العدل " رذاذ من ذهب "

part 5

ּ﷽

﴿إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ
يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا ﴾

حياتي تفاعلو بين الفقرات ولا تنسون التصويت قلبي 🪞

اليوم دللتكم بارتين نزلت

قرائه ممتعه ✨

××××××××××××××××××××××××××

جسمي متكسر ديموتني من الالم وراسي صاير طبل مصدعه فتحت عيني اشوف نفسي بغرفه شبه ظلمه بس ضوء خفيف ييجي من جوه الباب وشباك بالحايط صغير وبي حدايد ثلاثه مثل مال سجون الي بالافلام الجو بي رطوبه وريحه تكتل بالغرفه ريحه شي معفن ما اعرف شنو هوه

كمت على حيلي ادك بالباب حيل واصيح احد يساعدني ومحد يرد ضليت ادك بالباب لحد ما حسيت بأيدي انشكت ودم صار يجري منها لان الباب حديد ومزلغ

انهاريت كعدت بالكاع ابچي واصيح

- ساعدوونيييي طلعوني منا الله عليكم طلعوني فدوه فدوه طلعوني

رجعت ادگ بالباب دموعي تجري وماكو اي رد تخبلت صرت اضرب برجلي حيل وماكو اي صوت ييجي من بره بس اسمع صوت كلاب تنبح بعيد كلش

زدت بچي كعدت بالكاع لميت رجلي لصدري وانهاريت كلبي ايدك بسرعه وجسمي كله يرجف

بقيت اعيط وارد ابچي

- محد ديسمعني محد ديجاوب

تمتمت هل كلمات الي زادن ذعري بيني وبين نفسي صرت الطم على فخذي واعيط
صوتي شخط وغصيت كمت اكح

- فدوه طلعوني ، فدوه ،،،،،، اخااف ...

صرت اهمس كلبي فرفح من البچي ومن الهبطه حيلي باد صرت اسحل بروحي سحل ازحف لوسط الغرفه

لهناك طخت ايدي بشيء يابس حسيته مثل جلد الايد واكو ملمس خشن وقوي بي طكه وجواه رطب بس حطت ايدي علي كبت منه ريحه خايسه تكتل ترست الغرفه خنكتني

ابتعدت عنها لعبت نفسي وصرت اذب من راسي حيل
لدرجه تخيلت حتى امعائي ذبيتهن زحفت رجعت المكاني وحسيت اكو شيء مشه على ايدي ما اعرف شنو هوه
من عدها و اغمة عليه ما حسيت على شيء بعدها

...............................................................

گاعده احاچي امي على الدوام والامتحانات وفجأة يدخل علينه دفر الباب برجله حيل وصعد لغرفته يركض

امي نهضت من مكانها من شافته هيچ وراحت توكف على الدرج

لطمت صدرها حيل من شافته نازل و يحط السلاح على خصره صاير نار من العصبه وجهة محتقن احمر وعروكه ناطه