكانه عقابا له،
فاحنا معندناش نص صريح من القرآن والسنة تقول لنا بالضبط إيه إللي حصل👌

كان في فتحة في سقف البيت إللي كان عيسى عليه السلام فيه،
فربنا رفعه إلى السماء من الفتحة دي يوم الجمعة بعد العصر ورفعه بجسمه وروحه الإتنين✌
فهو في السماء الثانية مع ابن خالته يحيى عليه السلام،
لأن يحيى هو ابن إشياع إللي احنا قلنا عنها في الأول إنها أخت مريم أو خالتها،
وابن خالة أمي يكون ابن خالتي أنا كمان،
زي مثلا عم أمي يكون عمي وخال أمي يكون خالي وهكذا😉