وما بعد الفراق الا اللقاء

Part 9

المزرعة عند راكان وملاذ

راكان وقفها ونزل بطوله وهو يدقق برجلها وشاف كدمة وعليها جروح خفيفة واضح طايحه

راكان بخوف: متى طحتي انتي

ملاذ بوهقه: وقت السباق

راكان اخذ نفس وقال: تقدري تمشي ولا يوجعك

ملاذ: يوجعني بس اقدر امشي

راكان بخوف: اكيد؟

هزت له راسها وهي تقول: اكيد يا راكاني

ابتسم لاسمه بياء التملك : يلا نروح الغرفة نضبط رجل ملاذي

جاتهم شجون بسرعة: ملاذ وينك خوفتيني عليك نوف شبت داخل تدور عليك انت الثاني

راكان رد بدل ملاذ: ملاذ معي وبتنام تعبانه وانا بعد تعبان ما نمت عدل

شجون هزت راسها بنفي: يا ويلك من امي قالت انت بغرفة وملاذ بغرفة ونوف بغرفة كل احد لحاله ماتبي مشاكل

راكان بتسليك: طيب اي وحدة حق ملاذ

اشرت له شجون على الغرف وهو مشى مع ملاذ ودخل غرفتها وسكر الباب وشجون لفت على ورا وهي تسوي للبنات حركه انه ما سمع لها وراحت لهم

عبير: خلاص بنات خلوهم بحالهم حرام

شجون: اسكتي انتي نوف ما عليك بعد شوي تروحي تدرعمي عليهم وتبكي وتطالبي بالعدل

جميلة: لا تستهبلو اي عدل السحلية ذيك زوجته وساكنه معه ذي زوجته بس ما احد يعرف وش اللي عدل لالا اهدو وخفو لعب

نوف بقوة: لا انا ابغى العدل ابغاه

.....................

غرفة ملاذ

جلست على السرير وراكان جلس مقابلها على ركبه يعقم جرحها ويحط كريم حق الكدمات ويلفها لها بشاش وهي كانت متجاهله المها ما توقعت بيوم من الايام انها بتحب وبتغار وقلبها مين اختار ما غيره اللي ابوها يوثق به ولا دق عليه رد (هلا ولدي راكان) وهو كان بالمثل يلف ردجلها ويفكر بنفس الموضوع وتضيق روحه من طاري الفراق وموعده اللي هو بعد ثلاث اسابيع مايبي يبعد عنها بس بينجبر هو كان يتمنى نوف ويتحلم بنوف وبيوم وليلة تعلق بملاذ ومايبي وداعها قام وجلس جنبها وبعد تنهيده سدح نفسه بتعب من تفكيره وملاذ رفعت نفسها على السرير وبدات تلعب بشعره

ملاذ بابتسامه لعبت بخافقه لعب: ايه وش فيه راكاني ضايق

راكان ماصدق احد يسأله وبدأ يشكي: بعد ثلاث اسابيع بيطلع ابوك من السجن ويبيك تنتظري وما تزوريه يقول ثلاث اسابيع قليلة اصبري

ملاذ همهمت له وهي فكرت بابوها ثواني وبراكان باقي الدقيقة وهو كمل: وفراقنا بعد مدة بسيطة بعد ثلاث اسابيع

ملاذ بحزن: اصلا كذا كذا بنتفارق كنت تبي نوف من زمان واول ليلة لنا قلت لي عنها واليوم كنت تراعي مشاعرها كثير وانا ماهميتك ما اهتميت لمشاعر ملاذك ابد