|| قِصص الأنبياء ..🦋'

45- ذو القرنين'2'

#قصص_الأنبياء
#الحلقة_الخامسة_والأربعون
#ذو_القرنين(2)

وقفنا المرة إللي فاتت عند ذو القرنين لما خلص رحلته في جهة مغرب الشمس واتجه في رحلة ثانية وهي جهة مطلع الشمس😊
"ثُمَّ أَتْبَعَ سَبَبًا"
ذو القرنين موقفش عند رحلة المغرب..دوّر على سبب تاني..أو خلينا نقول باب تاني ..زي لما تسمعي ولا تشوفي مقطع يعلي إيمانك...تقومي تقولي خليني أقرأ قرآن..ملقتيش قلبك حاضر في القرآن..تقومي تصلي ركعتين...مظبطتش الصلاة معاكي نقعد نذكر ربنا...
المقصد إنك موقفتيش محلك سر وقلتي خلاص كده..لأ ده إنتي كملتي زي ذو القرنين😉
"ثُمَّ أَتْبَعَ سَبَبًا"
خلال رحلة ذو القرنين من المغرب للمشرق أكيد حصلت أحداث تانية بس زي ما قلنا هنركز على إللي ربنا أخبرنا به في القرآن،
وصل ذو القرنين لمطلع الشمس فلقى الشمس بتطلع على قوم عايشين في مكان لا فيه شجر ولا جبال ولا حتى بيوت الناس دي تعيش فيها ومش كده وبس ده حتى معندهمش ملابس يلبسوها تحميهم من الشمس،
فكانوا بيدخلوا في سراديب تحت الأرض أو يدخلوا في المية لحد ما الشمس تغرب وبعدين يمارسوا حياتهم،
"حَتَّى إِذَا بَلَغَ مَطْلِعَ الشَّمْسِ وَجَدَهَا تَطْلُعُ عَلَى قَوْمٍ لَمْ نَجْعَلْ لَهُمْ مِنْ دُونِهَا سِتْرًا "
فلما وصل عندهم تعجب منهم وإزاي عايشين كده😳
فعمل معاهم زي ما عمل مع القوم عند مغرب الشمس،
وطبعا هو معاه جيشه ومعاه المترجمين فبدأوا يعلموا الناس دي ثقافة الملابس وإزاي يستتروا من الشمس،
"كَذَلِكَ وَقَدْ أَحَطْنَا بِمَا لَدَيْهِ خُبْرًا "

☆وهنا نستفيد إن رسالة ذو القرنين واحدة👌
الكافر والظالم في قوم المغرب زي الكافر والظالم في قوم المشرق، يعني هو مش بيفضل حد على حد...مبدأه واحد في العدل بين الناس😊
خلص مع قوم المشرق وبعدين كمّل..موقفش.. راح يدور على باب تاني من أبواب الخير😉
وصل في رحلته لبين السدين ...ثغرة...حتة فاضية بين جبلين...زي المثلث كده《 \/ 》 لقى في المكان ده ناس مش عارفين يتكلموا أي لغة بسب بعدهم عن الناس،
وهو معاه مترجمين مفيش حد فيهم فاهم منهم حاجة🙊
فيُقال إنهم احتاجوا سبعين مترجم عشان ذو القرنين يفهم هم عايزين إيه😅
"حَتَّى إِذَا بَلَغَ بَيْنَ السَّدَّيْنِ وَجَدَ مِنْ دُونِهِمَا قَوْمًا لَا يَكَادُونَ يَفْقَهُونَ قَوْلًا"

☆عارفين زي إيه🤔
لما مثلا أنا أكون بتكلم عربي وواحد تاني بيتكلم أُرْدو وأنا مش فاهمة الكلام..فنسأل في حد يقدر يترجم يا جماعة فييجي واحد ياباني يترجم الأْردو للياباني وأنا لسه مش فاهمة😅
فييجي واحد فرنسي يعرف ياباني فيترجم من اليابانية للفرنسية، وبعدين واحد يترجم من الفرنسية للإنجليزية وبعدين في الآخر يترجم من الإنجليزية للعربية وأنا أفهم،
فاحنا احتاجنا ثلاثة مترجمين عشان أفهم الكلام إللي بالأُردو،
فالقوم إللي كانوا عند السد كانت لغتهم غريبة محدش يعرفها ،
فكل واحد من المترجمين قعد يجمع كلمة من هنا على كلمة من هنا لحد ما وصل المعنى لذو القرنين😊