.
.
.
الشيخة : منيرة اليوم راح تسوين عشا
منار : شيخة اني ؟
الشيخة : اي ... اليوم تجي اخت الشيخ عزام وبناتها وولدها والعشى انتي تسوي لان تدرين حامل نسرين ومتكدر
منار : صار شيخة بس ترة اني مو هالكد بالطبخ
الشيخة : مشكلتج اذا فشلتيني بالاكل كدام العالم اعاقبج عقوبة مالها رداد ولا والي
حسن : يمة ليش تورطين روحج بيهة خوب خلي ياقوت ونسرين يسون ليش هذي
منار : شيخة اني اسوي هاهية
الشيخة : طبي من هسة للمطبخ وابدي اشتغلي
منار : صار شيخة ..
طبيت للمطبخ اول شي سويته ضربتلي صفنة ..
تذكرت لمن جان يخابر وكال وية البنية انتضرج وتعالي ولح عليهة ..
رادت مني تمن شعرية ومركة بامية عليها لحم ودجاجة شوية ومقبلات ..
مشكلة اني يم اهلي جنت ما اسوي هيج شي ثكيل واصلا اللحم جنا ما نسوي كل اسبوع اسبوعين مرة .
اسمي باسم الله واسوي وكلما اعصى بشي اسال نسرين بالسر وهية تجاوبني تكلي سوي هيج
الدجاجة الشوي ماعرف توابلهة بس قريت التوابل عدهم كلشي علي اسمه وكمت اخلي من كلشي خاشوكة جاي
خليتهة بالجيس وبالفرن والله ماعرفله امي جانت تسوي بالجدر عالطباخ ..
طلعتهة وخليتهة عالطباخ ..
وبديت اشتغل بالباقي .. سمعت صوت النسوان علا كلت هذولة اكيد اجو
وفعلا اجوي وكامن يطبن يسلمن اباوع عليهن من الشباك مال مطبخ .
لمحت حسن واكف عالباب وبنية تباوعله وهو يضحك حلگه مشروك شرگ ..
خليت عيني عليهم كلت ارد اشوف شيسوون
شوية واجاني حسن كال حضري مي وجاي وعصرية دانطيهم
حضرتهن وانطيته كلساع يروح ويرجع هو يودي
والله كلت هذا يستعرض كدام المدام
كملن العصرية عاد اجت نسرين كالت يريدن يشوفنج النسوان واي كلمة لتحجين بس سكتي راح يذبن سم تحملي
رحت وياها طبيت والعيون صارت كلهة تباوع عليه .
اعتقد كلنا البنات حاسات هذا شعور لمن بنية تريد تطب بمكان خطار والكل يباوع والنوب يباوعون عليمن ؟
عالخدامة مع الاسف ..
وكفت ورة ضهر نسرين وكمت اباوع ابوك نضر
عيني وكعت على حسن كاعد قريب من البنية بيناتهم بس مترة يمكن .
نظيمة (اخت الشيخ عزام ) : تعالي تعالي ارد اشوفنج يا مالت السگط
منار : مشيت بخطوات مترددة رجل كدام ورجل ورة
نظيمة : متونسة مبينة والله مرتاحة الوجه مورد
منار : سكتت مارديت حرف
نظيمة : شيخة خليني اچتلهة بمچانها وارتاح
الشيخة : له له يا نظيمة ومنو يخدم البيت بعدين
أنت تقرأ
آلمني ظلمهم
General Fictionبنت راحت فصلية لشاب مريض نفسيا بالشك تنحدر من عائلة فقيرة على كد الحال وتروح تواجه مصير مضلم .... الرواية حقيقة ١٠٠٪ بدون حرف زيادة . ملاحظة : القصة منقولة على لسان البطلة حصرا يعني مو كل الابطال يحجون انما هية تحجي اللي شافته واللي كالو .. مجرد...
