🍒الفصل الرابع: كن لي أبا
♣️الجزء :1076
وصلو لقصر بلقيس وابرار لي غادي تتسطى بالبكى ، نزلو وشدات بلقيس فيها مدخلاها معاها
دخلو لوسط الصالون لقاو ذكرى وصفاء وفهد جالسين شافوهم وقفو منغير فهد لي بتاسم شاد فيديه القهوة
ذكرى :بلقييس مالها
بلقيس غمزاتها :ماتخافيش ،صفاء سيري ابنتي جيبي ليها كاس دالما
صفاء حركات راسها ومشات كتجري وفهد حاضيها بعينيه
فهد بصوت مبحوح :بشوووية ماتجريييش
صفاء ضارت شافت فيه واخا مازالة مقلقة حركات ليه راسها بواخا وكملات طريقها
جابت ليها كاس دالما ورجعات مداتو لبلقيس لي بدات تشربها وابرار كتتنخض بالبكا
ذكرى :شنوو طرا شرحوو ليا
بلقيس : ماشي شيحااجة غير ماتتخلعوش
صفاء :كيفاش اماما مانتخلعوش وهي غادي تتسطا بالبكاا
بلقيس : ماطرا ليها والو غير حشمات وصافي
ابرار شافت فيها وتكلمات بصوت بااكي :كيفاش اماما بلقيس ماطرا ليا واالو وانا تشوهت مع دوك النسا كلهم
بلقيس :نتي ا ابرار ماكيهمك حد صاافي يعاودوها لراسهم
ابرار كتبكي وتحرك راسها بلا: كيهمنييي علاش ماكيهمنييش
صفاء : ماما شنو وقع ليها شرحو لينا
بلقيس : خديتها معايا نحفل تبرعات وهاد الحفلات دييما غادي تبقى تحضر ليهم بصيفتها مرات سلمان
ابرار حطات يديها على وجهها كتبكي
صفاء: علاش كتبكي داابا واش ماعجبكش الحال فهاد الحفل
ابرار حركات راسها بلا وتكلمات بصوت مقهوور : تحشمت وتفضحت كلشي غادي يكون ضحك عليا
صفاء: علاش شنو وقع
ابرار ببكاء : عيطو ليا نلقى كلمة وملي طلعت ماعرفت مانقوول بقيت غير كنشوف و سولاتني شي حاجة مافهمت واالو فيها
بلقيس: ودابا علاش كتبكي عادي
ابرار حركات راسها بلا وهي غادي تتسطا بالبكا : لااا مااشي عادي انا ماكرهتش فديك اللحضة تنشق الأرض وتبلعني ومانبقاش دقيقة تمااا حسيت براسي مكلخة ومبهللة ماعندي قييمة ، النسا لي طلعو لمنصة كلهم عرفو يدويو وانا بقيت واقفة بحال الطرنوونة كلشي ضحك عليا وكانو كيوشوشو
بلقيس : وشنو الحل؟ صافي ادا بغيتي ماتبقايش تخرجي وماتلاقايش بالناس
ابرار كتمسح دموعها وشهقاتها كيقطعو فالقلب : ماشي حل هو مانحضرش الحفلات انا كنبغي نخرج ونتسارا كيعجبني نتلاقى بالناس كيعجبني نكون بحال سحر ولكن مستحييل نكون بحالها (حطات يديها على وجهها كتبكي )
