محمد : بيبي اتصلي على عمو خالد كليلة يتصل على خوالي يكلهم يطلعون من البيت بسرعة
عمو خالد اخو بابا الاصغر منة من ابو وامة واذا يكول الخوالي اذبحوا نفسكم ما يكولون لا لان يحترمونة ولابس عمامة وكلمتة الأولى والأخيرة عدهم
الطريق من بيت بيبي البيتنة نص ساعة محمد ماطول نص ساعة لكينا يمنة خالو عقيل اخذ خوالي وراح من بعد اتصال عمو خالد كعدنة للسحور محد الة نفس ياكل حاولنة نغير جو الماما كوة اكلت لكمتين
نبأ : سمعتي شيكول البابا
محمد : شكال
نبأ : يعلي صوتة عليه ويكول لو على وجهك شوارب تسمع كلامك
محمد : عقيل كال هيج؟
نبأ : اي ولله
طلع سجينتة وطلع يركض يريد يصعد بالدراجة
مجد : محمد
محمد : بابا اروحلك فدوة عوفني ولله اقتلة واشرب من دمة شنو هذا ويحجي وياك هيج يروحلك فدوة
مجد : كتلك ارجع
رجع كعد وعيونة تطافر غضب .. ثاني يوم اتصل خالو عقيل على بابا
عقيل : الليلة خالد يجي ويحل المشكلة
مجد : بشرط اذا اجة ما تفتح وياه بس موضوع صعدت سوسن وحدهة بالسيارة واذا صار كلام منا لو منا افتح وياه موضوع الرسالة
اكيد خالو مايريد هيج موضوع يوصل العمو خالد
عقيل : متفقين
كعدنة ننتظر بفارغ الصبر .. اجوا بالليل عمو خالد وخالو عقيل سلمنة عليهم اني ونورسين ورجعنة الغرفتنة ورة دقايق اجت ماما
سوسن : خالد يريدجن
نبأ : احنة؟
سوسن : اي بسرعة
اني ونورسين ضلينة وحدة تصفن بوجه الثانية .. كمنة كعدنة كدامة
خالد : شنو مطالبجن؟
باوعت على ماما بأستغراب
نبأ : شنو؟
سوسن : خوية ابو احمد البنات شدخلهن بهيج مواضيع انتة جاي تحجي وياي عالمشكلة شدخل البنات
خالد : اني احجي وياهن .. مطالبجن شنو؟
نبأ : ما نفهم عليك عمو شنو مطالبنة كلشي مانريد بس النعرفة انتة جاي حتى تحجي ويانة بموضوع ماما احنة شدخلنة
خالد : لا عدجن مطالب واكو شغلات تريدنهة كولن شنو
سوسن : خوية البنات مايفهمن عليك هنة اليعرفنة انتة جاي تحجي ويانة على موضوعي ما فهمن عليك شتريد منهن
خالد : عدجن مطالب ننفذهة الجن
نبأ : لا
خالد : تمام .. نورسين شنو علاقتج بهذا الولد من بغداد
