محمد: اكيد يا مصطفي انا بناتي م بديهم ل زول م بعرف قيمتهم وانا واثق في عصام لو م كدا اكيد م بقول اي
مصطفي: طيب شوف رأي البت عشان لما نجي م يكون تعارف بس يكون عقد مرة وحدة في الاخر احنا اهل
محمد: دا كلام شنو ماف راي ولا كلمه فوق كلمتي
مصطفى: لو قلت كدا يبقي خير وبركة نقرا فاتحة الاولاد
"جزئية معلقه "
جو الضيوف واستقبلناهم كويس وابوي اتبسط مننا بس كلمه شكرا غالبا تقيله علي لسانه لانه مفتكر دا واجب علينا انه نقول سمعا وطاعه ل كل شي
بعد طلعو ناداني انا واختي وقال انتي عارفه انه البت في الاخر بتعيش في بيت راجلها م هنا صح
بعد المقدمه الكنت بسمعها لما يتقدم واحد لاخواتي عرفت البيحصل شنو وانه ابوي ناوي علي شنو لقي واحد من العندهم قروش واسم في السوق ومستحيل يفرط ح ابقي وحده من السلع البتتباع !
ابوي: وطبعا اتقدم ليك عصام اخو "علي "راجل اختك وغني عن التعريف شيخ مصطفي واولاده عندك كلام او مشكله ؟
سؤاله جا تزامناً مع ضربته للعصايه في الارض كأنه بهددني بطريقه مبطنة اياك والرفض والا انتي عارفه النهايه شنو ،
طلع صوتي وانا بقول ليه الكلمه كلمتك زي م انت عارف وهنا هو ابتسم ابتسامه نصر
بس انتهت واتلاشت بباقي جملتي ...
لكن انا عايزه اقرا يا ابوي نتيجتي قربت تطلع وادخل الجامعه انت عايزني اخلي قرايتي عشان اعرس
...اصوات صريخ واستنجاد بامي بس هي م بتقدر تعمل حاجه قصاده ولا صوتها يطلع ممكن يقتلنا عادي وهي م تتحرك عشان تمسكنا منه او تحمينا ،
بعد لحظات الهيجان ديك جراني من شعري ودخلني غرفتي وفصل المولد يوم كامل كنت قاعده مع الضلام البخاف منه بس م كنت قادره اخاف لانه خايفه من ابوي اكتر
بس لمتين ح افضل اخاف واقول حاضر في الصح والغلط كنت عارفه انه نهايتي يا موت يا حياة اكون فيها ميتة
ومدام كدا كدا انا ميته يبقي اعيش الايام دي وانا راضيه عن نفسي واختار الانا عايزاه
،دا كلامي الفكرت فيه بيني وبين نفسي وانا خاته حاجه في راسي وعايزة اعملها بس كنت عايزة القي الفرصه المناسبه،،،
كم يوم وبقيت كويسه ومشيت اعتذرت من ابوي وقلت ليه اني موافقه ومستحيل اعارض حاجه هو بقولها خليته يرضي عني كامل الرضي بس امي م كانت مطمنة لكسرتي دي لاني عمري م قلت اسفه حتي لو غلطانه وحتي لو ابوي قتلني م كنت بعتذر يبقي في شي غلط،،
وفهمت نيتي لما شافتني شلت اوراقي ولبسي وفتحت خزنه ابوي شلت منها قروش وكنت بفتح الباب طالعه مابين الساعة ٢ او ٣ صباحا،،
