ليلة ممطرة عاصفة كاعدة اعزل البيتونة حتى ليطب مي من شروگ الجدران وينزل عالبيت يدمر الوضع امي كالت لي لفي علاليك برميهن وخليهن بنص الفتحات ووگعدت اطبق كلام امي تبهدلت صرت مي خابط وجسمي كام يحكني من المي لان بي مثل التراب ...
واخيرا سمعت صوت امي تصيح نزلي كافي عاد تعالي هدري التمن قبل ميجي ابوج ونصب االغدة .
اني مصدكت امي كالت هيج نزلت طيارة كلت لامي بس اطب للحمام اغسل مقبلت كالت هدري التمن وراها طبي ابوج يجي تعبان .
سمعت كلامها وفعلا هدرت التمن وطبيت ركض للحمام عالسريع اريد اطلع علمود اكل لان كتلني الجوع واني بالحمام سمعت صوت ابوي اجا طلعت ركض احضر الغدة شفته يم الباب واكف دينزع حذاءة ولابس المطرية وايده حمرة من البرد وملامح التعب مبينة بوجهة فورا حضرت الاكل وصبيت والتمينا اني واختي واخوية الزغير ..
گعد بابا بوسط السفرة وبدة ياكل وكمنا ناكل جان التعب كلش مأثر بي ..
بابا عنده محل خضره من جان مراهق هذا شغله وباب رزقه الى حد ماخطب امي وتزوجها وهو ماتركه ماعنده راتب او شي هو هذا باب رزقه وامي تساعده بالمصرف تعرف تخبز و تخيط لحفان للجوارين وتسوي كبة او يدزولهة طلبيات خياطة تخيط وشي على شي الله ساتر علينه كاعدين بيت متواضع ورثة جدو لبابا والحمد لله ...
بيوم من الايام جنت كاعدة ادرس للامتحان صف ثالث متوسط وشادة حيلي لنص السنة ..
اشواق : لج منار تعالي عزلي الهول رتبي اخوتج هووسو كافي قراية
منار : ماما لخاطر محمد بس خليني اقرا سطر على سطر بدون ما تقاطعيني رحمة لابوج
اشواق : والله ضهري انكسر اشتغل منا ومنا ولج روحي تلعب من اشوف البيت مخربط كومي ساعديني شوية خما شراح يصير الكتب ميطيرن اقري واشتغلي
منار : صار يا يمة صار كايمة كايمة
كمت اعزل وشايلة الدفتر كاتبة بي التعاريف والملخصات اردد واشتغل ...
اني اشوف النقص اللي بية وشلون احتاج اشياء بسيطة ما احصلهة لذلك حطيت براسي اكتل روحي بالدراسة واطلع شي زين احقق بي حلمي واكوم اشتري شنو احتاج واريد بدون ما احد يمنيني هو هذا جان حلمي بالحياة .
داعزل وماحس الا انضرب براسي انداريت جان اشوف اخوتي ديلعبون صيحت بيهم
منار : ولكم هو الوصخ منين يجي غير من شكولكم الزفرة كافي عاد اركدو شنو ماعدكم دراسة
ايار وهادي : انجبي ام بجامة مشكوكة
منار : صفنت بيهم ذولة شديكولون شنو بجامة مشكوكة كمت اباوع على هدومي مشفت شي كلت لهم شدتحجون لان صفنوني ثنينهم حجو سوةة نفس الحجي
هادي : اي انداري شوفي من ورة مشكوكة
منار : تلمست اتاكد جان اشوف صدك اكو فتك من ناحية الجيب الخلفي بحيث االجيب نازل مثل اللسان يخرب ضحك بس تعصبت رحت وراهم اركض فحطوني وعفتهم رجعت اقرا واشتتغل
أنت تقرأ
آلمني ظلمهم
General Fictionبنت راحت فصلية لشاب مريض نفسيا بالشك تنحدر من عائلة فقيرة على كد الحال وتروح تواجه مصير مضلم .... الرواية حقيقة ١٠٠٪ بدون حرف زيادة . ملاحظة : القصة منقولة على لسان البطلة حصرا يعني مو كل الابطال يحجون انما هية تحجي اللي شافته واللي كالو .. مجرد...
