ذاتَ مرة سألوني عن سبب عُزلتي
لَم يعلموا أني أخيط جِراحاً لا يرونها أُداوي آلاماً لا يشعرون بها
أتنفس شعوراً قاسياً لا يُطيقونه ولن يتحمله أحد
#والدي_لا_يرحم
#noor_alqaisi1 انستا
________________________________
ميار :- مرن يومين احنه بالمستشفى ابويه وضعه صعب اجوي عمامي وخوالي والدنيا كلها ملتمه واني صافنه وكاعدة على الكرسي واتذكر ايامي ويا مينا ..
اتذكر من تجيني فرحانة من المدرسة وناجحة ب امتحان ودرجتها عالية واتذكر من تجي وتعاند وتضل تشاقة اتذكر من تكعد بنص الليل جوعانه اتذكرت كلشي ، اسمع صوتها بالممرات اسمع صوتها وهي تصيح مياري تعالي اني اهنا ، غفيت للحظات وجن اني كاعدة وجتي يمي سحبتني من ايدي وحضنتني
مينا :- ميار ليش تبجين؟
ميار :- ليش رحتي وعفتيني ؟ مو تحبيني واحبج هي هيج تروحين وتعوفيني وحدي ؟
مينا :- لا تبجين اني يمج شوفي ماما هذيج
ميار :- درت وجهي واباوع امي بنهاية الممر صحت ، يمه اخذتيها ؟ اخذتيها ومافكرتي بيه ؟ جا واني منو بحالي ؟ ليش ماتاخذوني وياكم تعبانه ومحتاجتكم تعبانه محتاجة حضنج يمه تعالي اخذيني ابوس ايدج
مريم :- يمه مايصير تعوفين ابوج وحده واني وين عايفتج مو تشوفيني يمج كل شوية جايه ، صيري قوية اختج مكانها يمي بعد وراج طريق طويل يمه حبيبتي لا تبجين بعد مينا تنقهر وتبجي من تشوفج تبجين خوش يمه ؟
مينا :- اذا اشوفج بعد تبجين بعد مااجي عليج لا اني ولا امي خوش؟
ميار :- ضحكت واني دموعي على خدي ، هاهيه تدللين انتِ وماما بعد ماابجي شوفي داضحك همين
مريم :- عفيه عليج يمه اني اهنا يمج دائماً مااوصيج ب ابوج يمه ديري بالج عليه انتِ سبعة
ميار :- تقربت يم امي داريد احضنها واختفت وفزيت
من فتحت عيني شفت الولد نفسه بالممر مال مستشفى بعيد واكف ويباوع عليه استغربت وخفت منه حيل ليش دائماً يطلع بوجهي من شافني اباوع عليه ابتسملي خزرته ونزلت عيني ومشيت للغرفة البيها ابوية طبيت شفت ابوية كاعد وصافن على الحايط وعمامي داير مدايرة ويحجون ويا ويواسونه باوعوا عليه ورحت يم ابوية
- يابه شلون صرت ؟
- زين ، طلعوني منا اريد اروح اشوف بنيتي
-طلعنا من المستشفى وكالوا الصبح انروح ندفن مينا نزلت دمعتي واجه ب اذني حجي مينا وامي بسرعة مسحت دمعتي ماريدهم يزعلون من عندي ، رحنا للبيت وياريت مارحنا ابوية طب لغرفتنا اني ومينا وسد الباب وعمامي ونسوان عمامي وبيبياتي كاعدين بالصالة ويبجون النسوان استغربت وضحكت بداخلي هذوله معقولة يحبونا ويبجون علينا ؟ جا لو متت اني هم احد يبجي عليه ؟
