_ من فضلك انا كان جالي ايميل اني اتقبلت في الشغل
_ تمام ثواني هاخد اذن بدخولك للمانچر
_ تمام
ابتسمت وقعدت وانا قلبي بيدق
سمعت صوت الباب بتاع مكتبه بيتفتح
وظهر هو
كانت ملامحه جامدة عكس الي شوفتها امبارح
وراه راجل بيحاول يلحق خطواته برا المكتب
= يا فندم دا كان عطل فني
_ عطل فني خسر الشركة بالي فيها الوفات
التفتله وبصله بجمود
_ تفتكر هضحي بالشركة كلها عشان تقصير زي دا ؟!
= يا فندم ...
_ لينا .. صفيله حسابه و اديله مكافئة نهاية الخدمة
وبصله مرة تانية _ ودا عشان العيل الي لسه جايبه
وهو بيرجع بنظره عيني جات في عينه
حسيت انه اتفاجأ لكنه بص للسكرتيرة بتاعته والي فهمته الوضع
طلب منها تدخلني المكتب وبعد نص ساعة دخل.
_ أسف اني خليتك تستني
كان بيمسح ايده
_ احنا نفطر مع بعض بقا
بصيتله بزهول
كان بيقولها بتلقائية وابتسامة من هنا لهنا
عكس تماما الوضع الي كان فيه من شوية
_ تاكلي كرواسون بالجبنة ؟
_ هه ؟ .. اه ممكن
_ تمام
ضغط على الزرار
_ لينا .. خلي الساعي يبعت خمسة فول وخمسة طعمية
قفل المكالمة وبصلي
_ ها بقا الكلام على ايه !
مديت ايدي بالملف على مكتبه وعدلت النضارة
_ دا الCV بتاعي و..
مسكه لحظة ورماه فاتفاجأت، حاولت أكمل كلامي ..
_ أنا خريجة بيزنيس وجايبة امتياز اربع سنين وكان ليا خبرة في شركات في الاستي...
_ بتعرفي تعملي مسقعة ؟
_ مسقعة!!!!!
_ باللحمة المفرومة
_ مسقعة باللحمة المفرومة !
شاور براسه ايوا
كان واضح عليه بيكلم بجد
_ ا.. ايوا .. بعرف
_ جميل .. بكرا تيجي بيها
_ اه بس ..
ضغط على الزرار _ لينا .. الي بعده
كنت واقفة في المطبخ مش مصدقة اني فعلاً بقطع البتنجان
وبشوح اللحمة!
انا هدخل بصينية مسقعة في شركة كبيرة الساعة تمانية الصبح!
مين بياكل مسقعة تمانية الصبح!
_ اممممممم .. يا روايحك العالية
بصيتله
رفعت حاجبي
كان واقف في البلكونة الي قصاد بلكونة المطبخ بتاعي!
_ حد بيعمل مسقعة الساعة تسعة ونص بليل
_ وحد بياكلها تمانية الصبح!
سند على سور البلكونة
كان شعره مبلول فلاحظت الماية الي بتنزل على وشه
