لَمْ يَکْنِ سَنِدٍآ لَي

💞الفصل الثانى💞

فى كلية الاداب:

وصلت قمر الى الكلية وذهبت باتجاه المدرج وجدت صديقتها هبه بانتظارها.
*هبه: ازيك ياقمرايتى تعالى يلا أنا حجزتلك جنبى قبل المدرج مايتملى.
*قمر: تسلميلي يابيبو هو دكتور مسعد وصل ولا لسة.
*هبه: متقلقيش ياختي الساعة لسة8الا ربع هو بيدخل المدرج فى ميعاده بالظبط، مابيحبش يدخل بدرى لأن مفيش حد بيدخل بعده.
*قمر: الحمد لله ان المواصلات كانت حلوة النهاردة ووصلت بدرى انا مبحبش أفوت محاضرة الدكتور مسعد لان مادته صعبة اوى وبصراحة هو بيشرح بذمة وضمير.
*هبه: انتى ذاكرتى المحاضرة اللى فاتت أصلى فى جزء فيها مش قادرة افهمه ومكسوفة اقوله يعيده تانى.
*قمر: متقلقيش ياحبيبتي انا ذاكرتها كويس وفهماها بعد المحاضرة فى ساعتين على ميعاد المحاضرة التانية هبقى اشرحهالك واحنا قاعدين فى الاستراحة.
*هبه: مش عارفه اقولك ايه ربنا يخليكي ليا ياقمرايتى ياحلوة انتى.

بعد قليل دخل دكتور مسعد المدرج واغلق الباب لمنع دخول اى طالب بعده فهو شخص منضبط جدا فى عمله.
*دكتور مسعد: السلام عليكم، طبعا كلكم عارفين ان امتحانات نص السنة قربت خلاص والحمد لله المادة بتاعتى خلصنا الجزء النظرى اللى فيها كاملا لسة فاضل الجزء العملى وهو مش كتير، الجزء ده هتاخدوا الدرجات عليه بناء على شغلكم معايا فى المدرج. هتجيبولى من المكتبة اللى جنب الكلية شبلونة وورق كلك وقلم رصاص اسنان ٥. وبرجل ومطلوب منكم ترسمولى قارة أمريكا الشمالية وهشوفها المحاضرة الجاية، دلوقتى هعرفكم طريقة الرسم بالادوات الموجودة معايا.  ثم بدا فى شرح الجزء العملى وبعد مدة ليست بقليلة، بكدا احنا انتهينا من الجزء العملى والمحاضرة الجاية هوزع الدرجات على شغلكم لو فى حد محتاج اى حاجة فى المادة يتفضل يسال وانا تحت امركم.
بدا الطلاب فى طرح الاسئلة الى انتهوا ثم خرج الدكتور من المدرج.
*هبه: بت ياقمر انتى فهمتي اللى الدكتور مسعد شرحه.
*قمر: آه فهمت بتسألى ليه؟
*هبه: اصل بصراحه المادة معقدة جدا وانا مش عارفة استوعبها وبتكسف أسأله فابقى فهمينى انتى بقى.
*قمر: خلاص ماشي ياحبيبتي متقلقيش تعالى بس نروح نجيب الحاجات اللى الدكتور قال عليها عشان المحاضرة الجاية بتاعته بعد بكره يدوبك نلحق نجيب الادوات ونرسم الخريطة لانها هتاخد وقت.
*هبه: ماشى يلا بينا.
خرجا سويا من المدرج ولكن استوقفهم فجأة صوت شخص ينادى: آنسة قمر..... آنسة قمر.
التفتت قمر وهبه  باتجاه الصوت فوجدوا زميلهم ياسر يذهب باتجاههم.
*قمر باستغراب: أيوة فى حاجه حضرتك؟
*ياسر باحراج: هو انتم رايحين تجيبوا الادوات اللى قال عليها الدكتور مسعد.
*هبه: أيوه بتسأل ليه؟
*ياسر بتردد: يعنى لو ممكن أجى معاكم نشترى الحاجات سوا.
نظرت قمر الى هبه باستغراب فمن المعروف أنهم لايتحادثون مع زملائهم الشباب حتى لا ينظر اليهم أى شخص بمنظور سئ.
تنحنحت هبه باحراج: معلش حضرتك مش هينفع انت عارف عشان محدش يفهم غلط.
*ياسر باحراج: أنا آسف مقصدش والله انى أضايقكم بس بصراحه انا كنت عايز أتكلم معاكي ياآنسة قمر.
*قمر بتوتر: تتكلم معايا أنا! بس انا مبتكلمش مع شباب والكل هنا عارف كدا.
*ياسر: أيوه أنا عارف ودا اللى شجعنى انى آخد الخطوة دى، فمعلش ممكن نتكلم بره بعيد عن الكلية.
*قمر: أنا آسفه والله مقدرش أعمل كدا وعايزة أعرّف حضرتك انا مش بتكلم مع شباب مش عشان اثبت انى انسانة كويسة، لا انا بعمل كدا لانى متأكدة ان مفيش صداقه بين ولد وبنت، وبصراحة انا مقدرش اخون ثقة أهلى فياوأخرج مع حد.
ثم جذبت هبه من يدها وتركته ينظر لها بحالمية ويضع يده فوق قلبه وتنهيدة حارة
*ياسر: هو انا حبيتك من قليل ااااه.... ااااه ياوجع قلبى اللى حبك ومش قادر يطولك.
هبه بخبث: يا ترى ياسر كان عايزك ليه ياقمر؟
قمر: وأنا ايه عرفني هو انا كلمته ماأنا مشيت معاكى وبعدين انتى شاغلة بالك بيه ليه ولا الفضول هيموتك.
هبه: ههههههههههه ما انتى عارفه يااوختشى انا مقدرش أسكت الفضول هيموتنى وانتى ياختي زى القطر مسبتيش فرصة للواد حتى يقول كلمتين على بعض، هو انتى ياختى مش زى بقيت البنات منفسكيش كدا تحبى وتتحبى وتسمعيلك كلمتين حلوين من اللى بيدوخوا البنات دول.
قمر بضحك: حب ايه ياختي اللى بتتكلمى فيه هو انا عندى وقت للكلام ده وبعدين ماانتى عارفه كمان ان أنا مقدرش ادخل فى اى علاقة مع اى شاب لان بصراحه معنديش ثقة فيهم.
*هبه باهتمام: انتى دايما تقوليلى كدا لكن عمرك ماحكتيلى ايه سبب عدم الثقة دى. 
صمتت قمر قليلا وقد ظهر عليها الحزن: السبب كان دينا صاحبتى فى ثانوى كانت بنت رقيقة اوى ورومانسية جدا كانت طول الوقت تقول نفسى اعيش قصة حب زى اللى بشوفهم فى التلفزيون حاجة كدا زى مرڤت امين وحسين فهمى، ضحكتها كانت توديكى لعالم تانى عيونها اللى شبه عيون القطط بتتلون دايما مرة تلاقيها أخضر ومرة رصاصى ومرة زيتونى حاجة كدا وهم.
فى يوم لاقيتها بتكلمنى وبتقولى ان فى واحد كل شوية يتصل  بها على التليفون الارضي ويقول لها انه بيحبها لكن هي ما كانتش تعرف ده مين فضل مده طويله يشاغلها كانت في الاول بتصده لكن  مع مرور الوقت ضعفت قدام الكلام الحلو اللي كان بيقوله لها كان بيراقبها وعارف كل اخبارها لكن هي ما كانتش تعرف عنه حاجه خالص غير اسمه اللي هو قاله لها.
وبتنهيده حزن واسى اكملت قمر: فضل شهور يكلمها في التليفون ويسمعها احلى كلام ويبعت لها هدايا لحد ما تعلقت بيه قوي كانت هتتجنن وتشوفه كان نفسها تعرف شكله ايه انا ما كنتش مرتاحه وحذرتها كتير كنت خايفه عليها قوي لحد يعرف وتبقى سمعتها وحشه لان احنا عايشين في قريه والناس كلها عارفه بعضها بس هي السكينه كانت سرقاها وكانها كانت عايشه في حلم جميل مش عايزه تصحى منه لكن يا خساره الاحلام ما بتدمش، صمتت قمر وبدات دموعها في الهطول.
هبه: ايه اللي حصل بعد كده يا قمر؟
قمر: في يوم واحنا في المدرسه لاقيتها بتقول ان الشاب ده كلمها واخيرا قرر انه يقابلها كانت فرحانه وكانها ملكت الدنيا وما فيها قلت لها: بس افرضي حد شافك وراح قال لاهلك لكن هي ردت وقالتلي: انه عامل حسابه عشان ما حدش يشوفهم وانه هيقابلها في شقه واحد صاحبه عشان يقعدوا مع بعض براحتهم من غير ما حد يشوفهم لاقيت نفسي وقفت ومسكتها من اكتافها وهزتها جامد وقلتلها: انتى اتجننتى انتى ازاي تفكري تعملي حاجه زي كده ده انسان مش محترم انه يطلب منك حاجه زي دي وكده انت بتخوني ثقه اهلك فيكى لكن هي ردت عليا وقالتلي انه بيحبها وهيحافظ عليها ومش هياذيها وانه بيعمل كده عشان خايف ان حد يشوفهم قلت لها لو خايف عليكى بجد كان دخل البيت من بابه وطلبك من اهلك لكن هو عمل زي الحرامي عرف نقطه ضعفك ولعب عليكي ومثل عليكي الحب لحد ما خلاكى تتعلقي بيه وتوافقي على اي حاجه يطلبها منك وانت عشان حبيتيه بجد مش هترفضي لكن هي احتدت معايا في الكلام وقالت لي ان انا فاهماه غلط وانه بيحبها وبيخاف عليها وبسببه بعدت عني لانه فهمها ان انا غيرانه منها علشان مفيش حد بيحبني من الشباب وهي عايشه احلى قصه حب.
هبه بصدمه: ابن التيت ده طلع مصيبه اكيد ده كان ناوي ليها على حاجه مش كويسه.
قمر: يا ريتها سمعت كلامي وما راحتش تقابله.
بعد كلامي معاها بكام يوم لاقيت اخويا الكبير داخل عليا اوضتي وانا بذاكر ولاقيته بيقولي اول وآخر مره تكلمي دينا دي تاني فسألته ليه ايه اللي حصل؟ قالي: اني  سُمعتها بقت زي الزفت في البلد والناس بتقول عليها كلام وحش جدا اتنفضت من مكاني وقلت له كلام ايه اللي بيتقال عليها قالي ان في ناس بتقول عليها انها كانت متجوزه عرفي من واحد جارها وكانوا بيتقابلوا في شقه واحد صاحبه وانها كانت حامل منه كمان اتصدمت وصرخت: كدب كدب محصلش دينا عمرها ما تعمل كده ابدا دي انسانه نقيه ونضيفه بس هو اللي ضحك عليها باسم الحب لكن عمرها ما قابلته ولا شافته كان بيكلمها بس في التليفون يبقى هتكون حامل منه ازاي؟ فجأه وقف اخويا قدامي ووشه ميتفسرش من الغضب ومسكني من ايدي جامد وقالي بصوت عالي: وانتى بقى كنت عارفه عنها كل ده ولسه مصاحباها رديت وقلتله: والله هي مؤدبه قوي بس هو اللي ضحك عليها ما تظلمهاش عشان خاطري لان في بنات من كتر شده اهاليهم عليهم ما بيصدقوا يسمعوا كلمه حلوه بره المفروض البنت تسمع دايما الكلام الحلو من باباها واخوها بالذات عشان روحها تبقى شبعانه فقلبها ما يميلش لاي شاب بره يسمعها كلمتين حلوين، اخويا ساب ايدي وبصلي باستغراب لاقيتني بقوله: ما تستغربش اني بقول كده لولا كلامكم الحلو ليا دايما كان ممكن ابقى انا كمان زيها لكن انا روحي شبعانه من حنيتكم عليا وحبكم ليا مكفيني بس عشان خاطري بلاش تظلم دينا اكيد في حاجه غلط في الموضوع وانت عارف ان الناس هنا بيتكلموا على بعض حتى لو ما فيش حاجه حقيقيه.
بدا اخويا يهدى ويتكلم بعقلانيه معايا ويقول لي يعني لو هي واحده محترمه ينفع تروح مع واحد غريب شقه صاحبه رديت عليه وقلتله: والله انا نصحتها كثير لكن هي كانت السكينه سرقاها ارجوك خليني اروح لها واتكلم معاها واعرف ايه اللي حصل لكن هو رفض لانه كان خايف عليا وعلى سمعتي وبعدها بكام يوم عرفت ان دينا انتحرت وبدات تجهش بالبكاء وحاولت هبه تهدئتها وبعد قليل هدات قمر واكملت حديثها لما سمعت الخبر بقيت عامله زي المجنونه رحت جرى على بيتها ودخلت اوضتها لاقيتها جثه على السرير ومغطيين وشها فضلت اعيط جنبها بهستيريا واقولها: ضيعتى نفسك يا ريتك سمعتى كلامي من الاول وفجاه افتكرت انها كانت بتحب تكتب مذكراتها قمت من جنبها ورحت على المكتب بتاعها واخذت المذكرات من درج المكتب وبصيت عليها لاخر مره وخرجت من اوضتها لاقيت مامتها قاعده منهاره  وقفت قدامها وقلت لها بكل جمود: انتم السبب  انتم اللي عملتم فيها كده دينا كانت بتدور على الحب بس، الحب اللي انتم حرمتوها منه راحت دورت عليه بره ودي كانت النتيجه يا رب تكونوا مبسوطين. وسبتهم ومشيت دخلت اوضتي وفتحت مذكراتها وبدات اقراها لحد ما وصلت عند صفحه معينه لاقيتها كانت كاتبه فيها انا اسفه يا قمر اني زعلتك مني انا رحت اقابله بس والله ما قدرتش اطلع شقه صاحبه كنت واقفه بعيد مستنيه اشوف شكله يمكن يكون حد اعرفه وفعلا لاقيته حازم جارنا فاكراه يا قمر ههههههههههه ايوه هو حازم اللي مقطع السمكه وديلها بتاع البنات عرفت ان كان عندك حق وتراجعت وروحت البيت وقررت اني مش هكلمه تاني بس لاقيته بيتصل عليا ويقولي: انتى ما جيتيش ليه عرفته اني عرفت هو مين وانه كان بيكذب علي وقايل لي اسم غير اسمه الحقيقي عشان يوقعني لكن الكل. ب ده كان مسجل كل مكالماتنا وكان ناوي يفضحني وطلب اني اقابله ولو رفضت هيفضحني في البلد كلها لكن انا خفت واضطريت اروح اقابله عشان اخذ المكالمات اللي هو مسجلها ليه لكن كان هو عامل ليا كمين واصحابه موجودين في الشقه ومفهمهم ان انا دايما بجيله هنا صرخت في وشه وسبته وجريت روحت على بيتي وبعدين بدات الناس تتكلم عليا قمر انا مظلومه والله ما عملتش حاجه وحشه سامحيني انت كان عندك حق انا لازم انهي حياتي لان انا اللي عملت في نفسي كده سامحيني وادعي ربنا يسامحني سلام يا اختي وصاحبتي اوعي تنسيني.
هبه ببكاء: حسبي الله ونعم الوكيل في ربنا ينتقم منه ضيعها وهي ما كانتش تستاهل كده.
قمر: عرفتى ليه يا هبه انا ما بقتش اثق في اي شاب لاني شايفاهم كلهم بالنسبه لي حازم ويا ريت كل البنات تخلي بالها من خداع الكلام المعسول لان نهايته وحشه اللي بيحب يا هبه بيدخل البيت من بابه مش بيسرق زي الحرامي الكلام الحلو اللي بيتقال في الخفا ده اسمه سرقه عشان كده قصص الحب دي مش بتكمل يلا يا حبيبتي خلينا نروح نجيب الادوات عشان نخلص اللي الدكتور مسعد طالبه مننا هو ده اللي هينفعنا.

💞💞💞💞💞💞💞💞

البارت خلص يابنات ايه رايكم فى قمر ورأيها عن الكلام المعسول؟

تصرف دينا كان صح ولا غلط؟

هو فعلا البنت اللى مش بتسمع كلام حلو من اهلها من حقها تدور عليه بره زى دينا؟

متنسوش الفوت والكومنتات😍😍😍😍😍😍😍

ياريت تناقشونى فى الرواية بلاش نقرأ بس بدون تفاعل